Ta’imua le Palemia e fa’asao le si’osi’omaga

246 Hits

FA’ASAO LE SI’OSI’OMAGA:  Le Afioga a le Palemia o Samoa, i le taimi o lana saunoaga na tatala ai le Aso Fa’apitoa mo Fanua ma Nofoaga Vailaloa

FA’ASAO LE SI’OSI’OMAGA: Le Afioga a le Palemia o Samoa, i le taimi o lana saunoaga na tatala ai le Aso Fa’apitoa mo Fanua ma Nofoaga Vailaloa

Ripotia e Vatapuia Maiava

Fa’aliliu e Maiava

 

Na pulunaunauina e le Afioga a le Palemia, Tuila’epa Sa’ilele Malielegaoi le atunu’u aoao, ia saga’i ane e fa’atino lelei le puipuia ma le fa’asoina o fanua ma nofoaga vailaloa.

O vaega ua ta’ua o nofoaga vailaloa, o fanua ia ma ‘ele’ele e vaia i le tele o taimi, po’o ‘ele’ele fo’i e vaia fa’asoloatoa, pe na o nai taimi ma ua avea ai o vaega-‘ele’ele e e tulaga ‘ese ai mai isi nofoaga masani.

 “E tele vaega e fa’alagolago lo latou ola i nofoaga nei e aofia ai vao ma la’au o le sami, o manu ma i’a,” o le fa’aaliga lea a Tuila’epa. “A o se tulaga ua fa’apopoleina ai, le va’aia pea o nei nofoaga ma fanua vailaloa ua tele ina fa’aleagaina ona ua le tausia ma va’aia lelei.

“O nisi nu’u ua fa’alalo la’au mo le fausia o fale, o nisi ua lafoa’i iai lapisi i nofoaga vailaloa nei ma avea ma tulaga ua afaina ai fa’aleagaina le ola o fa’alagolago iai.  

 “A fai ma masani le lafoa’i  o otaota ma isi gaosa i o tatou vaitafe, e tafe atu ma avea ma fa’atiga-mata i tagata femalagaa’i. Ua tatou va’aia le mau atigi-fagu-pa’u o salalau solo i luga o ma’a i ‘autafa o vaitafe.

“E tatau ona tatou tausia mama o tatou fanua-vailaloa ina ia fa’aauau pea ona fa’aaogaina e le mamalu o le atunu’u o lo’o fa’alagolago i puna’oa nei mai vaitafe po’o le sami fo’i.”

O le Aso Lua na tu’uina mai ai le lapata’iga lea a le Ali’i Palemia, i le fa’amanatuina e le atunu’u o le Aso Fa’apitoa mo le fa’atauaina o Nofoaga ma Fanua Vailaloa a le Lalolagi sa faia i Togitogiga, lea sa fa’a’autu “ O Nofoaga Vailaloa mo lo Tatou Lumana’i;  Soifua Manuia.” 

Na mae’a le sauniga aloa’ia, ona alo lea i le totoga-la’au, o fa’afiafiaga fa’aleAganu’u fa’apea tauvaga o tusiga-solo a tupulaga talavou mai Falealili ma Si’umi sa taualuga ai le fa’atauaina o lea aso mo fanua-vailaloa.

O le aso fo’i lea na aloa’ia ai le Nofoaga Puipuia ‘O le Pupu-Pu’e, e avea  ma Nofoaga Vailaloa Lona Lua i Samoa ua aloa’ia Fa’ava-o-malo, ua fa’atauaina ai le fa’ananau a le malo ia tausisia, puipuia ma fa’asaoina ona puna’oa mo le lumana’i manuia o ona tagata.

“Ua manatu le malo, o le nofoaga lenei i Samoa nei, ua tatau ona puipuia ma fa’asaoina e le lalolagi aoao talu ai, o le nofoaga tonu lenei o lo’o iai le vai ma o le to’atele o tagata o lo’o fa’alagolago i le nofoaga lenei mo le suavai,” o le saunoaga lea a Tuila’epa. 

I se fa’aaliga mai le Matagaluega o Puna’oa Fa’aleNatura ma le Si’osi’omaga, o lo’o ta’ua ai le tele o ola ‘ese’ese – e aofia ai ma tagata soifua – o lo’o fa’alagolago i puna’oa e maua mai nofoaga ma fanua-vailaloa.

“O le nofoaga e tumu i ‘oa ma mea aoga – o se puna’oa o mea’ai ma vai mo nisi, o nisi latou te fa’aaoga la’au mo gasegase ma togafitiga o ma’i o le tino ma isi mau aoga e tele. O nofoaga nei ma fanau-vailaloa, o le tasi lea o vaega aoga tele mo le soifua o tagata Samoa.”

© Samoa Observer 2016

Developed by Samoa Observer in Apia