Le lelei le suavai mo nai aiga i Samalaeulu

By Deidre Fanene 19 February 2018, 12:00AM

O le olataga o le tagata o le vai, a leai se vai o lona uiga o le a le mafai e le tagata ona ola.

O le talitonuga lea o Lizafrieda mai le afioaga o Samalaeulu, Savaii.

Tele le a’afiaga o le le afioaga i le taimi o le afā.

Sa ta’ua e Lizafrieda i le Samoa Observer na amata mai lava ona sau matagi malolosi pe o se taimi o le 8 i le po o le Aso Faraile.

Ina ua iloa e le to’atele o aiga o le matagi sa sauniuni uma aiga, o latou fo’i sa o i le nofoaga o lo’o i ai lona tamā matua i lisi itu o le nuu.

Sa fiafia lea tinā ina ua latou vave oese mai le nofoaga lea sa  i ai a’o le’i taina le 12 i le po o le aso Faraile ona e uma ane le afā ua alu Gita ma le tele o latou meatotino sa i ai ma ave fo’i ma le taualuga o le latou fale.

Pau le itu faigata lea ua i ai le aiga o le toe tapenaina lea o mea sa fa’aleagaina ma le sailia o se suavai mama aua le fofga tauamafa o le aiga aemaise le nuu atoa.

“O le suavai lava,” o le saunoaga lea a Lizafreida.

“E matou te asu vai mai lava i lesi nu’u lea e sosoo atu, ae ua atoa nei le vaiaso talu ona toe ola mai le vai.

“Ae peitai o le itu le lelei lea ua i ai e le’o mama le vai lea ua ola mai e enaena uma le sua o le vai lea ua sau ma e le lelei i se taumafa.

“O le tulaga lea e I ai e fa’atau mai faguvai mai le faleoloa ina ia mafai ona matou feinu ai, e ui i le taugata ae e leai se mea e mafai ona fai ona e faamuamua lava le soifua maloloina.”

Sa ta’ua e lea tina ua leva tele ona pologa le latou nuu mai lenei faafaituli e le gata ina le sua i le tele o taimi, ae a sua ua palapala e le lelei i se inu pe fai ai ni taumafa.

“Pau lava lea o le itu faigata lea matou te faafesagai.

“Sa matou nonofo muamua i Maliolio, ae ona o le tetele o tafega i taimi o timuga e le saogalemu lea.

“O si au fanau sa susu mai lava i lenei vaiaso atoa ona ua leaga uma metotino e oo I palanikeke ua leaga i le lolga o le afa.

“O le vai e le lelei mo le taumafa o le ala lea e faatau mai ai faguvai e ui i le tauagata ae ua onosai lava ona o le alofa i le fanau ma le tama matua o le aiga.

Sa fesiligia pen a oo atu se fesoasoani i lea tulaga ae sa ta’ua ua uma ona o’o i ai i le ofisa o le koluse mumu aesa tali mai e onosai sei oo atu.

“Leai, o lea lava e faatali.

“Sa ou alu i Tuasivi i le Aso Lua I le koluse mumu mo sina fesoasoani ae faimai e faatali o lea ua omai le ofisa, ae o lea ua oo mai lava i le taimi nei o lea lava e faatali.

“E leiloa  poo ua toititi oo mai ai o faasolo muamua mai i isi nuu.”

Pau le tulaga e faafetaia ai lenei aiga ona e lei umi ona motusia atu le eletise.

Ae mo isi latou tuaoi e lei maua lea faamanuiaga sa latou mauaina i le itu i le eletise.

O lenei aiga e faalagolago i le latou pisinisi bbq ae peitai ua faaleagaina uma e Gita, ae ui i lea o loo galulue ai lona tama ma nai ona tuagane i le toe faaleleia o lea tulaga ina ia toe amatalia le latou pisinisi aua le tausiga o le aiga ma le fanau.

Ae ui i nei mau faigata uma e le faavaivai ai lava lenei tina i le tausiga o lona aiga aemaise ai ua nao ia lava le teine o le fanauga.

Sa ia taua e ui lava i nei mau faigata e le mafai ai lava ona alu ese ma lona aiga aemaise o lona nuu.

By Deidre Fanene 19 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>