Fa’asaoina se fuafuaga o Maliega Tau Faigafaiva

04 March 2016, 12:00AM

Fa’aliliu e Maiava

 

Lea o le a toe amata ona fagotaina le tuna e va’a-fagota Amerika, i totonu o le Pasefika, e fa’afetaia ai se “taumafaiga ‘ausia-gata” e malo o motu o le Pasefika. 

“’Ou te fa’afetaia Motu o le Pasefika ona o le tausisia pea o le latou mau e galulue felagolagoma’i ma tutu-fa’atasi e sa’ili ni fofo mo se fa’afitauli ua ‘au-ato atu iai ona o fa’atinoga a isi, e pei o le fa’afitauli o va’a-fagota tuna a Amerika,”o le fa’aaliga lea a le Fa’atonu Aoao o le Vaega mo Faigafaiva a Malo o le Pasefika, o James Movick.

O le toe amataina o faigafaiva a va’a-fagota tetele a Amerika i lalo o le Maliega, na mafua ona o le gaioiga fa’afuase’i a le Iunaite Setete i le fa’ai’uga o le 2015, na talosagaina ai se fa’aitiitiga o taimi e fagogota ai i ogasami a le Pasefika i le 2016, e ui i se maliega sa faia muamua ia Aukuso o le 2015.

E tolu aso na fono ai Malo o le Pasefika i Nadi i le amataga o Fepuari, e talanoaina le talosaga lea a le Iunaite Setete, ma o le Aso 9 o Fepuari na toe suia ai fo’i lea tautinoga, ua fa’aitiitia atili ai aso ma taimi mo va’a-Amerika. Sa ‘auai Samoa i lea fonotaga.

O le fa’apa’uina i lalo o aso fa’ataga, ua fa’aitiitia ai le tupe e totogi e Amerika mai le 90 miliona tala Amerika i le na o le 66 miliona.

O lea o le a toe fetu’una’i nei e Malo o le Pasefika lea fuafuaga sa faia muamua, ma taumafai e tau fa’atau atu aso o le a le-fa’aaogaina i isi va’a-fagota e aofia ai o latou lava tagata e ui, e le tele se tupe e maua mai ai pe a fua i le tau sa malilie iai ma le Iunaite Setete, talu ai, o lea ua amatalia le tausaga o fagotaga.

“O le vaiaso talu ai na matou maua ai se fa’aaliga aloa’ia, e fa’ailoa mai ai le talia e le Iunaite Setete o aiaiga fou mai malo o le Pasefika, peita’i e iai ma se talosaga mo se suiga la’ititi mo le fa’ata’otoina o totogi, ina ia ta’i-tolu masina ma fa’atino,” o le fa’aaliga lea a le Fa’atonu Aoao.

Sa tu’uina atu lea fuafuaga fou i Motu o le Pasefika mo le fa’amaoniga, aua e fa’ateleina ai fa’afitauli ma faigata e feagai ma motu o le Pasefika pe a fa’aletonu va’a-fagota Amerika i le tau totogiina o le tausaga atoa. 

“O le ioeina fa’atasi e motu o le Pasefika o lea fuafuga, o lo’o talotalo ai atonu o le fa’aitiitia o aso-fagota fa’atasi ma fuafuaga tau totogi ua fa’ata’oto nei, o le a fesoasoani tele e ‘alofia ai lea tulaga.”   

 “Ua anoanoa’i le mau tapenaga ma taumafaiga e le masani ai i le tau tu’ufa’atasia o finagalo o malo e 17 o le Pasefika, lea ua malilie uma ai e talia le toe iloiloina o le talosaga a le Iunaite Setete o Amerika.

“Na manino le mana’o o Malo o le Pasefika ina ia vave fai o se fuafuaga mo faigafaiva i le 2016 ae maise le le-mautonu o seleni e ono maua ma vave afaina ai loa i lu’itau ogaoga ua feagai nei. O se lesona e ao ona tulimata’i ia le toe tupu i le lumana’i,” o le fa’aaliga lea a Movick. 

Na fa’atuina e Minisita o Faigafaiva a le Pasefika, se Vaega Galulue e aofia ai Ofisa o Faigafaiva ia Oketopa talu ai, e silasila i nisi ‘auala talafeagai mo ni faigafaiva tu’u-loloa i lalo lava o le Maliega ua mae’a sainia.

04 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>