Lapata’i e leoleo faiaoga

Tusia Deidre Tautua-Fanene ,

47 Hits

Alii leoleo Satini: Samia Iosua Samia ma Minisita o Aoga: Loau Keneti Sio.

Alii leoleo Satini: Samia Iosua Samia ma Minisita o Aoga: Loau Keneti Sio.

Ua tu’uina atu nei e le Matagaluega a Leoloe se lapata’iga mo faiaoga i le toe amataliaina ai o lenei tausaga fa’alea’oa’oga.

O le fa’ao’olima lava o le fa’ao’olima mā e leai lava sesi itu e silasila i ai le matagaluega. 

E le taliaina e le matagaluega nei uiga e fa’asaga i tatou fanau.

  O lenei lapata’iga sa auala mai lea o le malu o le malo le ali’i Sinia o Samia Iosua Samia i lana saunoaga sa faia lea i le fonotaga a faiaoga ma puleaoga lea sa fa’atautaia i le vaiaso na se’i mavae atu nei.

Sa ia fa’ailoa fo’i e ono molia so’o se faiaoga lava e maua o lo’o faia nei uiga.

“O nei faiga masani o lo’o i lalo o le tulafono,” o lana saunoaga lea.

“E ui lava o uiga masani ia sa tatou omai ai o le mafai lea e le faiaoga ona sasaina fanau aoga i taimi o aoga, ae o le taimi nei ua lē o toe fa’atagaina.

“Ae i lalo o le Tulafono o Soligatulafono 2013, Vaega 10 Fuaiupu 123 o lo’o manino mai ai  o le fa’ao’olima, o le pa’i lea i se tagata ma le fa’amoemoe e fa’atino ai ni sauaga, e a’afia ai pe manu’a ai lona tino ma ona lagona faaletagata.

“O le fa’aaogaina o le malosi o le tino ma le fa’amoemoe e fa’atino ai le po, tu’i, kola le ofu, tulei/ una’i/ toso, a’a pe kiki i le vae, sasaina i se meafaitino, togi i le ma’a po’o se isi mea faitino....ma isi.

Sa ta’ua fo’i e le ali’i sinia e ao i faiaoga ona va’ai nisi metotia, po’o nisi auala e a’oa’i ai le tamaititi aoga.

“O le auauna e lava lana tofā ma le utaga, o le tagata alofa, onosai ma lava papale.

“O le tagata ua mausali ma lava lona a’oa’oina, ua sauni e fo’ia fa’afitauli o tamaiti po’o fanau aoga ma ua mae’a tapenaina atoatoa i metotia, po’o auala e tali ai fa’afitauli.

“Ua lava fo’i le fa’akerisiano ma ua ia te ia le Ali’i.”

Sa ta’ua fo’i e Samia o nisi faiaoga e omai lava ma latou fa’afitauli mai o latou aiga.

“O la’u lu’i i a te oe faiaoga, toe siaki lou tagata ae e te le’i ulufale atu i totonu o le potu aoga.”

O le lapataiga mai le alii sinia e le’i fa’apitoaugafa i na’o faiaoga.

Sa ia talosagina fo’i puleaoga fa’apea ma faiaoga ina ia fai fo’i le latou pitola’au o le lipotia atu lea o fanau aoga e le’o o’o atu i le aoga i le Ofisa o leoleo.

“I lalo lava o le tulafono, e mafai e le matagaluega a leoleo ona faia ni moliaga e fa’asaga i matua o le fanau pe afai e le’o tu’uina atu o latou alo i le aoga,” o lana saunoaga lea.”

Sa ia saunoa fo’i o le galuega e faifa’atasi auā le alualu i luma o le olaga fa’alea’oa’oga a le fanau.

O lenei matāupu o se matāupu ma’aleale.

I le tausaga na se’i mavae atu nei sa fa’ailoa mai ai e le Minisita o Aoga, Ta’aloga ma Aganuu, Loau Solamalemalo Keneti Sio e fa’apea o lo’o taga’i le malo e toe aumai i totonu le fa’atagaina o le sasa i totonu o aoga ona o le tele o fa’afitauli sa tula’i mai i le va o aoga.

Sa ia fa’aailoa fo’i o se fuafuaga o lo’o va’ava’ai ai le malo ae e le’i fa’amautuina, pau le tulaga o lo’o i ai o le va’ava’ai lea o se fofō o le fa’afitauli.

“Mo le tou silafia, i aso la ua mavae a’o fa’ataga le sasa, e le’i i ai ni fa’afitauli fa’apea na tula’i mai,”o le saunoaga lea a le Minisita.

“O lo’o ta’ua mai fo’i i le Tusi Paia le aoga o le sasa i le tamaititi.

   “E tiga, ae a vaava’ai mai i nisi o matou i le taimi nei, ua manuia olaga ona o le aogāo le sasa.”

Sa fa’aalia e Loau o lo’o taga’i le malo i le itu lea ona o le tele o fe’ese’eseaiga o lo’o tula’i mai pea i le va o aoga.

“O lea e tilotilo le malo i ni auala e fo’ia ai nei fa’afitauli,” o lana saunoaga lea.

“O le taimi nei o lo’o taga’i ai le Ofisa o le Loia Sili ma isi matagaluega a le malo pe alaga tatau ona toe aumai le tulafono lea o le fa’atagaina ona sasa o tamaiti.

“E le’o se matāupu faigofie, e tatau fo’i ona tatou tilotilo i le a’afiaga pe afai ae toe fa’atagaina le sasa.”

I le manatu o le Minisita sa ia ta’ua ai o lesi lea fofō o le fa’afitauli.

“O le a’oaiga ma le sasa o mea ia e lua sa matou omai ai matou ia,” o lana saunoaga lea.

“E tatau ona tatou tilotilo i itu e mafai ai ona fo’ia lea fa’afitauli, ae tatau ona tatou tilotilo fo’i i le a’afiaga o le a i ai lea i nai faiaoga fa’apea ma tamaiti aoga.”

© Samoa Observer 2016

Developed by Samoa Observer in Apia