Fa’amanatu ia Aleipata, e Fa’ataua le Ola

Tusia Fa’aliliu e Maiava ,

157 Hits

Ia Fa’ataua le Ola: O le fe’au lea sa una’ia malosi e le Fa’alapotopotoga o le Fa’ataua le Ola (FLO) i lana ulua’i polokalame fa’alauiloa mo afio’aga ma alalafaga i lenei tausaga.

O le Polokalame Fa’alauiloa lea sa talimalo ai le Fa’afeagaiga o Etisone Gafa (FS) ma le ‘Autalavou ma sa fa’atinoina i le Maota Tele o le Ekalesia Fa’apotopotoga Kerisiano Samoa i Lalomanu i le Aso Sa.

O le Susuga a Peniamina Tapelu – o se tasi o le Komiti Fa’atonu a le FLO, o le Faufautua fo’i mo le FLO, sa avea ma Fofoga o le Aso. E silia i le 300 sa ‘auai i lea fa’amoemoe e aofia ai tupulaga talavou, o matua ae maise o sui o ekalesia ‘ese’ese – EFKS, Metotisi, Katoliko ma le Aso Fitu, sa lagolago i lea fa’amoemoe.  

O le Fa’atonu o le Fa’ataua le Ola, le Susuga a Papali’i Tiumalu Caroline Paul-Ah Chong, na saunoa e fa’ailo galuega ma le ‘autu o le Fa’alapotopotoga.

O le Tofa a Pei Tau’ili’ili – le Faufautua o le Mafaufau a le FLO, na saunoa i le mata’upu “O se Mafaufau Maloloina Lelei” soso’o ai ma le saunoaga a Alexandria Ah Chong-Nicholas – le Pule o Ta’aloga a Tagata Pasefika i Niu Sila, e uiga i le taua o le soifua maloloina lelei o le tino. 

O le to’oto’o mulimuli o lea po, o le Susuga a Falefatu Enari, na saunoa i le taua o le malosi ma le manuia o le soifua fa’aleAgaga.

Na mae’a to’oto’o o le po, ona alo lea i fesili ma tali e uiga i mata’upu sa talanoaina. 

O le malo-fa’apitoa i lea po, o le tama’ita’i lauiloa o Annie Grace mai Niu Sila, lea na fa’asoa atu i le potopotoga, mea fo’i sa o’o iai lona soifua – i fita ma faigata sa la feagai, ma pese ai loa: “Ua ‘ou filifilia ‘Oe” soso’o ai ma le “Loimata o le Fiafia”, a’o alo lana ‘Au-fa’afiafia, i siva fa’aleAgaga.

O le po lava lea na taua’aoina ai e Reggie Barton o Groundswell, i Ausetalia, se mea-alofa tupe e $4,000.00 mo le Fa’ataua le Ola, lea na talia fiafia le Ta’ita’ifono, o Hans Joachim Keil.

O le Afioga a le To’osavili, Tuatagaloa Joe Annandale – o se tasi o Sui o le Komiti Fa’atonu a le FLO, o le Ta’ita’ifono fo’i o Sa’iliga Tupe – sa fa’alauiloaina fa’apea, o Reggie, o se tasi o lana Vaega mai Ausetalia, o nisi, o tagata e fiafia e fa’ase’e i galu o le sami, a’o nisi o kamuta-aloa’ia na malaga mai i Samoa e fesoasoani mo le toe fa’aleleia o le faletalimalo o le Sinalei Reef Resort, ina ua mae’a le Sunami ia Setema o le 2009.  

Talu mai lena taimi, o lo’o fa’aauau pea ona sa’ili-seleni i latou nei mo Samoa, i tausaga uma i totonu o Sini Ausetalia ma fai-meaalofa ai so’o se fa’amoemoe latou te filifilia i Samoa. O le taimi lona lua lea ua fai-meaalofa ai le Groundwell mo le Fa’ataua le Ola.

Na fa’afetaia e le Susuga a Hans Joachim Keil, Reggie ma le Vaega mai Ausetalia, mo le meaalofa le-‘au-maua mo le lagolagoina o galuega a le Fa’alapotopotoga. Sa ia fa’afetaia fo’i le Fa’afeagaiga o Etisone Gafa, mo le talia-lelei o le Fa’ataua le Ola, mo le fa’atinoina o lana ulua’i polokamale fa’alauiloa e puipuia ai le pule-ile-ola, i lenei tausaga.  

E fa’amamafaina e le Fa’ataua le Ola fa’apea, o le ola, o le mea-alofa mai Le Atua, ma e ao lava ona fa’atauaina e so’o se tagata-soifua ma ia aloa’ia lelei le tino o le tagata, aua o le Malumalu lea o Le Atua Soifua.

Manulauti a le Fa’ataua le Ola: 

1. “Se Mafaufau Maloloina Lelei”

2. “Se Tino Maloloina Lelei”

3. “Se Agaga Maloloina Lelei”

© Samoa Observer 2016

Developed by Samoa Observer in Apia