Fa’aaoga tatau lou taule’ale’a

Tusia Vatapuia Maiava ma Sarafina Sanerivi ,

116 Hits

Tomasi Salu mai le afioaga o Malie.

Tomasi Salu mai le afioaga o Malie.

E ese’ese lava tagata ma mea o lo’o fa’anaunau iai o latou loto ina ia fa’ataunu’uina i lenei foi tausaga ua amata.

Ae o le finagalo o le taule’ale’a ia Tomasi Salu mai le afioaga o Malie, na pau lava lona fa’anaunauta’iga mo lenei tausaga o le atina’e lea o lona aiga ina ia maua se lumana’i manuia.

Na ia ta’ua o lona fa’anaunauta’iga o lo’o iai, o le galue malosi lea ina ia manuia ma ola fiafia lona aiga.

“I lenei tausaga fou ua tatou savalia, na pau lava le mea o lo’o ou mana’o iai, ina ia fa’aaoga lelei le malosi ma le ola mai le Atua e tautua ai si o matou aiga.

“O le taimi lenei o lo’o talavou le ola, e taua lava le fa’aaoga tatau i feau a le aiga.

“O le mea lava lena o lo’o taula’i iai le va’ai, ina ia galue malosi aua foi le ola manuia ma le fiafia o si o matou aiga.

“E masani lava i le fa’alogo le fa’aupuga a matua, e iai lava le taimi mo mea uma, ma mo a’u lava ia, e sili lava le galue malosi ma fai lelei la’u pito la’au o le tausi aiga.”

Na ta’ua foi e Tomasi, o lo’o ia va’ai foi lava ma le fa’anoanoa le feoa’i ai o nisi o le tupulaga talavou e le’o fa’aaoga ma le tatau o latou taimi ma le malosi e tautua ai aiga.

“E le aoa’ia lava e laupu’a tamafaiga, ae na’o se fautuaga lava mo i latou o lo’o faama’uma’u le taimi e feoai solo ai ma fa’atupu misa solo, ina ia fa’aaoga tatau o latou malosi e tautua ai aiga.

“Afai ua leai ni galuega, o lo’o iai ma’umaga ma fanua e mafai ona galulue ai ma fesoasoani ai i le atina’eina o aiga.

“E tele lava fa’amanuiaga e maua mai i le ola tautua ma le ola tausi aiga. Ua ou talitonu lava a’u ia i lea tulaga, ma o le ala foi lea e le’o fa’avaivaia ai a’u e faia le pitola’au o lo’o ou faia nei.

“E taua lava le fa’alogo i matua ma usita’i. O iina e ala mai ai manuia o so’o se tagata.”

Na ia ta’ua foi, o lo’o solosolo lelei lava le olaga i Samoa i lana maitau i lenei vaitau o le tausaga.

“E leai lava se nofoaga e sili atu nai lo’o Samoa, ia te a’u lava ia ma la’u va’ai.

“O lo’o lelei lava mea uma ma o lo’o maua foi lava mea e tausi ai aiga mai fanua ma fa’ato’aga o tagata.

“O Samoa lava ia o le tausiga lava o aiga e ave iai la latou fa’amuamua.

“Na pau lava lena o le mea e aupito sili ona taua. Ia maua lava se mea e tausi ai aiga.

“O le mea aupito sili lena. O si o matou aiga, o a’u lava o lo’o fa’alagolago iai le itu tau ma’umaga. O lo’o iai foi le a’ufaigaluega e fesoasoani mai ia i matou. 

“O nisi taimi e fa’atau ai a matou meamata ma maua ai foi seleni e fesoasoani i mea e fai i totonu o le aiga.

“O le olaga lava lena ua masani ai le Samoa.”

© Samoa Observer 2016

Developed by Samoa Observer in Apia