Le saunoaga ale Afioga ale Palemia o Samoa, Tuilaepa Lupesoliai Sailele Malielegaoi

04 April 2018, 12:00AM

Le Faletua ia Marina, ia faapea foi le nofoaalo, ma Samoa ua potopoto,

O outou paia, sa ma faigata o le a faataalolo.

O le molimau lenei a le tatou Malo, i le soifua galue o le susuga ia Laauli Alan Grey.

O Laauli o se tasi o i latou to’aitiiti na ulua’i filifilia faapitoa e lo tatou Malo e faaee i ai le pine taualoa a le tatou Malo. O mamalu maualuga ia faalupelupe faa-le-malo e aloaia ma amanaia ai se tautua ua maualuga ma maoa’e mo le atunuu. 

O lenei pine taualoa ua faaigoa o le Western Samoa Order of Merit, na tauaaoina i le tausaga e 1993, i le taimi lea a’o le’i suia le igoa o Samoa mai le Western Samoa i le upu e tasi SAMOA, ina ua soloia ese le upu Western ona avea ai lea o le igoa o le tatou atunuu ma Samoa moni ma Samoa moni ai le faalupega o le tatou Malo.

E le’o na ma le laina le sao o lenei tamalii i le atina’e ina o alamanuia o turisi, o i latou ia o e asiasi mai i Samoa. O loo pito maualuga foi lona sao i le faafaigaluegaina o fanau a Samoa, aemaise le faatupulaia pea o teugatupe mo le sologa lelei o le faaulufale mai o oloa eseese e moomia e o tatou tagata. Tupe ia a isi foi atunuu e taulia i na foi atunuu mo le tatou oloa e fia oka ina mai.

O le faagaioina foi o le latou faletalimalo o le Aggie Grey, pau lea o le faletalimalo na tulagaese lona sao i le faalauiloa ina ai o Samoa i le lalolagi, ona sa matuā faaoga ai le ituaiga taligamalo tonu faasamoa, o le faafeiloai o i latou faatoa taunuu i le faletalimalo i fofoga fiafia ma upu masani o le feofoofoa’i ma toe faatofa foi ma faamavae i a’i latou i le taimi o le a tuua ai Samoa faapei o ni mafutaga ua motusia faaleaiga i Samoa, ma atili ai ona iloa faalauaitele i le lalolagi e i latou e asiasi mai ma nonofo mau ai i le Aggies Hotels, le uiga ese maoa’e foi o le tausaafia ma uiga faamasani gofie o tagata i o tatou tagatanuu o Samoa, uiga mafana ia e tupu ai foi ma lagona o e asiasi mai i Samoa ma nonofo ai i le faletalimalo o Aggies. O se siosiomaga fiafia faaleaiga truly a home away from home.

Sa le’i taufaailoa ai lenei atina’e taua i ni faasalalauga faapitoa taugata o tala ave lava tuufofoga a i latou na malaga mai. O latou foi na latou toe faasalalau ina i aiga uo ma e masani le talalelei i le faletalimalo lenei ta’uta’ua ma logologoa ma atili lauiloa ai lenei faletalimalo i atunuu i fafo atu o Samoa, ma ta’uta’ua ai ma le igoa o Samoa. 

O faataitaiga lelei ia e oo mai nei i ona po nei, e le’o mafai lava ona faia e se isi lava faletalimalo i Samoa nei.

O le vaega lua o le soifua o Laauli, o se tagata e loto maualalo tele, ae na oo lava i ai le faatofalaiga a le Komiti o Pine ma Mamalu Taualoa a lo tatou Malo. O le sao lea o Laauli i le faagatama o le lakapi, i le faafailele ina lea o le au a Samoa; le Manu Samoa mai lava i le amataga se’i tau mai lava i le tausaga 1997 ina ua lauiloa lea o le Manu Samoa ua ofi atu i tauvaga lakapi a le lalolagi, faatupe toatasi lava ma tauave e Laauli fitā ma faigatā o le tau faamaopoopo ina o lenei au lakapi a le atunuu, leai lava ma se lagolago a le tatou Malo e pei on ua i ai nei.

Sa faaoga ai lona faletalimalo ma seleni o le pisinisi i saailiga malo a fanau a Samoa, i le faalelea ai lea o le tagavai o Samoa i malae taaalo lauiloa o le Lalolagi.

Ina ua liliu le taaloga e avea ma taaloga faapolofesa i le tausaga e 1997, na taunuu ai ia le iuni i se faaiuga taua tele ua le mafai ona tatou faaauau pea ona faatupe le taaloga lakapi ua taugata tele mo se tagata e toatasi. O le mafuaaga lea na faatau atu ia le Manu Samoa, ma pulea ai e ni alii mauoloa se toalua i Niu Sila Sir Michael ma Fay Richwhite

Ina ua avea a’u ma taitaifono a le Iuni Lakapi a Samoa, ae see ane Laauli e avea ma sui taitaifono i le 1999, sa ma galulue faatasi ai ma lenei foi toa o Samoa e toe faafoi mai le pulega o le Manu Samoa i lo tatou lava atunuu i le mother unio, ina ua matou iloa ua amata ona fealoalofai le au mauoloa ia a Niu Sila, e auai le Manu Samoa i nisi o taaloga faitauina faavaomalo ma e tasi lava le mafuaaga na matou iloa ua gau aano foi nei alii i le taugata tele o le faatupega o le tatou au lakapi, lea la na toe foi mai ai le pulega o le Manu Samoa i le iuni

Ua ou tautomanatu nei pei o le tausaga e 2002 na litaea ai Laauli mai le iuni ona ua le atoatoa le malosi o lona tino ua matua foi. O a’u foi ia pei ua ou tau sela atu ai i le tele o le gaosa o nei mea o lakapi.

O upu faaiu a le tatou Malo e fai lea i le sauniga faaiu i lona olioli saga tumau.

O le tagavai o le Malo lea ua tatala, o le faafeao e Alii o le Malu o le Malo o le sa o le susuga ia Laauli o le toe faalo lea a lo tatou Malo ma le atunuu i le ua tatau i ai le faaaloalo.

Manuia tele lau malaga Laauli, faamaise foi i le faletua ma le aiga faanoanoa.

 

Soifua.

04 April 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>