E so’o le moa-sope i le moa-sope (Vaega2)

Tusia Fa’aliliu e Maiava ,

190 Hits

Toe mafaufau tasi lava…Na malaga se tamā ma lona atali’i i le la ta’avale, ae taofi ai e se leoleo ma fa’asala ona o le so’ona saoasaoa. E o’o lava i le fale, o itaitā le tamaloa, ma fa’apea, o le a se’i talanoa i lana uo i le ofisa o leoleo, se’i “fai” se ‘auala ia ‘aua ai ne’i totogia lana sala.

Ona tonu ai lea, o le a taumafai e sa’ili se ‘auala e taui ai le mea leaga ua fai e le leoleo ia te ia! 

Na iloa mulimuli e le tama le leaga o lana mea ua fai – le fa’ata’ita’iga ua ia faia i lona atali’i ma fai loa iai, na ala ona ia faia ia fa’amatalaga le-lelei, ona o lona ita tele, ae sa le-tatau ona ia tautala i ia ‘upu.

Ona alu lea ma ‘ave lona atali’i i le fa’amasinoga; e le gata ina ioeina lona moliaga a ua naunau fo’i e totogi lana sala. Ioe, e mulimuli tamaiti i mea e te savali ai, ae le o mea e saunoa ai lau susuga.  E tele ina mulimuli i au gaioiga ma fa’atinoga e fai i aso uma, ae le o au saunoaga ma ‘upu e fa’alogo ai.  

I le po o se Aso To’ona’i, na lavea ai se ta’avale ma maliu ai le ali’i ‘ave-ta’avale talavou ae manu’a tigaina lana uo-tama’ita’i e 17 tausaga. Na fa’ananati atu matua o le teine i le falema’i ma iloa ai, sa onana le teine ma lana uo-tama.

Na alu-‘ese le-fiafia le toea’ina mai le falema’i ma fa’apea lana tala: “Fa’atalitali lelei i le taimi ma te feiloa’i ai ma le tagata tonu na fa’ataua i lo’u afafine le uiskiki!” E fo’i atu i le fale, ae va’aia se tusi i totonu o lana fata o fagu-malosi, o le tusi mai lona afafine o iai ‘upu nei: “Papa ea, na ‘ou avea lau fagu-uisiki anapo. Atonu e le afaina ia ‘Oe?” 

Leai se mea e sili atu ona taua i le ola nei, nai lo le a’oa’o o lou atali’i / afafine, e ala i au fa’ata’ita’iga lelei. Sa fesiligia se tamaititi la’iitiiti pe o ia o se Kerisiano ae tali: “E le o a’u o se Kerisiano ona e le o se Kerisiano lo’u tama, ma e tutusa lava a’u ma ia.”

Se Papa, o lou sao lea ma lau matafaioi tupito, o le a’oa’o, fa’atonu ma fa’asino lou atali’i i ‘auala na faia e Lou Fa’aola e ola ma soifua ai. Ae le mafai ona e fa’aali atua ala o le Fa’aola o Iesu pe a e te le o mulimuli-ta’i ma ola ai.

Ae a le asō, ae tatalo ia Iesu e fa’amagalo ‘Oe ona o lou ola pea i ou lava ala sese, ae pulea loa e Ia lou tagata atoa ma suia atoa lou fatu, lou mafaufau ma le agaga, ona amata lea ona e fa’ailoa i lou atali’i, ala o Le Atua i aso uma o totoe, e ala i au saunoaga ma fa’atinoga. Toe mafaufau tasi lava…           

© Samoa Observer 2016

Developed by Samoa Observer in Apia