E amata mai mauga manuia o nu’u

Tusia Vatapuia Maiava ma Ilia L Likou ,

196 Hits

Filemoni Esekielu.

Filemoni Esekielu.

O le mamalu ai o Pulega a mata’i i le tele o afioaga i totonu o le atunu’u o se itu lelei lea aua lava le lumana’i manuia o tupulaga faia’e.

E pei o se tasi lea o fiafiaga  o le tamā i a Filemoni Esekielu, 45 le matua o le soifua o Ti’avea.

Na ia fa’ailoa, o le malu ai o le afio’aga ona o vaega nei, e pei o lo’o atagia ai le galulue fa’atasi o le to’atele o le afioaga i ona itutino uma aua lava le filemu ma le ola fealofani o tagata uma.

“E matua’i mamalu lava pulega i tua nei, e pei lava o le mea masani na ona vevesi  lava i le poi ia fono le nu’u i le isi aso, ia o le filemu lava o lo’o tausi e matai.

“O se itu lelei tele lea i a te a’u lava ia.

Na ia ta’ua o le afioaga o lo’o fa’alagolago le tele o aiga i fa’ato’aga i aso uma.

“Ia o nei latou ia o le ma’umaga lava, ma o lo’o fa’aaoga le tele o vaega tupe e maua mai mo le tausiga o le aiga aemaise lava i mea fai o le lotu.

“Ia o le tele o  tupe e maua mai le ma’umaga o lo’o fai ai mea fa’alenu’u ma isi vaega.

“Ia e leai ni fa’alavelave o tutupu, o tua nei e leai se mea o fa’aletonu e o’o lava i le suavai aua o le vai lava a Ti’avea lea e sau ai le suavai.

“O lo’o  saogalemu lava aua o le malo lava  omai  va’ai, ma o lo’o i ai se tasi o ali’i o le nu’u o lo’o ia leoleoa le suavai ina ia saogalemu itu mea.

“O le afioaga nei o lea lava le alagatupe o le ma’umaga , e seāseā  i ai se tagata o le nu’u e faigaluega.

“Ae o lea lava le olaga o lo’o ola ma soifua ai, ia e faigofie mea uma, o nisi o taimi a ua leai lava se ina’i o le afiafi ae maua lava le talo ma le ti ia o lena lava.

“O le so’ona mafaufau tele fo’i i a e tupu ai le ma’i i nisi o taimi , ae fa’alagolago i le Atua e lelei ma atoatoa ai so’o se gaioiga.

“O le olaga lava e fa’apenā o  le aso ua lelei ia o le aso fo’i ua fa’alelelei ia ae ua masani ai lava nai o tatou tagata.

“O le galulue lava, o lo’o i ai ele’ele aua a fa’alagolago i le tau o le soifuaga ia o le ā le fa’aletonu.

 

 

© Samoa Observer 2016

Developed by Samoa Observer in Apia