LAUGA: “Ia taitai le Agaga ma le mana”

Tusia Rev. Petaia Setu ,

616 Hits

Ua tatou tausili lava i le poto. Ua filifili le mamalu ma tulaga aloa’ia. Ua tatou faatuatua foi i le ‘oa ma le lima malosi. Pei o vaaiga ia faanei onapo ua lima taitaiina ai i tatou i a tatou faaiuga ma a tatou filifiliga fai i soo se mea.

E oo foi la i o tatou faiva faatino. O mea ia e faamuamua i o tatou luma. Ia ta’u atu i tagata o oe e poto; o oe e maualuga lou tulaga a’oa’oina. Ia iloa mamao mai i ’o o a’u e malosi, e maua mea; o a’u e maualuga i le faalapotopotoga, i le ekalesia, i le malo! Soo se mea lava la e tapena iai, e taula i kama ia! Ua fai ma faatuatuaga vaivaiga ia! Ae peitai o tapenaga a Paulo ma lana auaunaga, e faatonu, faasino, taitai e le Agaga o le Atua ma lona mana.

E le faigofie faafitauli o Korinito. E le gata i le ekalesia, a o lu’i foi mai fafo atu o le ekalesia. O ituaiga ia e le talanoa i ni mafaufau laiti. O kama ia e felelei lava i luga! E talanoa faa-iunivesitē. Lele ua tele i Samoa nei le mau fia Korinito.

Auā foi o la latou mau, afai e te le i a’oga i Atenai poo Korinito, e te le ’ilafia lava se mea. Afai e le i a’oa’oina oe i le poto faa Eleni, e te le iloa la se pa’upa’u. O le atili faatuputupula’ia lea o le vevesi ma fevaevaeaiga o le ekalesia i mau leo eseese, ona ua oo le sailiiliga ia Paulo poo fea sa a’oga ai a o fea foi na maua mai ai lona tofiga faafaifeau o le talalelei! Tafēfē sole! Se i faauta la outou iai le masasau o fai’ai o Korinito!

E faapena sou mafaufau faa tagata lotu? O le filifiliga lenā o au tagata faigaluega? O lou talitonuga lena i sē ua agavaa e fai ma sa’o e tausia le aiga? O lau vaai lena i se ituaiga tagata e tatau ona faaipoipo ma si au tama? O se tofi tonu la lea o le itumālo? O se mafaufau faapena e mana’o iai le aulotu, le nuu, pulega faale ekalesia ma pulega faale malo?

E le o se faatau fa’i Paulo! O Paulo o le loia; o le a’oa’o; o le faiaoga; o le faifeau. Ae e te silafia, e le i faamuamua e Paulo ia mea. Pe e te loia, faifeau, faipule, pe sa ‘e aoga i Korinito poo Atenai, Oxford poo Harvard, fai mai lava Paulo, o lapisi mea uma na (Fili.3:8) E ā? E mita’i mai ni poto o le mea na faia i Lē na faia mea uma?

O le puna ia o le poto ma le pogai o le malamalama? E le i manatu le aposetolo i sona agavaa ina ua māūa le gasegase o le ekalesia i Korinito. E ui ina e maualuga mafaufau faalea’oa’oga o Korinito ma le poto faa Eleni, ae e le i faaagatonuina i sona silafia faa loia poo sona poto faale lalolagi; ae peitai o le faasino mai e le Agaga ma le mana (f.4). Fai mai Paulo, ou te le iloa se tasi mea ia te outou tau lava o Iesu Keriso, o ia lava na faasatauroina (f.2).

E to lo’u pulou i le agaga solia ma le loto maulalo o lenei auauna. E le i faamoemoe i se lelei o sana lafolafo poo le ‘oa i le gagana ma le poto e momoli ai le mau a le Atua. Na silafia lelei e le aposetolo lona Taiala. E le o le poto o le lalolagi, a o le Agaga o le Atua ma lona mana. Auā o le Agaga ia o le poto uma lava ma le malamalama. O le Agaga o le maopoopo (unity),ma le saolotoga, ma le mafanafana. O le mana o vavega; o le mana e mafaia ai mea uma; e manumalo ai i tofotofoga ma faafitauli o le galuega.

O le papa lea sa taula iai le auaunaga ma faivā manaia o le aposetolo. Na ala ai ona tautua e faapei o se pologa, ina ia faaolaina agaga pologa uma i la le Alii. Na faapei o sē nofo i le tulafono; na faapei o sē vaivai; ma ua avea lava ia mea uma i tagata uma, ina ia ola nisi e toatele mo le Alii i lona faatauvaa ma lona maulalo (I Kori.9:19-23)

Samoa, e le i vale le tōfa ua mătua i le Atua. Pe ana faafetaui e le aposetolo Korinito i sona poto faale tagata, po ua tupu tele le leaga. Peitai o le galuega a le Agaga sa taitaiina ai le aposetolo i upu ua iai le poto ma le mana o le Atua, ua fulitua ai i le faa Korinito, ae toe foi ia Keriso. Viia le Alii!

Pe iai ea se mea ua faigata i le Alii? A o se ā se tali mai le Atua ua le faamălieina ai oe? Samoa, o fesili ia ou te manatu e fesootai ma vaivaiga o loo toilalo ai le faa Iutaia ma le faa Eleni. La lea ua le ’alo le aposetolo ae ua faatonu ma faailoa le moni. E leai se mea e faigata i le Atua auā o le poto o le lalolagi o le valea lava lea i le Atua (I Kori.1:20). E le mafai foi ona faamălieina oe auā ua e manao i ni faailoga mai le Atua e lagolago i au mea sesē o fai.

Ua le atoatoa lou loto i le Keriso na faasatauroina , auā ua le o le satauro lou loto a o lou lava poto. Ou te toe faamanatu atu le upu sa ou mua’i tā’ua i se tasi o a’u lauga talu ai.O le tatalo a se tasi tagata e faapea, “Le Atua e, ia fai oe ma Nila, ae fai a’u ma filo” Afai e muamua le Atua i mea uma, e leai lava la se mea tatou te popole ai.

O le a mafai ai foi ona tatou vaai tino i le mamalu ma le silisili ese o le Atua e faaalia i lona mana. A ta’ita’i le Agaga i ou tiute ma lau galuega, e te lagonaina lava le māmā ma le faigofie o mea uma. E te lagona lou saoloto. E te ola fiafia i se olaga mamā, fiafia mamā.

Ua ou iloa e le ’alofia lo tatou ola e ma’i  ma puapuaga o le olaga. E le ‘asa foi faafitauli ma togafiti poto a le alii o lenei lalolagi. O loo tuliloaina pea i tatou e vaivaiga o le olaga ma mailei a Satani. Ae afai ua ‘au ma i tatou le Atua, o ai sē faasaga tau mai ia i tatou? (Rom.8:31) Samoa pele e, ia malamalama ou mata.

O aso nei ua leaga. Savali i le moa o le ala. Mulimuli i le Nila. E faasino mai e le Agaga ma le mana lou olataga. Ia le faasesēina outou e le poto o le lalolagi.

A ia e faautauta  ma faalogo i le Agaga, ina ia le faatuatua outou i le poto o tagata, a o le mana o le Atua. (Sal.118:8,9) Ua faapea upu o le pese a se tasi faifeau misionare sa galue i Samoa o J.Mathieson, “Iesu e, o lou poto mai lugā, ua na o lea e aoga.” O le poto mai lugā e alofa; e faamaoni; e mamā; e anagatā. O le poto lea e pulea ma faatonu e le Agaga. E faaalia ai foi le silisili ese o lona mana. Auā e natia i e atamamai, ae faaalia e le Atua i tama valevale (Mata.11:25). Samoa e, o la le perofeta o Ieremia, E lelei ona faamoemoe ma le faalologo i le olataga mai ia Ieova (Aue.3:26). Ioe, faalogo i le Atua.

Ia avea le Atua ma Faatonu Folau o lou olaga. Auā e gase ia te ia matagi . E to’a ia te ia le āu peau. E mavae ia te ia ma’i ma tiga uma lava. E faaumatia e ia Satani ma ana ‘au. E tu ia te ia le ekalesia. O le ola Ia o oe ma lou aiga.

’Aua le soona masau i le poto o le lalolagi ma le malosi ua ia te oe auā e faaumatia ia. A ia ta’ita’i ma faatonu le Agaga ma le mana o le Atua ia te oe e te ola mălie ma ola manuia ai. E maopoopo ai aiga ma fealofani ai fanau. E sa’oloto ai le atunuu ma ēa ai le ekalesia. Talia le Agaga  o le Atua Soifua e ta’ita’ia oe ma lou aiga i lenei tausaga.

 

Amene

7737063/7783782 

© Samoa Observer 2016

Developed by Samoa Observer in Apia