Maua e fanau-a’oga lesona aoga mo le ola

309 Hits

TA’ITA’I – ULU MO TAMA MA TEINE A’OGA: Vensel Margraff ma Christine Peters

TA’ITA’I – ULU MO TAMA MA TEINE A’OGA: Vensel Margraff ma Christine Peters

Ripotia e Vatapuia Maiava

Fa’aliliu e Maiava

 

O le Aso Lua o le vaiaso nei, na maimoaina ai e fanau-a’oga ma faia’oga o le A’oga Maualuga a Robert Louis Stevenson, le ata-tifaga fa’aSamoa ua talanoa tele e le atunu’u, le ‘Three Wise Cousins’.

Na fa’ailoa e le Tama’ita’i-Pule o le A’oga, o Masa Fa’asau, o le fa’atatau e alu se matamataga i lea ata Samoa, na laga’ia e le Vaega o le Gagana Peretania a le A’oga. 

 “E iai le vaega o feso’ota’iga ma fa’asalalauga a matou vaega lea mo le tausaga 12 ma le 13 ma na manatu ai, o se fuafuaga lelei e ‘ave iai nai tamaiti-a’oga,” o le fa’aaliga lea a le tama’ita’i-pule.

“O le ala lena na o’o mai loa lava le talosaga, o’u fa’amaonia loa ma e fa’apena fo’i ona malilie iai le Komiti aua e tele mea-aoga ma uiga lelei e a’oa’oina ai fanau i la tatou aganu’u.”

E talitonu fo’i Masa, e taua tele le fe’au o lo’o momoli mai le ata e mafai ai ona lagona ma a’oga mo fanau.

 “Ou te manatu o le mafuaga tonu lena o le naunau fiafia iai o le fanau-a’oga,” o le saunoaga lea a le tama’ita’i pule.

“O le mea moni lava, o fa’afitauli ia o lo’o feagai nei ma tamaiti i le vaitau lenei”

E le gata la i le malie o le ata, a’o le fe’au o lo’o afifi mai totonu o le ata, e selau pasene i le matau a le pule-a’oga.

“O se ata manaia tele, e manaia le tala ma le ‘autu, e malie ma faigofie fo’i ona malamalama iai. O ata fa’apea e mo’omia lava e tupulaga i nei aso,” o le fa’aaliga lea a Masa. 

 “’Ese le manaia o le ata aua o lo’o fa’aalia ai tupulaga o nei aso ma vaega o le tatou aganu’u o lo’o vaivai ai ae maise fo’i la, le aloa’ia lelei ma fa’aaloalo i la tatou aganu’u fa’aSamoa.” 

Na ta’ua fo’i, ina ua mae’a le tifaga, na molimana’o ai faia’oga mo nisi ata-tifaga fa’aleA’oa’oga fa’apei o le ‘Three Wise Cousins’.

Mo le Ta’ita’i-ulu mo Tama, le Ali’i o Vensel Margraff, o le ata lea ua manino ai ma malamalama i le tele o vaega o le aganu’u e taua tele ma aoga mo le aga’i i luma o le olaga. 

“Sa ‘ou fa’apea lava o matua loloto se fe’au fa’aleAganu’u o momoli mai e le ata,” o le fa’aaliga lea a le Ta’ita’i-ulu.

 “E tele naunau a’oa’oga lelei e pei o le ‘ave o le fa’amuamua i o tatou aiga, ae maise fo’i le sao taua o tina i totonu o aiga ta’itasi,” 

Na ta’ua fo’i,  e talitonu o se ata manaia tele ona e le gata e malie, ae tele fo’i a’oa’oga fa’aleAganu’u o lo’o fa’aalia ai, e fa’alauiloa atu ai fo’i Samoa i le lalolagi. 

“E fa’aopopo ai fo’i ma si’tia le igoa o Samoa, o se tasi o parataiso ona o a tatou aganu’u ma agaifanua.”

E fa’apena fo’i le molimau a le Ta’ita’i-ulu mo Teine, le tama’ia’i o Christine Peters.

“E matua tele lava a’oa’oga aoga o le ata – pei o mea nei o tupe, e le fua mai ni la’au atoa ma le talia fiafia o mea ua foa’ina i ou a’ao,” o le fa’aaliga lea a Christine.

“Ua iloa ai fo’i le faigata o le olaga i aso ta’itasi mo tagata Samoa ma ua iloa ai fo’i le tele o vaega o le tatou aganu’u e tatau ona malamalama lelei iai matou nei o tupulaga,” 

Ae na fa’ate’ia le ta’ita’i-ulu ina ua fa’alogo, i le ‘la’ititi o le seleni sa amataina ai e le Fa’atonu o Stallone Ioasa  lenei ata ae maise le faigata o le taumafaiga o lea ata ua fa’alauiloa atili ai Samoa.

 “’Ou te matua ofo lava i le mafai e le Fa’atonu ona fa’asoasoa lenei 80 afe tala e faia ai se ata mata’ina ma manaia fa’apea,” o le fa’amatalaga lea a Christine. 

“Manaia le ‘aumaiga o le aganu’u ua a’oga tele fo’i mo matou uma,” o le fa’aaliga lea a le Ta’ita’i.

© Samoa Observer 2016

Developed by Samoa Observer in Apia