Leaga auala ma le taugata o le soifuaga

Tusia Aruna Lolani ,

57 Hits

Sola’ati Nepa mai Le’auva’a.

Sola’ati Nepa mai Le’auva’a. (Photo: Misiona Simo)

O le fa’atalatalanoaga a le Fofoga o Samoa ma se tasi o tama e suafa ia Solaati Nepa mai Leauva’a uta; sa ia fa’aali ai se manatu i le mana’omia o se fesoasoani i o latou auala.

E 58 le matua o lona soifua ma sa ia ta’ua ua tolu nei tausaga talu ona le toe o’o ai ni fai auala e galue i o latou auala.

“Sa gata a le faiga o matou auala ae le faia le palota,” o lana saunoaga lea.

“O se tulaga lea o lo’o ave ai e le matou nu’u le fa’amuamua aua o ala nei; o lo’o tau savali mai ai tagata i o latou aiga ma ma’umaga ia aemaise fo’i mo nai ta’avale e ui mai lea ala. 

“O tagata fo’i mai Safata ua tele lava ona uia mai lea itu.”

Sa ta’ua e Solaati i le Fofoga o Samoa, ua mafua ona leaga fa’apea auala ona o le tele o timuga ma le malolosi o vai pea tafe.

O le mafua’aga lea ua tele ai itu fa’aleagaina o lenei auala tele.

“E tatau lava e le au konokalate lea sa latou galulue ai i ala nei; ona fai ni auala po’o ni paipa foi lea e alu ai totonu le vai pea timu ina ia aua nei tupu ai ni fa’afitauli fa’apenei i le leaga o auala.”

O le isi tasi o fa’afitauli sa taua e lenei tama, o le taugata o le soifuaga.

“Ua laki o matou aiga mai fafo o lo’o maua mai se fesoasoani i le tele o taimi aua o le tele taimi nei; ua tele faifa’ato’aga, tele fo’i meamata fa’atau.

“O le toa’tele a o tagata fa’atau ia ma tagata faifa’ato’aga ia ma le alu foi i lalo o tau o matou meamata fa’atau ese atu aua e mana’omia lava se seleni.

“Ua taugata le soifuaga; e o’o fo’i la i le va’aiga o le ma’umaga ua le toe taugofie vaila’au.

“E le tusa ai le matou tupe maua ma tupe e fa’alu i mea e mana’omia.”

© Samoa Observer 2016

Developed by Samoa Observer in Apia