Ola e tautua
Ripotia: Aruna Lolani
Fa’aliliuina: Ilia L Likou
O ta’ulele’a o i latou ia o le malosi i totonu o nu’u ma afio’aga ta’itasi.
Na maua le avanoa o le Fofoga o Samoa ma Fau Loto, 28 le matua o le soifua i Salesatele Falealili i le aso ananafi ma ia ta’ua ai le aoga o lo latou pito la’au fa’ataulele’a i totonu o faiganu’u.
“Ia o a’u ou te lavea i le fa’ataulele’a po o le malosi o le nu’u i totonu o si o matou nu’u i Salesatele, ma e tele lava galuega e matou te fa’atinoina i le tele o aso."
“O se agaga fa’afetai ona o le malu o pulega a ali’i ma matai aua e pei o lea o lo’o tele mai lava le lesona e mafai ona a’oa’oina mai ai."
O lona talitonuga o so’o se matafaioi o lo’o fa’atinoina, ia o itu masani lava, aua o lea lava le olaga o le tama Samoa moni po'o i matou fo’i ua ta’ua o taulele’a o le tautua ai lea i totonu o aiga.
“E matua’i vava mamao lava o le olaga o le taule’ale’a i nu’u le mavae ma tua nei."
“O le uiga o la’u tala e mamalu, e fai mea uma ona o fa’atonuga, e ala ona fa’atino e le’o mo se lelei o se tagata to’atasi ae o le lelei lautele o le nu’u."
Na ia ta’ua o le taimi lenei o lo’o ua i ai lava ana galuega o lo’o fa’atinoina i totonu o le afio’aga.
“Ia e fa’alagolago lava le tele o vaega i fa’atonuga, ma o lo’o fai fo’i ma fai a matou ma’umaga e pei ona masani ai lava.
“Ia o le i si galuega tele ou te feagai ai ma a’u o le va’aia lea o le fa’atanoa vai ia ma fa’amama ae le gata i lea o le fesoasoani lea i totonu o aiga."
“O lona uiga e le gata e matou te galulue mo le nu’u ma le ekalesia ae o le tautuaina fo’i totonu o aiga."
“E tele lava le aoga o le amata ai o le olaga i totonu o afio’aga aua fo’i a matutua o lo’o i ai lava le itu fo’i lea e malamalama lelei i itu e alu i ai."
“E malamalama lelei i le fa’atinoina o so’o se galuega , e o’o lava i le la’a , savali ma le tautala ma so’o se ituaiga gaioiga ia o fa’atasi ma le aganu’u."
“Ia o lea fo’i la le fa’ataulele’a , ia o le so’oso’otau’au lava mo le lelei o aiga, nu’u ma ekalesia."