E tutupu vavega pe ā ola galue

By Ilia L. Likou 04 June 2017, 12:00AM

O le agaga maualuga o le tamā i a Asora Mamoe, o le olaga lenei e ao lava ina ia aua ne’i ola fa’afiflemu se tasi.

O Asora o  se tamā mai le afio’aga o  Sataoa ma o lona olaga atoa o le taumafai lava lea ina ia atia’e aiga i le olaga na fa’apena ona ola mai ai i le tele o aso ua mavae.

“E pei o lea lava le tulaga o lo’o ua i ai le taimi lenei, o le taumafai lava e atia’e aiga, o le itu mautinoa e le mafai ona o tatou taumafai e maua le olaga manuia pe afai na’o o le nofonofo ae leai se galuega o faia.” Le tamā i a Asora, 51 le matua o le soifua.

“E pei o lea lava le tulaga  o lo’o ua i ai le taimi lenei, pe a o tatou mafaufau atu fo’i le tele o vaega e ao ona o tatou va’ava’ai i ai aua le aga’i i luma o le olaga.”

Na ia fa’ailoa o le olaga faifa’ato’aga ma le tausiaina lelei o aiga na amata mai lava i totonu o lona aiga i matua na ola ma soifua mai ai.

“I a e pei o lo’u ia ola ane o matua lava sa fa’alagolago i ai mo le lelei alu i luma o le atunu’u i na vaitau ua tuana’i atu.”

“E leai se mea na popole ai, ae pe sa ave lava le fa’amuamua i le tausiga o aiga, o lo’u ia lea olaga na ou ola ane ai ma ou molimauina.”

“O matua i la aso o ni matua e galulue, o le uiga o la’u tala, o le lauele’ele na maua mai ai so’o se itu mo le tausiga lelei o aiga aemaise o le aga’i atu ai i le lumana’i ma o lea le fa’amoemoega taua i a te a’u lava ia, i lo’u iloa i ai.”

Na ia fa’ailoa e le tatau lava i so’o se tagata ona nofonofo ma fa’atalitali i se vavega e tupu mai.

“E pei o lo’u ia lea iloa i ai le taimi lenei, ua matua’i taumafai lava ina ia mafai ona aga’i i le lumana’i ia ma ave fa’ata’ita’iga lelei tele nei mo nai fanau i le lumana’i.”

 “Ia o le olaga galue na amata mai lava o laititi lo’u nei tagata, ma o lea lava le tulaga o lo’o ua i ai nei e o’o mai le aso.”

“O lea lava fo’i le fa’anaunautaiga ina ia fa’amavae atu lenei olaga, ae o lo’o ua i ai se mea aoga e avatu i fanau, a ola ane fo’i ia aua ne’i ola falolo ae to’a’aga e galue fanua ma o i le aoga.”

“O a’u e fai la’u lafupua’a, o le lafumoa ma le tele lava o isi vaega o lo’o ua i ai le taimi lenei, ae o le naunauta’iga lava ia aua ne’i ola falolo si a’u fanau aemaise o le aiga ma mea fai mai lea aso i lea aso.”

“Ia o a’u ou te fagota fo’i, o le uiga o la’u tala, o lea le agaga fa’afetai i le Atua ona o le ola ma le tamaoaiga o lo’o fa’apea ona fa’asoa mai pea i lea aso ma lea aso aua le aga’i i le lumana’i ma mea uma o i ai.”

“O se alafua ua uma ona fa’ataoto e matua o lea fo’i lava ua fa’aauau i le taimi lenei.”

O lona talitonuga e  leai se mativa i Samoa.

“O lo’u lea talitonuga i le taimi lenei, o le tagata lava ia i le le galueaina o le ele’ele ua aumai e le Atua e fai ma o tatou tofi.”

“E ao ona o tatou iloa ma le mautinoa e leai lava ni aso ma ni faigata, e le fa’apea la o le a fa’atu’utu’u ai lava ma le lelava i aso uma o le olaga e pei ona sa sau a’i i tatou.”

“Ia o tatou iloa o lo’o soifua le Atua, o Ia le fesoasoani mai pea i lea aso ma lea aso.”

“Ae o le olaga ia i tua nei, ia o lo’o manuia lava ma atoatoa, e leai se mea o faigata.”

By Ilia L. Likou 04 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>