LAUGA - “ Ua vivii tagata uma lava i le Atua, ona o le mea ua faia”

Tusia Rev. Petaia Setu ,

973 Hits

Rev. Petaia Setu

Rev. Petaia Setu

(Galuega 4:21)


O la Iakopo, a fiafia, pese; a o le sa’afi a le fai Salamo, Ia outou pepese atu ia Ieova ona o vavega ua na faia (Iakopo 5:13; Salamo 98:1). A nenee le loto, e le nofonofo. Ua siva mălie; ua fiafia saoloto.

A talitonu foi ma vaai i le faamaoni ma le silisili ese o le Atua, e le toe fefe; e le toe palaai; e le ma; ae tautalatala i le mamalu o le Alii, ma vivii i le Atua. O le mau lena a Luka i le lesoni nei.

Ua fiu toeaiina ma pulega faa Iutaia e faafefe Peteru ma Ioane, e le gūgū ai tama ia. Ma ua atili ai ona oge ma mativa le tōfā, ona ua vaai tagata uma ma molimau i le mana ma le silisili ese faaalia o le Atua ia Peteru ma Ioane. Ua vivii ai tagata uma i le Atua, ona o le mea ua faia.

O le aso lenei e faamanatu ai le uluai aso o le vaiaso poo le Aso Sa o le Sapati faa Kerisiano, na auina mai ai e le Atua le Agaga Paia i luga o le au soo ma tagata uma e talitonu ma faatuatua i le Alii o Iesu Keriso. O le Mana lea ma le Pule, e taitai ma faatonuina ai le galuega molimau o le faaolataga a Iesu Keriso i le lalolagi. O le Aso Penetekoso le asō. O le aso fanau o le Ekalesia Kerisiano.

O le aso na aloaia ona tuuina mai ai e le Atua le pule uma lava ia i latou nei e fai ai vavega i le suafa o Iesu Keriso. E pei foi ona molimau e lana auauna o Isaia, “Ua i o’u luga le Agaga o le Alii o Ieova; auā ua faauuina a’u e Ieova e tala’i le talalelei i e ua tigaina, ua ia auina mai a’u e fusifusi i e loto momomo, e tala’i le saolotoga i le tafeaga, ma le matuā tatalaina o e ua fusifusia….” (Isaia.61:1-3).

O le mana galue lea ma le pule to mai le Atua e ala i le Agaga Paia, o le Fesoasoani sa folafolaina mo le au soo ma le ekalesia a Keriso i le lalolagi. I le, ua avea lea Mana ma le Pule taitai a le Agaga o le Atua, e sosofa ma talaia ai faitotoa ma pa vaeloto uma o le lalolagi, ina ia faaolaina tagata uma ma vivii i le Atua.

I le mataupu nei, ua le mafai e se malosi o le lalolagi poo se pulega faa tagata ona taofia galuega a le Agaga. E le gata i e o loo faatino ma faailoa ai vavega a le Atua, a o le toatele foi o i latou o loo vaavaai ma molimauina, faalogo ma taliaina. Aleluia!

Ua vevesi pulega o le lotu Iutaia i ā latou faavae ma tulafono. Na o le Atua lava ma Mose, uma. Leai se isi lava igoa poo se isi lava pule! (f.7). A ua faamanino iai e Peteru ma Ioane e faapea, “ia iloa e outou uma, atoa ma le nuu uma o Isaraelu, o le suafa o Iesu Keriso le Nasareta, o lē na faasatauroina e outou, o lē ua toe faatuina e le Atua nai e ua oti, o ia lava ua tu mai ai lenei tagata ua malolo i o outou luma.” (f.10).

O le pipili sa faamaloloina i luma o le faapaologa o le malumalu. Ua silia ma le 40 tausaga o le pipili. A o Peteru ma Ioane, ua ia i la’ua meaalofa a le Agaga. Ua tutumu i la’ua i le Agaga Paia. Ua faauuina e le Agaga o le Atua mo lana galuega o le faaolataga. Ua la faatu i luga le pipili i le Suafa o Iesu Keriso o le Nasareta; ona faamalosia loa lea o ona vae ma ponaponavae.

Fai mai Luka, Ua oso ia i luga ma tu, ua savali foi faatasi ma i la’ua ile malumalu, o loo savali ia, ma oso, ma vivii atu i le Atua. O taga ia a le fiafia. O lagona ia o le faagaeetia. Ua le mapu le pese faafetai. Ua naunau le loto i le viiga o le Atua e le aunoa. Ae a, e silisili ese Ieova. E matautia le Atua o Isaraelu. O le upu a Peteru i luma o toeaiina, “E leai foi se tasi ua iai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou” (f.12).

Samoa e, ua fia ni faailoga tetele ua faia e le Atua i si o tatou atunuu? Poo e maitauina le tele o vavega ua faia e le Atua i lou olaga, i ou matua, i lau fanau ma lou aiga? Faapefea lau aoga, lau galuega? Faapefea ona e faamatalaina lou saogalemu, lou saoloto, lou malolo mai ma’i leaga ma le faigata?

Faapefea ona talatalaina atu lou manumalo mai fili ma lu’i o lenei olaga? Lou faaeaina mai tauemuga ma tuuaiga leaga uma lava? Faapefea ona faamatala le onosai ma le faapalepale o le Atua ia te oe?

Poo e iloa o loo faia e le Atua mea silisili mo oe e ala i le faamalosi ma le fesoasoani a lona Agaga Paia? Uso e, poo e lagonaina le mafuta mai o le Agaga ia te oe ma laveai oe mai le leaga semanū e te fano ai? Pe le i a’oa’oina oe i le alofa lavea’i o le Atua i ou tuaoi, i au uō, i ou tino, ia poo oe lava? E le mana’o le Atua i au tupe, poo au oloa. E le finagalo le Atua i ni palapala malo poo ni mea o siomia ai oe. Fai mai Tavita, O le lalolagi ma mea ua tumu ai, o mea uma a le Atua. (Sala.24:1).

A o le viiga o le Atua mai ia te oe. o le molimau a Luka i le pipili, “Ua iloa mai foi e le nuu uma o ia o loo savali ma vivii atu i le Atua” (f.9). E le na o le pipili na faaosofia i le mimita ma le loto faafetai. A o tagata uma ua vivii atu i le Atua ona o vavega ua ia faia e ala i le mana o le Agaga i le suafa o Iesu Keriso. Viia le Alii! Uso e, vaai ifo ia te oe. Tele pe itiiti, vivii i le Atua. Ua fia ni faailoga faamaoni ua faia e le Atua i lou olaga? Vivii i le Atua. Ua atu fia ona faasao oe e le mana o le Agaga? Vivii i le Atua.

Samoa e, o le Agaga Paia, o le mea foai fua mai e le Atua mo oe ma tagata taitoatasi uma. Peitai, e manaomia ona e salamō faamaoni. E ao ina papatisoina oe i le suafa o Iesu Keriso, mo le faamagaloina o au agasala (Galu.2:38).

Pe iai ea se mea e faigata i le Agaga o le Atua? O le mana lea tatou te mafaia ai mea uma; ae le o se isi lava malosi (Sakaria 4:6). Lou atunuu e, tatala lou loto e afio mau ai le Agaga o le Atua Soifua. Ona e vaaia lea o le silisili ese faaalia o le Atua ia te oe ma lou aiga i le mana ma le pule a le Agaga Paia. Faapefea lenei tagata ua ova male 40 tausaga, na fanau mai lava o pipili? Ua mafai e le au aposetolo. E mafai foi e oe ma tatou uma pe afai ua faamamāina atoatoa i tatou ma faatuatua i le Alii o Iesu Keriso.

Ona maua lea e outou foi o le mea foai fua, ole Agaga Paia lea, e pei ona faia i le aso nei i ona po o le au aposetolo. Manatua, o mea uma e faaalia ai le mamalu ma le silisili ese o le Atua, i vavega ma faailoga tetele ma le ofoofogia e faia e le Agaga Paia i o tatou olaga, vivii i le Atua. O lau tali faafetai lea i le mana faaalia o le Atua, pese, siva, ma vivii i le Atua. Alleluia.

 

Amene

7737063/7783782

 

© Samoa Observer 2016

Developed by Samoa Observer in Apia