’Aua le tu’u i Ou manatu ma lagona

Tusia Fa’aliliu e Maiava ,

159 Hits

Toe mafaufau tasi lava…Na fesiligia tamaiti-laiti o se a’oga: “Pe o le a lea mea o le fa’atatau po’o le fa’autautaga?” Fai mai  le isi tamaitiiti 6 tausaga “ou te manatu o lagona leaga e o’o ia ‘Oe, pe a uma ona e faia o se mea-sese.”

Oso atu le isi tamaititi 9 tausaga ma fa’apea: “o lau fa’atatau, o se leo lea i totonu o ‘Oe e fai mai ‘LEAI’ pe a e mana’o e fasi lou uso la’iitiiti.” Ae iai se ali’i sa faia se fautuaga i lana uo, i le faiga o se fa’ai’uga. Fai mai a ia: “E tatau lava ona e mulimulita’i i le mea o iai lou mafaufau.

Le mea e pei o se isi tagata la’iitiiti i totonu o ‘Oe, e musumusu atu ia ‘Oe le mea-sa’o e tatau ona fai ma le mea-sese e le tatau ona fai. Pau lava lea, fai le mea e fai atu le tagata la’iitiiti i totonu o ‘Oe e fai.” Na tali lana uo: “Leai, e le aoga la ia a’u.

E fai lava si fa’avalevale o la’u tama’i-tama lea e i totonu!”

Pei o le pese lauiloa i le tagata na mulilua, lea e fa’apea: “Fa’afefea lava ona le- sa’o lenei alofa pe afai e mafanafana ma sa’o lagona? Afai e sese le alofa ia ‘Oe, ‘ou te le-mana’o la ia sa’o!” O o tatou lagona ma manatu, e le-tatau lava ona avea o ni ta’iala sa’o e tau ta’u mai ia tatou le mea tonu ma le mea sese i taimi uma.

Ae talu ai lo tatou fa’alagolago tele i o tatou manatu ma lagona i le tele o taimi, ua mafua ai ona tatou le-mautonu ma le-fa’atinoa o  tatou talitonuga. Ma tele ai ina tatou fa’apea ane, e le-afaina lava pe a sese ma fa’aletonu, ma tatou le-popole ai lava ma fefefe e fa’atino pea sea mea-sese.  

Tusa lava pe e te le-lagonaina lou sese ma lou fa’aletonu, o se matua agasala lava lea ua faia. O se fa’ata’ita’iga: E silia i le ono miliona tagata Iutaia na fasiotia e Hitila i na taimi, talu ai ona o lo latou tupu’aga!

Ae le’i fa’aalia lava sona popole, se lagona salamo pe fa’anoanoa, a mea e sese ma agasala lana mea ua fai. Ai lava o fa’apea a ia, e le agasala ana mea leaga uma na fai, ona e leai sona manatu o se mea sese?

E matua leai leai lava!  E mafai ona tatou faia nai tama’i tala-pelo, pepelo i su’ega i le a’oga, po’o le le-fa’amaoni fo’i i le totogiga o ‘aitalafu, ia po’o sina tama’i faiga fa’aGaoi fo’i. Ae le fa’apea ai la e sa’o lena mea ua fai, pe fa’apea fo’i, e le mafai ona maua ma fa’asalaina ai, ona e la’iititi.

Aua o le mea moni, ua ta agasala lava i le faia o nai na mea sese, tusa lava pe o faia fo’i e isi.  

Talu ai la, le le-tatau ona ta matua fa’alagolago atoatoa i o tatou manatu ma lagona i taimi uma, tatou te mo’omia tele ai Iesu Keriso, e avea ma o tatou ta’iala e fa’aali manino mai ia tatou le mea sa’o ma le mea sese i aso ta’itasi.

Tusa lava la, pe e te le o lagona lou sese i le asō, a’o lea ua e silafia lou sese, i lou soifua lava na o ‘Oe i ou lava ala. Lena e te silafia, e tele au mea sese ua fai: mafaufauga sese fa’apea ‘upu ma fa’atinoga. Atonu o nisi mea sa e fa’apea e le o ni mea sese ona e to’atele fo’i isi o lo’o faia.

Na o le tala lelei lava a Iesu Keriso, e mafai ona fa’amagalo ai lou soifua ma fesoasoani ia ‘Oe e soifua i Ona ala i aso ta’itasi. O le ‘auala moni lea e te maua ai le filemu i lou mafaufau, ma fa’amalieina atoatoa, o le soifua i le ‘auala sa’o ma manuia. Toe mafaufau tasi lava…                                                                                                                 

© Samoa Observer 2016

Developed by Samoa Observer in Apia