O fua sa e lūlū e te toe seleseleina

By Fetalai Tuilulu’u and Aruna Lolani ,

194 Hits

Le tamā galue malosi ia Lafaele Aukusitino o Mulifanua ma Nofoali’i

Le tamā galue malosi ia Lafaele Aukusitino o Mulifanua ma Nofoali’i

E leai se tulaga sili ona suamalie e tusa ma le suamalie o fua o au galuega sa lau ai lou malosi ma sisina ai lou afu. 

O le manatu lea i le tamā ia Lafaele Aukusition mai afioaga o Mulifanua ma Nofoali’i i le maua ai o le fa’atalatalanoag ma le Fofoga o Samoa. 

A e galue ma le malosi e lelei foi le tali e te mauaina. 

“Ou te ta’utino atu, o tatou lava ia ola ma le lelei o aiga e fa’alagolago lava ia te i tatou. 

“Pe galuega pe le galuega, e mafaia lava ona tatou maua se olaga fiafia ma se olaga le ola falolo pe a tu’u iai le loto atoa ma galu e malosi. 

“O le tagata lava ia e pau iai le leaga o le olaga pe a le ola magafagafa ma le ola alofa. 

“O le olaga lenei o le lelei lava o le filifiliga, a e filifili se olaga galue malosi o le tali foi ete maua e sili atu le matagoife, ae afai sa e filifili le ola paie ma le fa’apalapala e fa’apena foi le olaga e te o’o iai. 

“O lo’u talitonuga, e te manuia a oe ia i galuega a ou lima, a o isi i le vaitaimi nei, tele le fa’amoemoe i isi e tausi atu latou.

“E tele a outou tusitusiga ua ou faitau ai, e fa’apea a le to’atele o tagata e matitiva ae ou te ta’utino atu, o tagata ia e le fiafia e galulue. E le fia galulue.” 

“Se taumafai e tu’u le faitio i le malo ae faitio a outou ia te outou, aua e pa’u a le leaga o le tagata ia ia te ia, pe’a le iloa tu i ona vae e fai le galuega e ola ai. 

 “Aua o ‘ita nei, a ou le faigaluega, e le ‘aai fo’i la’u fanau.

Sa taua e le tama, o le paie e leaga ai mea uma i lenei olaga.

“O galuega sa ou pologa ai, ua ou manuia ai, aua sa ou talitonu mai a i le amataga o la’u fanau a lo’u lumana’i lelei. 

“A ola le tagata e alofa i lona aiga e fa’apena foi le tulaga e o’o iai. 

“Ia amata loa ona e alu e te galue ma le fa’amaoni, o lo’o ia tatou uma le sa’olotoga e fai so’o se itua’iga galuega e te fiafia iai.

© Samoa Observer 2016

Developed by Samoa Observer in Apia