A i ai le loto e i ai fo’i le ‘auala - Johnny

Tusia Ilia L. Likou ,

51 Hits

Johnny Mika

Johnny Mika

Na maua le fa’atalatalanoaga a le Fofoga o Samoa ma  Johnny Mika o le afio’aga o Sataoa i le aso ananafi.

O Johnny e lona ono o le fanau e to’afitu a ona matua ma o lo’o aoga o ia i le Kolisi o Safata i le Tausaga 13.

E maua le fa’atalatalanoaga ma Johnny o lo’o aga’i mo le tapenaina mai o  to’ona’i o le aiga mo le asō.

 “Ia o le taimi lenei o lo’o o’u aoga, ae pei o feau masani lava lea i taeao uma , o le sau ai lea e tapena atu le fa’apusa ma vaega uma aua le to’ona’i o le Aso Sa taeao."

“E pei ona silafia ai, ia e le tau fa’atonuga lava nei vaega uma, aua o lea lava le olaga na ola mai ai, e mulimuli lava nisi vaega ae o le fa’alogo lava ma usita’i le mea e pito sili ona taua i le taimi lenei."

 “O a’u ua 17 nei o’u tausaga, ma o lo’u laititi mai lava, o lea lava le miti i a te a’u lava ia o le taumafai lava lea ina ia faia se mea aoga mo lo’u aiga, aua le aga’i atu ai le lumana’i."

 “E pei o la’u ia maitau i totonu o si o’u aiga, o le taumafai lava nai matua e tau feauauta’i le fa’asoa i mea fai o lea aso mai lea aso, aemaise ai a matou aoga."

“Ua le faigofie lava le va’ava’ai atu i le tau fa’asoa i aso uma, o nisi lava o aso e maitauina ai lava tulaga nei."

“Ia o le taumafai lava e alu i le aoga, ma ia iloa lelei, e tatau lava ona fai se fesoasoani mo aiga."

“O si o’u aiga, e na’o le to’alua lava tagata faigaluega, ia ma e le taitai ona feauauta’i le taumafai ai e fa’atino vaega nei i aso uma."

 “O le itu ia tau mea’ai o lo’o lava ae e pei o tupe lava o lo’o fa’apea ona le a’u’au lelei i le tele o aso."

O lona naunauta’iga ia maua se galuega lelei e fesoasoani ai aiga aemaise o matua."

“Ia o a’u e fia avea ma foma’i pea matua,” o lana tala mai lea."

“Ou te iloa lava e a’u ia , a manuia taumafaiga nei , e le taumateina fo’i e manuia lava aiga, ekalesia ma le atunu’u."

“Ia o le fa’amoemoega lea e i ai , a maea le tausaga 13 lenei tausaga, ia e tatau ona alu i le Iunivesite ia ma fa’aauau ai a’oa’oga aua se manuia o matou nei fanau mai tua nei."

“E leai lava se mea faigata pe a tu’u atoa ai le loto ma le mafaufau."

© Samoa Observer 2016

Developed by Samoa Observer in Apia