Faigofie le olaga

Tusia Aruna Lolani ,

64 Hits

Fa’atasiga Ituau mai Leauva’a.

Fa’atasiga Ituau mai Leauva’a. (Photo: Misiona Simo)

O Fa’atasiga Ituau mai Leauva’a sa ta’ua i lana fa’atalatalanoaga ma le Fofoga o Samoa; o lo’o sologa lelei mea uma i totonu o le nu’u.

E 24 le matua o lona soifua ma o ia ua fai lona aiga; e iai lona atali’i pepe fa’ato’a  le tausaga ma masina e valu.

Ua lua nei tausaga talu ona nonofo ma lona to’alua ma o le taimi nei, o lo’o galue o ia e fai le fa’ato’aga fa’apea fo’i le fa’atauina atu o keke pua’a ma pani Siamani aua se seleni maua.

“O lo’o saogalemu lava le matou pito nu’u,” o lana tala mai lea. “Vagana ai a le to’atele o au tupulaga e fa’asoesa solo i luma o le auala pea o’o fo’i le taimi e taumafa ai le ava.

“O a’u ia ou te le taumafa ava ma ou te le ulaula fo’i; o le pau o se olaga ua masani ai aua na ou ola mai a i le olaga sa a’oa’oina ai matou e matua ma lea ua masani ai lava.”

“O le itu’aiga olaga la lena ou te mana’o e tausi ma a’oa’oina ai fo’i lo’u atali’i nei.

“O le usita’i i lou tina ma lou tama o le fa’atonuga lea a le Tusi Paia ma ou te masalo e leai sesi mea e tatau ona e faia ae ia fa’aaoga tatau ia upu aua se lelei o lou olaga talavou.

“O a’u a ia o la’u galuega o le totoina o se talo po’o se ta’amu ae mana’omia loa se tupe ona ou alu fo’i lea e fa’asavali a’u kekepuaa ma a’u pani ina ia maua fo’i se seleni.

“E amata mai a la a’u savaliga mai Vaimoso ma o le nu’u lave e uma ai fa’atauga; ia ona toe fo’i mai lea i le aiga.

“E fa’alua a ona ou alu i le aso; o le tele a o taimi ou te alu ma le 150 pani i le taeao ia ona fa’apena fo’i lea o le afiafi. E uma ifo a le aso ia maua se $300 mai le fa’atauina atu o na oloa.

Sa ta’ua fo’i e Fa’atasiga; o lona tama o lo’o fai fo’i lana tama’i pisinisi o le faiga lea o le tapa’a Samoa.

“E lelei a le faigaluega fa’apea ma maua fo’i le taimi mo le aiga ma o le tulaga foi lena ua ou le toe taliaina ai lava nisi galuega.”

© Samoa Observer 2016

Developed by Samoa Observer in Apia