O LA’U TALA FO’I

133 Hits

1. Matauina i Tala Fou le tele o manatu faaalia e uiga i le faiga-palota lautele taeao-aemaise ai foi o valoaga a isi-aemaise ai o le faaupuga fai mai o lea ua lafo atu i le Atua! E aliali mai la i nei faaupuga-o lea foi ua fai mai e tu’u i le Atua…….! O le fesili la-‘o le a le mea lea ua tuu ai i  le Atu? O le faaiuga o le Palota poo le a? E ofo le loto i nei faaupuga!

O le pogai-afai nei o le a fai e le Atua le tonu-ae nofo le tagata ma toe faapi’o ona o faiga tau polokiki-o se Atua la fai mea pi’opi’o? Ua o’o lava i nei mea o polokiki leaga o ta’u ai lava se suafa o le Atua! Afai sa e galue ma le tiga mo lenei faiga-palota ma e finau e tusa ai ma le amiotonu a le Atua-ona fai lea e le Atua le faaiuga tatau mo oe! Ae o le nofonofo i le 5 tausaga atoa e le o’o i se nuu ma le itumalo-ae faamoemoe e manuia i le faiga-palota-ia tailo la pe o se mea tau le Atua lena mea pe leai! Ia manatua lelei-e matua ese lava le filifiliga a le tagata ma le filifiliga a le Atua-leaga e silasila le Atua i le loto o le tagata ona faatino lea e le Atua mea uma! O le a sou taofi?

2. Matauina foi i Tala Fou le viia ma le faafetaia e se tasi alii o le fuafuaga a le Tautua Samoa Party mo le siitia o le totogi aso aupito itiiti. Afai la ua viia e lea alii le fuafuaga a le Tautua Samoa-o lona uiga –o se tasi lea o alii na te faamaonia ma ua tofo i le tulaga mativa ua i ai nei le atunuu atoa. Afai la o le fuafuaga lea a le Tautua Samoa Party-o lona uiga-o se mea lea-afai e tino mai-o le a matua fesoasoani tele i tagata matitiva o le atunuu –talu ai le taugata o le tau o le soifuaga- talu ai le su’e o tupe a le malo i ola o tagata e ala i le VAGST ma le isi anoano o tului! Afai la ua faafetaia e lea alii le fuafuaga a le Tautua Samoa Party-o lona uiga-ua matua talitonu lava o ia-o se fuafuaga lea o le a maua ai se fesoasoani mo le tausiga o lona aiga ma manuia ai Samoa atoa! ! O le a sou taofi? 

3. Matauina foi i Tala Fou fai mai ua tafi ese poo ua faate’a e le afioaga o Sili i Savaii le Sui Usufono o le Palemene ma o le Minisita muamua foi o Tupe-o Faumuina Tiatia Liuga.

E tusa ai ma se faasalalauga a le Leitio a Niu Sila anapo, ua mafua lea faate’aina ona o le faaiuga a le Faamasinoga lea na faaleaogaina ai le avea ma sui faatu o lea nuu-o Le Tagaloa Pita-ona o le leai o sana monotaga i le nuu. Fai mai ua faapea foi ona faate’a ma le Pulenuu o Sili-talu ai lana molimau na lagolago ai le tagi e faasaga ia Le Tagaloa Pita. O lea la faate’aina  o lē  sa avea muamua ma Minisita faatasi ai ma le Pulenuu-ua tapu ai mai lo la nofoia pe toe tu-vae i totonu o le nuu! E sa’o la le faaiuga a le afioaga o Sili pe leai? O le a sou taofi? 

4. Matauina foi le manaia o finagalo faaalia o le atunuu e tusa ai ma le faiga-palota. O le manaia la o lea ulutala-ona fai mai-“O la’u palota, o la’u aia tatau, o lo’u leo” A tuu la i tulaga faa-ona-po nei- e ma’eu le poto ma le atamai o loo faaalia i ia upu e pei ona tusia i luga. Ae o le fesili-e faapefea pe a tuu atu se teutusi i lou lima ae lei tatalaina le fale palota? O fea la e ave i ai lau palota? O ai a foa’i i ai lau aia tatau? O ai o le a foa’i i ai lou leo? O le a sou taofi?

© Samoa Observer 2016

Developed by Samoa Observer in Apia