Lauga - “O Keriso o le faamoemoe i le manuia”

Tusia Rev. Petaia Setu ,

1118 Hits

Rev. Petaia Setu

Rev. Petaia Setu

O gafea  o ou autafa faaletagata soifua o taoto ai faamanuiaga? A o mafai e lou siomaga ona utufia lou gālala? O le filosofia faa Eperu, e afua mai mauga manuia o nuu. A o le tofa faatumutumu mauga, “ua ou iloa manatu ua ou manatu ai ia te outou; o manatu o le manuia, ae le o le malaia; e foaiina atu ia te outou le iuga e iai le faamoemoe” (Iere.29:11). La lea ua auiliili e le aposetolo i lana tusi nei i le ekalesia i Kolose, o Keriso, O MEA UMA I MEA UMA. O le faamoemoe ola lea. O Keriso o le faamoemoe i le manuia.

O tusi ia e lua o Efeso ma Kolose sa tusia e Paulo i le taimi o faafalepuipuiina i Roma. E foliga tutusa tusi nei ae eseese a la faamamafa. E faatāua i le Efeso le au faatuatua poo le ekalesia, “o le tino lea o Keriso.” Ae faamamafa e le Kolose le “Ulu” o le tino, o Iesu Keriso lea. E tāua uma ma manaomia. Auā e le mafai ona iai o le tino e aunoa ma le ulu, poo le ulu foi ae le iai le tino. E mafai ona e maitauina lelei le mea nei pe a faitau atoa i le Tusi nei o Kolose, “Keriso,” “Keriso” “Keriso.”

O Keriso, o le faamoemoe lea o le Atua mo le tagata agasala ina ia faaolaina. O le Tōfā lea a le Atua mo lou saolotoga. Tatou te le maua lava i o tatou autafa faale soifuaga nei ni  lelei e laveaiina ai i tatou ma lima taitaiina ai a tatou fanau i manuia o le Atua; na o Keriso (Ioane.14:6). O mea uma e a le Atua. O lelei uma e mai  le Atua. Ae a le maua Keriso, e te le maua se olaga faamălieina.

Ua sao mai totonu o le ekalesia i Kolose manatu leaga ma aoaoga sesē, ua taitaiina sesē ai le talutalu fou o le ekalesia. E fā’i o le poto fou e pei ona a’e faataifana’e i nei ona aso, a o le matamataita o Iutaia i ana aga masani ma faiga faavae o ana tapuaiga faa Iutaia. Ua taumafai ai e tulei ese le Keriso mai lona tulaga ma lona nofoa, o le Taitai, o le Ulu o le tino; o le Ao o le Ekalesia. E pei lava foi o a tatou faiga ma aga faa Samoa i totonu o aiga, nuu, faalapotopotoga eseese, ekalesia ma le malo.

E iai a le kegi o loo taumafai e faasesē isi tagata ona o vaivaiga masagi o le olaga. Ua manatu la Paulo e faailoa manino le tulaga Atua o Iesu, ma lona Aoao i mea uma lava. Auā o le faaletonu o le ekalesia, ua le tumau i le Alii, ua tu faa’afa’afa tagata. Ua le maua’a le faatuatua i le Alii. Ua lilo ia te i latou, o le Keriso lea, ua le gata o le ‘Ulu’ o le ekalesia, a o le Faatumutumuga ia o mea uma lava.

O manuia ia sa valo’ia. Fai mai Ieremia, e foaiina ia te outou le iuga o le faamoemoe. Ua tautala le perofeta i manuia. A o le faamoemoe, o le Alii ia o Keriso. O le taunuuga lea o fuafuaga a le Atua mo le tagata talitonu ma faatuatua. Peitai, ua le mafai ona iloa lelei i le loto o le tagata, le Keriso ua faa-Ao iai le ekalesia. 

O Keriso, sa iai lava i le amataga a o le i iai se mea. O le silisili ese lena o Keriso, e muamua i mea uma, e mătua i mea uma, auā e ulumatua i mea uma ua faia (f16). Fai mai se tasi toeaina, o le mătua o lou soifua poo le tele tausaga o lou olaga, o le tele foi lena o mea e te iloa. Se a la se mea ua lilo i le Alii? Ae faapefea ona e faa tulaga le mătua o Keriso i lou olaga? Poo e iloa o le talalelei lea sa lilo, o faamanuiaga ia Keriso?

Samoa e, e manaomia Keriso i lou olaga. O le iai o Keriso i totonu ia te oe, o le atoatoa foi lena o lou fiafia. Fai mai Paulo, ua le o toe ola a’u, a o Keriso ua ola totonu ia te a’u. O le olaga lea o le kerisiano. Le olaga ua malamalama i le uluai o mea uma. Ua talitonu i le Keriso o le foafoaga. Ua iloa le itū Atua o Keriso.

O le Mataisau o mea uma, o lē ua tatou maua ai le togiolaina i lona toto, ma soifua pea lava ia i totonu ia i tatou. O le Keriso lea o loo tautala ai Paulo. E maualuga lona nofoalii, e tafe mai ai faamanuiaga o le tino. Na te foeuliina le tino, o le ekalesia lea. E manino ai mea uma. E maopoopo ai itu tino taitasi  uma. E fealofani ai le aiga o le Atua. E taula iai le faatuatuaga o le ekalesia.

O manogi ia o le talalelei. A o nanamu o le upu lilo sa natia, auā ua silisili ia ona lelei, o Iesu Keriso lea. O le faamoemoe ua saunia. O iai le ola ma le manuia. Se a se malosi o i agelu? A o le a se lumanai o i le faamamaluina o tu ma aga faa tapuaiga faa Iutaia? A o fea o iai lau faamamafa, o le Keriso poo oe? Ua fia ni ekalesia o fetaua’i ma fevaevea’i ona ua fia ulu le siusiu? Ua fia ni galuega poo ni aiga ua malepelepe ina ua faumalo le tino?

Le atunuu e, o fea tonu o loo taoto ai le faamoemoe o le Atua mo oe? O loo tulituliloa e fesili uma nei le faapogai ma le autu o lelei ma faamanuiaga. Mai fea manuia o loo a’oa’oina ai le ekalesia i Kolose? O le talalelei. O Iesu Keriso lea. O le ulu lea, ua manatu Paulo e tatau ona maulalō ona tuu iai o a’a o lou faatuatua. Faavae ai ma ia mausalī, ma le lē faateaeseina o outou i le faamoemoe o i le talalelei. 

Samoa e, poo ai o fai ma Keriso i lou aiga? Ae fia ni ulu o loo fefālōa’i ai le tino? Ia manatua Samoa, o le faamoemoe i le manuia, o loo i le ulu o le ekalesia. O ia lava lea o loo talaiina atu, ma apoapoa’i atu i tagata uma, ma a’oa’o atu ai i tagata uma, i le poto uma lava. Le poto e manino ai i le atoatoa o Keriso. Ioe, o Ia o Mea Uma o Mea Uma. O faamanuiaga ia i mea uma. Auā ua matala ia Sega le Faapolopolo a le Atua mo tagata uma, o Iutaia atoa foi ma nuu ese. 

Le ekalesia e, e utuvai ia te oe le atunuu ma ona tagata. O le ā lau e ta’u atu? O ai e te molimauina? A o fea e tu ai oe? E te tumutumu mauga pe e te auvae mauga? O ai o fai ma ou malosiaga? O ai o save’uina lou tagata i totonu? E le lua ni ulu. E le o oe foi o se ulu, aea?

A sa’o ona tatou tuu Keriso i lona tulaga tonu, ona olioli lea o aiga. Ona fealofani lea o nuu. Ona saga tonu lea o pulega uma. Ona faaeaina lea o le ekalesia i lana mau. Ae mafai la faapefea ia mea ona fai? Fai mai Paulo, pe afai tou te tutumau i le faatuatua o faavaeina ma mausalī. Ia maua’a outou ma ia atiina a’e ia te ia, ma ia faatumauina i le faatuatua. O le faamanatu Samoa, o Keriso o loo ia te outou, o le faamoemoe i le manuia.

 

Amene.

 

7737063/7783782

© Samoa Observer 2016

Developed by Samoa Observer in Apia