Manatu O Le Fa’atonu - E mana’omia e Tagata sina laolao se’i manava ai

Tusia Mata’afa Keni Lesa ma Faaliliu e Seagaitumua Tupuola ,

136 Hits

E faaauau pea le Soifuaga. Ona o lea ua mae’a le Faamanatuina o le 54 tausaga o lo tatou Tutoatasi ma ua pefua, o lea ua toe taliu mai le tulaga moni lava o le soifuaga i le asō- lea e matua to’atele lava i tatou na toe taliu atu i galuega ma a’oga mo le taimi mulimuli i lenei vaiaso.

Se’ia vagana ai o oe o se tagata faigaluega o le malo-poo se tagata a’oga o loo a’oga i se a’oga a le malo-ia ua matua faamanuinaina e le malo e ala i se aso faaopoopo e alu ai e faatau, ae o le vaega toatele lava o tagata masani o lea ua toe fo’i i galuega; faatasi ai ma le tuto’atasi ua na o se mea ua mamao atu.

E faapena le soifuaga nei. Tatou te fiafia ma faagasolo i luma. O le mea moni, ua lelei mea uma ma ua taunuu lelei. Faatasi ai ma a tatou malō faapitoa mo le Aso o le 54 tausaga o le tuto’atasi-ia ua toe taliu atu i o latou atunuu, a ua tatou toe tilotilo i tua i le matagofie o aso e luau a mavae ma tatou tauaveina ni lesona ua tatou aoaoina mai ai.

O le toatele lava o i tatou o le a eseese mea tatou te manatuaina. Pe o le toe feiloa’i ma uo ua leva, aiga po le pati e te le o manatua pe na faapefea ona uma, o manatunatuga nei ma mea e manatua pea i le olaga atoa.

Ia te a’u lava ia, o la’u faamuamua na sau a’o filo ma le fiafia ma olioli o le sauniga faamanatu a le atunuu i malae o taaloga ‘Hockey’ i Tuana’imato i le Aso Lulu. O se ifoga lea (o le faasifoga faale-aganuu) na faatino e le ‘aufaafiafia a le Ola Toefuata’ina i le vevela o le La. O lea fuafuaga sa le mafaufauina ae peitai-e matua ogaoga lona pa’i mai. E leai se mata e le’i tagi i lea Malae. Mo se mafuaga tatau.

O se gaoioiga taua tele. O loo faailoa mai ai se loto naunau poo ai lava na ia fuafuaina lea faatatau -ina ia faasa’o se mea sese lea ua latou lagona ai e tatau ona faailoa atu lea tulaga- ina ia silafia ai e le atunuu atoa.

O lea ifoga e le mo na o le motu o tagata sa i le Hockey Stadium. O le mea moni –na faa’emo sa’o mai lava i le salafa o le atunuu i luga o le Televise a le atunuu-ma atonu sa faasalalau atu foi faapena i le lalolagi atoa-ma le  faamoemoe ina ia ‘ausia le faitau afe ma afe o isi tagata  ia sa fuafua le ‘aufaafiafia ina ia ‘ausia.  

Ma o le pogai lena e matua taua ai tele.

Ua outou silasila la, a pa’ia loa sui auai o le vaega o le Ola Toe Fuata’ina, mo i latou la e le o silafia, o i latou o pagota ma o tagata e manino mai na latou faia se mea sese.  O lea vaega-o se vaega lea o le latou polokalame tau toe toe fuata’ina. 

E ui lava ina o nisi o i latou o tagata solitulafono soo ma ua fai ma latou amio le soli o le tulafono, ae o le toatele lava o i latou ua matua tumu i le loto salamo. Ua latou talia o latou tiga ma ua latou matua naunau lava e tuli taimi o latou faasalaga, ma o ese mai Tafaigata ma toe taumafai e fai se isi mea fou i o latou olaga.

Sa maligi o’u loimata. Ma sa faapena foi isi. O lea faasifoga na matua pa’i mai i lo’u loto talu ai ona o se mea e taua tele. Ua tatou iloa o ia pagota na o latou faia se mea sese. E aunoa ma se masalo-o le toatele o i latou sa fai ma mea e faanoanoa ai lenei atunuu ma mafatia o latou loto ona o se tasi poo se isi o gaoiga tau solitulafono.  

Ae peitai-ua na o i latou ‘ea? Faamata e talafeagai ona faapea atu ona pau lava le eseesega i le va o nisi o i latou ma nisi o i tatou o le mea moni lea-ona ua maua i latou? 

Ia ‘aua nei outou ave seseina i matou, matou te le o ta’ua ni tagata solitulafono maoa’e ia e moomia sina alofa itiiti talu ai-o le toatele o i latou e manino mai- ua latou filifilia se ola solitulafono e avea ma natura lona lua. 

Ae peitai-o nisi o i latou e manaomia lo tatou alofa. Latou te manaomia le agalelei ma le alofa. E tofu i tatou uma lava ma le mea sese ua fai. Ou te faafetai e o’o i le faavavau ona o mea na ‘ou faia ua le tuuina atu ai a’u i le falepuipui.  

Ae peitai- a tatou faatali teisi ma mafaufau i nisi o mataupu (ae le o mataupu uma) a pagota ia na ifo to’ele i luma o le atunuu i le Aso Lulu, e le o so latou faaletonu. O i latou o ni oloa o se faiga mata’utia lea ua ta’ita’iseseina ai i latou. 

E anoano mea lelei ma tagata popoto na i’u i Tafa’igata ona ua una’ia i latou e fai mea e le talia i le mafaufau e tagata Samoa. O lea matou te talanoa atu e uiga i le anoano o alii ma tamaitai na i’u ina gaoi mai o latou nofoaga o galuega ona o le taumafai lava e faafetaui itu e lua ma faamalie moomooga o matua mitamita vale ma aiga.

E faasino a matou upu i fanau teina ma tama na latou soli le tulafono talu ai le le malamalama o latou matua i le uiga o le upu “ua lava” pe a pa’ia le ekalesia ma noataga faale-aganuu. O se vaega lenei o se faiga leaga e faasino i ai a matou upu. O lea faiga e tatau ona faamuta. E tatau ona taofi. Mo le faamoemoe o mea sili, ua loa ona tatou tuto’atasi mo le 54 tausaga. Ae i nisi lava taimi, e te lagona e peiseai ua tatou toe aga’i i tua ona e foliga mai –ua tatou faa-pologa ia i tatou lava i mana’oga o aso uma o le soifua. Ae o le a le uiga o nei mea uma? 

A tatou ‘eli le loloto i totonu o i tatou lava, ona tataou maua lea-o nei mea uma lava e fai ona o le mitamita vale. Faavalevalea, le mitamita vale faavalevalea.  O le pogai lea ua una’ia ai tatou e manana’o i ni falelauasiga uiga ese i totonu o Samoa, o le mana’o lea ua una’ia ai matua –ia e tau le mafai ona latou faia se aso fanau – e fai se aso fanau aupito i tele i totonu o le nuu. O le faalialia vale lena ua una’i malosi ai Faafeagaiga o ekalesia ma ma taitai o nuu ina ia manaomia ia aofaiga tetele o tupe mai o latou sui auai. Ma o ia mana’o  ua faaitiitia ai taunuuga. 

O saofaga poo saogamea e tatau ona totogi e se tasi ma o nisi itu, o soifua ia-o mafaufau maoa’e o loo i Tafaigata. O se mea moni lea e faanoanoa ai, ae paga lea-e matua moni lava lea tulaga i totonu o la tatou Samoa i aso nei.

A’o tatou toe manatunatu i sauniga faamanatu i nai aso ua mavae atu, e tatau ona tatou matua fusi mau i moomooga ma faamoemoe o tatou matua ua mavae-a’o latou finau ma ‘ausia le malo tuto’atasi tau upufai –i le tele o tausaga ua mavae. E le gata ina latou le manaomia lenei malo ina ia sa’oloto mai le aia mai fafo-ae sa latou le manaomia foi o tatou tagata ina ia faa-pologa ia i tatou. E tatau ona aveese le faa-pologa o i tatou lava e ala i le faa-faigata o le soifuaga ona o mana’oga ua tuuina atu e le aiga, aganuu ma ekalesia i luga o tagata.  I le avea ma atunuu, tatou te manaomia le tuuina i o tatou tagata o se avanoa e manava ai, o le mea moni lena e igoa o le sa’olotoga. Ia outou maua se Aso Faraile uiga ese, ma ia faamanuia atu le Atua!

© Samoa Observer 2016

Developed by Samoa Observer in Apia