Manatu O Le Fa’atonu - O le itu taua lenei. E leai se avanoa mo le tulaga lua

Tusia Mata’afa Keni Lesa ma Faaliliu e Seagaitumua Tupuola ,

125 Hits

O le faatulagaga mo Samoa e matua faigofie lava. O le manumalo i le tauvaga i Monaco ona malaga atu loa lea o le Manu Samoa Ta’ito’afitu e auai faatasi ma isi ‘au-taalo e 11 i le tauvaga o le tala faasolopito o le Ta’ito’afitu i taaloga o le Olimepeka i Rio-i taimi faai’u o lenei tausaga. 

O le isi itu o le tupe e matua nenefu lava. Afai latou te le mafai ona ‘ausia lo latou faamoemoe, e tusa ai la ma upu a le faia’oga o Damian McGrarth, o le matua maumau lava o le taamilosaga mo alii o le lanu moana. E le faigata ona malamalama i le manatu o McGrath.

Mo le Manu Samoa Ta’ito’afitu lava ia, o se tauvaga lenei e matua taua tele. O le taaloga lenei e tatau ona latou faatauaina. E ui lava ina to’atele i tatou ua fiafia i le maoa’e o le tulaga ua ausia e lenei ‘au-taalo talavou o loo i lalo o le ta’ita’iga a McGrath ma Muliagatele Brian Lima, ae o le taunuuga lea ua faata’oto mo le vaiaso fou ma e leai lava se isi mea e manaomia vagana ai le tulaga muamua. E leai ni avanoa mo le tulaga lona lua poo le matua latalata lava i le tulaga muamua. O le ‘au e manumalo na te maua mea uma ma mo i tatou, e tatau lava ona maua e le Manu Samoa Ta’ito’afitu. E leai ni pe afai poo ni ae peita’i. O e o loo tauivi mo le tulaga muamua o Uruguay, Chile, Kanata, Mexico, Sepania, Rusia, Siamani, Aialani, Hong Kong, Korea i Saute, Sri Lanka, Tonga, Samoa, Zimbabwe, Morocco ma Tunisia. E tusa ai ma le pepa, e aliali mai e matua faigofie lava ona faato’ilalo ‘au ma e te manatu  e mafai e Samoa ona ‘ausia lo laou faamoemoe, ua tatou iloa o le a matua faigata lava. Ae peitai o lea matou te talanoa atu e uiga i le Lakapi Ta’ito’afitu lea e mafai ona tupu ai soo se mea.

O le mea moni-ona pau lava ‘au e tatau ona latou faamata’u Samoa o Kanata, Rusia, Tonga ma i se tasi itu-o Tunisia lea ua aliali mai i le taimi nei-ma faasolo atu ai i Taamilosaga o le Lakapi Ta’ito’afitu a le Lalolagi. Ae peitai-e le tatau ona tatou soona o mamao mai ia i tatou lava. O le mea moni-e le tatau ona tatou faagaloina a  tatou lesona mai tauvaga e agavaa ai ‘au mo le Oceania-lea na faafuase’i lava ona sasa pala ai e Tonga Samoa i le faagasologa o semifinals i Aukilani, ma tatou le maua ai lea avanoa.

Ia ‘aua lava nei o tatou  sese ai uso e, e le’i momoe Tonga. Sa matua fai le latou galuega ma e ono mafai ona avea i latou ma ‘au e tumu i tagata taalo iloga-talu ai le taua o le faailoga ua ofo mai. Mo le vaega toatele o tagata taalo, o le avanoa e avea ai se tasi ma sui o lona atunuu i le Olimepeka o se avanoa lea o le olaga atoa. Ua uma ona tatou vaaia le faatosina o le Olimepeka i nisi o igoa iloga o le lakapi na saini e aofia ai Sonny Bill Williams, Liam Messam, Bryan Habana, Quade Coopea ma Jaryd Hayne talu ai nei lava ma le toatele o isi. O nei tagata taaalo ma latou ‘au e le o mai e tafafao. I aso ua leva, o Niu Silas a avea ma peti e aupito i sili ona malu e manumalo i soo se taamilosaga Ta’ito’afitu. Ae ua le toe faapena. O lo latou tulaga talu ai nei ua fai ma mea e popole ai e ala i se faaupuga faigofie-ae ia ‘aua nei o tatou manatu faatauvaa ia Gordon Tiejens ma ana tama. Latou te iloa lelei le mea o loo latou faia ma e le popole pe ua latou fai se fuafuaga e ositaulaga i le siamupini o le Taamilosaga a le Lalolagi e tausi ai a latou fuafuaga mo le Rio ina ia matua faalilo. Tatou te lei vaaia lava se ‘au Ta’ito’afitu aupito i malosi a Niu Sila. Latou te le’i faailoaina mai lava se latou 12 aupito i malolosi i soo se tasi o tauvaga i lenei tausaga. O le mea ua mautinoa o le taito’afitu ua ia i latou ua afe i luga lima o latou ofu 

Ae peitai ua lava mea ua latou faia mo le taimi nei. I Monaco, o le a avea Tonga  ma faamata’u moni ia Samoa ma e faapena foi Rusia ma Kanata. Ia manatua pea e faapea i le Ta’ito’afitu i Lonetona  i faaiuga e lua o vaiaso ua mavae atu, na matua faato’ilalo e Kanata Samoa ma o lea la ua latou aga’i atu i lea taamilosaga ma le tele o le tulaga mautinoa e faapea latou te mafai foi ona toe fai lena tulaga. Ma o le tulaga o tama a McGrath i le Taito’afitu i Lonetona ua tuua ai tatou ma le anoano o mea e tatau ona tatou talitonu i ai. O lona uiga-o taaloga uma mo Samoa e tatau ona faatatauina o le taaloga faitauina. O le ituaiga lena o uiga e tatau ona ia i tatou. E tatau ona latou matua fia’a’ai lava, e tatau ona latou matua manaomia lea tulaga ma e tatau ona taalo e peiseai o latou ola e faalagolago i lea itu. Atonu e fesili mai nisi tagata poo le a la le aoga o le manumalo i Monaco pe afai e leai so latou avanoa ina ia maua mai ai se pine i le Olimepeka? E leai se aoga o lena tulaga e tusa ai ma lo matou faamaoni. A itiiti mai-afai tatou te agavaa, ua tatou i totonu ma se alaga leo tele. O le fa tausaga o se taimi umi ma a tatou tilotilo i le tuai ma le faifai malie o le atiina a’e o lenei ‘au, e tumu Rio i avanoa uiga ese e mafai ai ona faate’ia le lalolagi.

O le manumalo i le Taito’afitu i Pale i le masina talu ai, ua faaalia ai e faapea ua tulai mai lenei ‘au i le taimi sa’o. Afai latou te faato’ilaloinalenei lenei laasaga mulimuli, o le a latou aga atu loa i Rio e avea ma ‘au faale-iloga e sili ona mata’utia talu ai e maulalo lo latou tulaga ma e le toatele foi ni tagata o tuuina atu ia i latou se avanoa. Ma o se tulaga lelei lea e tatau ona i ai. 

O le atugaluga mo i tatou uma o le leai lea o se tulaga tumau e pei ona tatou vaaia i taamilosaga umi. O taunuuga e matua sili ona faaletonu ma o le faatinoina o le taaloga i Lonetona lea na latou aga’i atu ai mo le manumalo i le Ipu i Pale-i le faia’ina ia latou taaloga uma i vaega ua iloa ai ma tatou masani lava i lea faiga. A tatou tilotilo i le ‘au, faatasi ai ma le faaopoopo i ai o le tagata taalo iloga o le Phoenix Hunapo-Nofoa lea sa le auai i Pale, o le a matua uiga le vaaia pe o le a faa-satauro e McGrath se isi tagata mo ia.

Na manumalo Samoa i le Ta’ito’afitu i Pale i se tulaga lelei e aunoa ma Nofoa. O nisi o latou manumalo e sili ona lelei i lenei taamilosaga e aofia ai manumalo ia Niu Sila ma Fiti lea na tupu mai e aunoa foi ma ia. 

Ua tatou iloa o Nofoa o se tagata taalo talenia faatasi ai ma se malosi e le atoatoa ae sa i ai lava taimi na faaalia ai lona mafaufau tonu ma faaalia ani nai faiga laiti i luga o le malae lea na afaina ai le ‘au. O na itu o le a iloiloina e McGrath ae lei filifilia lana ‘au mo le vaiaso fou. Matou te faamoemoe o le a na faia le faaiuga sa’o.

Mo le taimi nei, ua tuuina atu e le malo i le ‘au a latou faamanuiaga. O lenei ‘Ai Taitoafitu a le Manu Samoa o loo tauaveina faamoemoe o le malo. 

O le Kapeteni o Toleafoa Falemiga Selesele ua na toe maua-ua toe valaauina o ia ina ia tulai mai mo le atunuu i le itula e sili ona ona latou manaomia ai o ia . O se galuega e le ma’alofia. 

Ae peitai-e le faapea e le mafai ona fai. Ma o taui e matua sili atu i lo soo se mea –se’ia vagana ai se taaloga faa-siamupini. O le mea lea-ia tatou galulue faatasi mo le taimi mulimuli e lagolago a tatou tama o le lanu mona ma faamanuia atu ia i latou. O outou mama na!  

© Samoa Observer 2016

Developed by Samoa Observer in Apia