Manaomia le faaleleia o auala

Tusia Ioana Tupa'i ,

199 Hits

Asenati Ropeti, Savaia

Asenati Ropeti, Savaia

E faitau miliona tala seleni o loo faaaluina e le malo I le faaleleia ai lea o auala pe a faaleagaina.

Peitai o loo matuai manaomia lava e le tina ia Asenati Ropeti le vaaia lea ua faatino se galuega alofa e ala lea ile toe faaleleia o auala o le latou afioaga.

“ O le faaleleia ai o auala e matuai fesoasoani tele lea I le faatinoina lea o atinae I totonu o le matou afioaga.”

“ A le lelei auala o le a mautinoa foi e tulai mai faaletonu I taavale ma o se tasi lea o tupe tele o le a faaaluina ile toe faaleleia o taavale a aiga, e pei sa faailoa e lea tina I le Fofoga o Samoa.”

Taua e le tina o loo lelei lava le eletise faatasi ai ma le auaunaga a le Pulega o le Suavai ae pau lea o se itu o loo talosagaina ai se fesoasoani.

O le tina ia Asenati, 42 tausaga le soifua ma o se faifaatoaga. 

“ Ou te le’o sailia se galuega I le taimi nei ona o loo lava lelei le seleni o loo maua mai I la’u faatoaga o loo auina atu I le Maketi e tausi ai lou aiga.”

“ A lelei lava faatauga I le vaiaso e maua le $200 tala ae afai ae faalua ona ave le uta meamata e maua lava le $1000 tala I le vaiaso.”

Ma o lea seleni o loo faasoasoaina lelei lava I faalavelave faale-aiga, tausiga o le fanau faapea ai mea fai a le ekalesia. 

“E sili lava le faifaatoaga.”

© Samoa Observer 2016

Developed by Samoa Observer in Apia