“E tasi lava le faitoto’a i le Atua?” - (Eperu.9:6-10) [Vaega.III]

Tusia Petaia Setu ,

290 Hits

Rev. Petaia Setu

Rev. Petaia Setu

“Dad, do we have to pay to go in there?” O le fesili lea a se tasi o atalii i lona tamā, a o tutū pea i luma o le falesa i Niu Sila i le Aso Sa, se i tusi lana lafoga ma lana sene o le Aso Sa. I le vaai a lenei tamaitiiti, e faasolo tagata uma i le laulau lea, ona faato’a laasia lea o le faitotoa i le lotu.

Ua foliga taga tasi le vaai a le atalii nei ma le maitau silasila a le tusitala o le tusi nei o Eperu, i aga ma faiga masani o tu faale lotu a Iutaia. E tasi lava le auala e oo atu ai i le Atua, o le pepē o povi, mamoe ma oti.

E iai sauniga tausi poo lotu tausi masani a Iutaia e tasi i tausaga uma ona fai. O le aso lea ua ta’ua o le Aso o le Togiola(Day of Atonement). Iā Iutaia lava ia, o le sauniga sili lea ona pa’ia i le lalolagi uma. E tasi lava le tagata e faia galuega uma o le sauniga lea, na o le faifeau taitai ua faauluulu iai le lotu(ositaulaga sili). E le faia e se isi lava faifeau. E sa i le tulafono a le lotu.

O fale fetafai e faia ai sauniga nei, e lua ona vaega poo potu e vavaeina i le ie puipui. O le potu i luma mai e mafai ona iai faifeau uma poo soo se faifeau(priest). A o le potu i tua atu, e matuā sa lava vaganā le ositaulaga sili, ae tasi lava le aso i le tausaga e mafai ona ulu atu iai le ositaulaga sili.

Ae oo lava foi i le ositaulaga sili, e faaeteetegatā, ma e matuā foufougatā foi lona sauni atu e osi le taulaga togiola i le potu la lea, poo le vaega lea o le falefetafai ua ta’ua o le Pa’ia Silisili(Holy of Holies). O le potu lea o loo afio ai le Atua Silisili. E sa ona oo iai se isi. E sa ona vaai ai se tagata vaganā le ositaulaga sili. E fasi e le ositaulaga sili manu ua saunia(Numera.29:8), ona ave lea e ia se vaega o toto o manu i le Pa’ia Silisili, ma lūlūina ai e atu fitu i luga, atoa foi ma lalo.

O lea galuega tele, o le tuuina atu lea e le ositaulaga o ia atoa ma le nuu uma i luma o le Atua mo le faamagaloga. A o le nuu atoa, e tatalo tapuai uma i fafo ma vaavaai ma le loto gatete i galuega uma a le ositaulaga sili i le potu i luma. E faalāina le nuu i le aso atoa, e sa foi se galuega, ae tausia le aso nei faa-sapati.

A maitau i la tatou Tusi faitau ua ta’ua i luga, o le galuega tele lea e tapena iai le nuu mo le aso e tasi i le tausaga atoa. Masalo pe tai foliga iai le tapenaga o le faa-mati i le tausaga. Ia poo faiga taulaga o le Me, e tasi ona tāpena iai i le tausaga. 

O tu ma aga faa Iutaia i tulafono faamauina ma ana faiga faavae ua oo mai lava i aso nei. Ua le gata la ia Iutaia, ae ua pisia atu ai ma le tele o lotu i ia faiga faatapuaiga ma talitonuga faale-lotu. O loo lolo’u mai pea e Iutaia le Feagaiga Tuai i ona fale fetafai faafeagaiga tuai, e palu ai le Fale Fetafai e sili ona lelei e le i faia e lima, e le i faia faale-lalolagi nei(Eperu.9:11) O lona uiga, e manaomia ona malamalama le togiolaina o a tatou agasala. Auā ua le mafai ona iloa tino lē na togiolaina lou ola ina o ‘e tausisi pea i le faa Iutaia.(f.8) A o le pogai foi lea o lo tatou faia pea lava o le tautua ma le auaunaga faale lotu i manatu faale tagata, o “laei” mo outou!(f.9) E leai sona uiga i le faaolaina ina se’ia manino le mata o le vai(f.10).

O faiga masani ia o faiga faatapuaiga o le Aso o le Togiola. O le aso ua faamau faailogaina e faamamāina ai mea uma ma tagata uma mai le agasala. E fai pea lava pea e faa-tasi i tausaga uma. O le galuega a le ositaulaga sili na o ia lava. O le fufulu, e mamā lava fafo ia i le vai.

O le taulaga, o le toto o le tamai povi po’a, ‘oti ma mamoe. O mea uma nei, e leai sona uiga i le vaai a le tusitala o le Eperu. E iuvale; auā e leai lava se mea e tasi o nei mea uma e tu mo lou faaolaina. E le mafai e nei mea uma ona fai ma togiola mo au agasala. O totonu o nei mea o loo atagia ai i le vaai a lē na tusia le Tusi nei ni ala faatusa o le mea moni. Ua na o ni ala faafoliga o le taulaga moni e tasi – o le taulaga a Keriso. E pa’ia ona sauniga. E mamalu ma aloa’ia e tagata, peitai ua na o se ata lafoia ua le o iai se faamoemoe manuia. 

Le atunuu e, ua taumafai e oto’oto atu faapea le uiga moni ma le faiga o ia tapuaiga faa Iutaia mai le feagaiga tuai  ina ia e silafia, e tāua ona e malamalama i lou olaga tapuai faakerisiano, poo lē fea e tatau ona iai o lau faamamafa. Poo le tautū i ata faafoliga ma galuega faaletino e pei o le lotu Iutaia(f.10), po le saili sa’o ia Iesu Keriso o le Tala Lelei ia a le Atua mo lou faaolaina.

Samoa e, o Iesu Keriso, o lou Ala lea e tasi i le Atua. O le Upu ua liutino tagata a le Atua mo le faa talaleleiina o le lalolagi uma. O le Ola ua fai ma ou togiola. E te le manaomia se mea e te pasese ai i le Atua. A o lou talitonu i le Tala Lelei, ma faatuatua i le Alii o le Tala Lelei.

E le mafai e lau povi, ma lau pua’a, ma lau mamoe, ona faalelei oe ma le Atua. E le mafai foi e au tupe ma au mea sii atoa ona tatala le faitotoa mo oe. Fai mai Iesu, “O a’u nei o le Ala, o a’u o le Upu Moni, o a’u o le Ola. E le alu atu lava se tasi i le Tamā pe a le ui mai ia te a’u.”(Ioane.14:6).

Ioe Samoa, o loo e sapi ma tatou ola i le Tala Lelei o le Feagaiga Fou  -  O Iesu Keriso lea. O ia o le Ositaulaga Silisili, na ulufale o ia i le Holy of Holies ma lona toto mo lou faamagaloga. E le o se toto o se povi poo se mamoe, a o lona lava toto. Na ofo fua mai lona soifua e fai ma taulaga silisili, ina ia moni ona fai o oe ma afafine ma atalii. 

Uso e, o mafai ona tau faatusa lou olaga lotu i lou olaga talitonu? E faapefea ona faapaleni lou olaga o aso nei, i le taulaga silisili na osia e le Tala Lelei? O le toe fesili  -  Samoa, o ‘e lotu e faamălie le lotu, poo e sāili i le Tala Lelei ma le tonu? Vaai toto’a. Vaai sa’o i le Alii.

Ua tatau nei ona tatou o ese mai ata faatusa ma foliga lafoia o le mea moni. Tatou ō ia Iesu Keriso o le Tala Lelei moni ia a le Atua Soifua. Faalogo i le Alii o le Taiala, i le ma le Ala moni o ia mo oe ma a’u i le Atua. O loo ia te ia le saolotoga o oe ma lou aiga. O loo ia te ia le manuia o oe ma lau fanau. Ua uma ona saunia  e le Atua le avanoa mo oe. You don’t have to pay anything. Ua uma. Christ has done everything necessary for your salvation. O le manatu o le Tusi nei, e tasi lava le ositaulaga ma le taulaga e tasi e avanoa ai tagata uma i le Atua, na o Iesu Keriso, le Ositaulaga Silisili o le Tala Lelei.

 

Amene 

7737063/7783782

© Samoa Observer 2016

Developed by Samoa Observer in Apia