O LA’U TALA FO’I

228 Hits

1. Faafetai o lea ua faataunuuina ma le manuia le faamanatuina o le 54 tausaga-talu ona tuto’atasi Samoa-ae ua sili atu ai ona fiafia le atunuu o loo nofoia vaega-eleele i le talafatai o le Taulaga ma nuu e tau lalata atu i ai.

O le pogai o lea fiafia-ua uma atu ai le pisapisaō o taavale feoa’i i ala tetele I le valuapō- aemaise ai o le pisapisaō o laau pese o  fale kalapu o loo i laufanua o Moamoa e faafeagai ma Alafua.

O le tulaga mata’utia e feagai pea ma ia nofoaga-o le leotetele o laau pese ma leoleoā o tagata onanā- a ua tuneva le po! O le fesili la i le Malo-o le a le tulaga ua i ai le Tulafono o loo tapu ai le pisapisaō?

O lona uiga ea-a fai loa lau fale kalapu-ona e pule lava lea o oe pe ao le po o fai lava le pisapisao- a ua le mafai ai ona tofafā le atunuu? Aisea ua faataga ai ona fai nei fale kalapu i vaega o loo nofoia e le atunuu-ae le ‘ave i le Taulaga poo le vaomatua- e faitalia ai latou pe ao lava le po o pisapisao?

E faapefea Vavao a nuu? E pule le Fale Kalapu ia pea leai? O le mea lenei e igoa o le matua lē mafaufau lava!

Afai o ni Papalagi poo ni tagata mai atunuu mamao  o loo faia nei fale kalapu-e lelei la ona ta’u i ai le aganuu a Samoa-“e fai lana vavao i le taimi o faiga-lotu i le afiafi-toe ta le vavao e ulufale ai tagata uma i o latou fale mo le malologa o le po!

E le aumaia le faamanatuina o le Tuto’atasi o Samoa- e soli ai e tagata lē mafaufau- tapu ma faavae o nuu! O ai lava la le vaega o le Malo o loo gafa ma ia tulaga-atonu e lelei ona toe vaai ane i lea faafitauli-leaga fai mai le upu-“a fai soo loa ona le malie lea.”

O le a sou taofi?

2. Matauina foi i Tala Fou le siitia maoa’e o le Tala o le Tupe a le Atunuu mo lenei paeaiga a le Palemene! E le fesiligia foi le tomai o le MInisita fou o Tupe ua tulai mai.Ae pau lava le fesili-o se Tala o le Tupe lea ua mautinoa e le Malo-e mafai  ona gafatia e le tamaoaiga o Samoa?

A toe faaupu-o nei ‘ea tupe uma -e mafai ona maua e Samoa e tusa ai ma lona lava tamaoaiga-pe o faalagolago i ni faaunegatupe mai fafo ma ni foa’i e faatupe ai? Afai la o lea aofaiga o le Tala o le Tupe ua gafatia e le tamaoaiga o Samoa-faamata la e le toe faia nisi faaunegatupe e faatupe ai?

Afai la o le tele o galuega o loo fuafua e fai- ua pogai ai ona maoa’e lenei Tala o le Tupe talu ona tuto’atasi Samoa-o le fesili-o a ia galuega? O ni galuega e mana’omia vave pe o ni galuega e mafai lava ona faifai malie?

A tatou tilotilo la i le aofa’i o lenei Tala o le Tupe-o le mea moni –o se Tala o le Tupe uiga ese lenei talu ona Tutoatasi Samoa! Ana faapea la e tuu i ai ma isi miliona ma miliona a le atunuu ia ua liu suavai-ona o faiga pi’opi’o a le HRPP-o lona uiga-ailoga e maualuga faapenei le Tala Faatatau o Tupe e pei ona ta’ua? O le a sou taofi?

3. Matauina foi i Tala Fou se Ulutala fai mai –“O le faamalosia o faavae-ma galuega mo a taeao.”

O lea la faaupuga na faaalia e le Minisita o Tupe o Sili Epa Tuioti-ma e manino mai- o le fatu lea o lana Tala o le Tupe maoa’e lea ua tatou vaaia. O le fesili la- o a faavae ia e toe fia faamalosia? O a isi galuega ia o loo fia fai mo taeao?

Afai la ua ave le faamuamua i ia galuega-o le fesili-o a isi galuega? Ni galuega o loo manaomia faanatinai e pei o le toe faaleleia o auaunaga a  le soifua maloloina –a’oa’oga mo le fanau i le salafa o le atunuu i Upolu nei ma Savaii?

E le tau fesiligia la le taua o le auaunaga a le Soifua Maloloina mo le atunuu atoa.

E le fesiligia foi le taua o le matua aoaoina lelei o fanau! O le uiga la o se faamatalaga-afai e manaomia le aoaoina lelei o le fanau- e matua mana’omia lava le faaleleia o le auaunaga tau Televise-ina ia mafai ai ona faasalalau atu i aoga uma i totonu o Samoa-mai Apia nei –le aoaoina o mataupu uma!

O lona uiga- e tofu lava faiaoga ma lana mataupu e aoao atu i luga o le Televise- ona malamalama lelei uma lava lea o tamaiti a’oga. O manatua foi aso la- sa faasalalau lava e le Matagaluega o Aoga-aoao’oga i luga o le Leitio-ae faalogologo uma mai tamaiti a’oga i le salafa o le atunuu.

O na la aoaoga i luga o le Televise-o le a matua sili ona malamalama lelei tamaitai a’oga-aua o le a vaai tino lava  i le faatinoina o soo se mataupu! A tuu ane foi i le Soifua Maloloina, e mafai lava ona maimoa mai fomai ma tausima’i i Savaii-a’o faatino atu e le Falema’i i Mootua le faatinoga o le togafitiga…!

O le mea tonu la lena e igoa o le faamalosia o faavae ma le fausia o nisi fuafuaga mo taeao! O le a sou taofi?

© Samoa Observer 2016

Developed by Samoa Observer in Apia