Ave le fa’amuamua i lo’u aiga

By Vatapuia Maiava 03 October 2016, 12:00AM

O lea le finagalo o le tinā i a Mata’i Umu, 60 le matua o le soifua o Malie-Uta i le fa’atalatalanoaga ma le Fofoga o Samoa.

Na ia fa’ailoa o le taimi lenei o lo’o sologa lelei lava mea fai o le afioaga ma le Ekalesia ma o le tele lava o vaega o lo’o fa’atinoina o lo’o tu’u lava i le loto faitalia.

“O lo’o solosolo lelei lava, e le fa’apea o tele se tupe alu...e le tele se tupe alu ai, o le lotomalie lava o lo’o faia ai, ia ae fa’amuamua lava le aiga.

O le taimi lenei ua silia ma le sefulu tausaga talu ona si’itia le aiga o Mata’i i Malie-Uta.

“Ia masalo ua fai sina leva ona omai i uta nei, ia sa ma’umaga atoa lumāfale ia o lena ua uma atu le ma’umaga ae o lea ua fai ai le togala’au e pei o kapisi ma nisi o fu’ala’au.

“E tusa a mana’omia lava se seleni a le aiga ia pe fa’alua ona kiliva i le vaiaso le kapisi ae o le Aso Sa lava ia  ia pe $80 le tupe maua mai ai.

“Ia o le fa’afitauli tau i togala’au ma ma’umaga fo’i ia... o nei,  e logo la, e umi loa ona lavea uta ne ii le la, ia oti loa le palapala.

“Ia se’iloaga lava o le suāvai e fa’asūsū ai fuāla’au fa’atoā tau feololo ae pei o le tulaga lena e le lelei ae atoa loa le vaiaso o la aunoa ma se timu...ia oti fo’i lea o le fuala’au se’iloga lava o se suāvai e fa’asūsū ai.

“O le suāvai i uta nei ia o lo’o  lelei lava le sua o le vai, se’i vagana ua tagofia fo’i e se tagata le mea e sau ai le vai, fa’atoa iloa ua pe”

“Ia o le taimi lena e mana’omia ai tanevai...o aso leaga fa’apena aemaise lava ae  maua e mugalā  le ‘ele’ele i uta nei. 

“O palapala fo’i e pei a galue so’o, ia a fa’atolu pe fa’afa ona tōtō atu ia ua va’ai atu ua sui le ola, ia ona taumafai lea ona aumai se fa’alelei ‘ele’ele e alu fa’atasi ma le palapala, aua o palapala a tōtō so’o fo’i ua ese.

“Ia o lena fo’i e fa’aputu ai le lapisi i le isi pito o le ele’ele lea e galueaina , e tau fai se isi palapala fou.

“Ia o le taimi lenei e $5 lava le pepa fa’alelei palapala, pe tasi lava le peki e lava le pepa lea e tasi ia o le mea lava e gafatia ia o lena lava, i a te a’u lava ia e pei e fa’afetai fo’i o lae maua nai na mea e to’omaga atu ai matou nei lima vaivai.

“A maua lava nai pepa e lua ia ua fiafia ua maua lena mea e fa’aalu atu ai se isi mea. 

By Vatapuia Maiava 03 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>