Galue Tulua i mea na te maua

Tusia Fetalai Tuilulu’u ma Aruna Lolani ,

62 Hits

Mana’omia se fesoasoani i le olaga faigata: Tulua Luki mai Samea Mulifanua.

Mana’omia se fesoasoani i le olaga faigata: Tulua Luki mai Samea Mulifanua.

E iai lava le taimi o lou olaga, e o’o ai ia te oe le fa’alogona e tatau lava ona e talia so’o se galuega e te maua ina ia maua se seleni e fesoasoani ai ia te oe.

O le manatu fa’alia lea a se tasi o tama e suafa ia Tulua Luki mai Samea Mulifanua i le Fofoga o Samoa.

“O lo’o ou faigaluega nei i le aiga lea aua le fa’amamaina o le latou fanua, ina ia maua ai fo’i sa’u seleni mo le fanau,” o lana tala lea.

“O galuega laiti a ia e maua ai se totogi $25 pe $30 fo’i.

 O Tulua ma lona aiga, e le o se aiga e mau’oa ma o le ala lena e taumafai ai lava o ia i lana galuega e fai aua se fesoasoani mo lona aiga.

“O lo’u aiga ua na o lo’u to’alua ma si ma fanau. Ua maliliu uma ma matua ma o lo’o taumafai e ola i se olaga malosi.

E leai sa’u galuega mautu, ua laki a si aiga lea ou te faigaluega ai lea e maua mai ai tama’i galuega ia ta te ola ai.

“O aso nei, o galuega ua e maua, ia e fa’atino ma le fa’amaoni. E le toe aoga ona e fa’ailoga galuega.

“E mana’omia se fesoasoani i se matou eletise fa’apea fo’i le suavai aua o le taimi nei, o lo’o ola lava i le eletise a lesi aiga e tala ane o matou.

“Ma e le tosoina fo’i se matou paipa aua e fua lava i le seleni na mea uma.

“O le olaga nei a leai se galuega, o le faigata fo’i lena o lou olaga.”

A e fia fesoasoani ia Tulua ma lona aiga, e maua o ia i le numera 7744009.

© Samoa Observer 2016

Developed by Samoa Observer in Apia