Fa’alelega-pepe e fa’amanatu ai le Aso Fa’apitoa o Tina

By Fa’aliliu e Maiava 04 May 2016, 12:00AM

O lo’o tapena nei le Matagaluega mo Tina ma Tama’ita’i, Atina’e o Nu’u ma Agafeso’ota’i, mo  le Fa’alelega-pepe Fa’aleTausaga, o ‘ie-Samoa ma siapo, e fa’amanatu ai le Aso Fa’apitoa o Tina 2016.

O lea Fa’alelegapepe, ua fuafua e amata i le fitu i le taeao o le Aso Tofi, 05 Me 2016, i luma-maota o le malo ma o le a fa’alauiloaina ai le sao-taua o tina, i o latou faiva-alofi-lima e pei o le lalagaina o ‘ie-Samoa, o siapo ma isi oloa fa’aleAganu’u ae maise o matafaioi masani o faiga-fa’aPisinisi aua le manuia o aiga, ekalesia ma le atunu’u.   O le toe fafagu mai o le lalagaina o le i’e-Samoa ma le gaosiga o siapo fa’aleAganu’u, o lo’o taulamua ai le Komiti mo le I’e-Samoa, lea o ta’ita’i-fono ai le Ali’i Palemia, ma ‘auai sui mai vaega ‘ese’ese o le malo, le vaega tu-ma’oti, le Vaega o Tina Fai-Pisinisi ma nisi o fa’alapotopotoga mai tua.

O komiti a tina ma tama’ita’i mai afio’aga ma alalafa i tua, o lo’o fa’atinoina lea polokalame, lea e ‘auai ai tina talavou fa’apea fo’i tina e iai mana’oga fa’apitoa. E taua tele fo’i le sao o ali’i i lenei polokalame,  e le gata i le lalagaina o ‘ie-sae ma siapo a ’o le lagolag o fo’i e tu’uina atu i le tapenaina o vaega ‘ese’ese e mo’omia. O le sao o le malo, o le fa’ama’iteina lea ma amata-mea mo le fa’atauaina lava o ia mea-sina a Samoa mo fa’alavelave fai a le atunu’u.   O lo’o molimauina pea le fa’aaogaina o nei oloa a Samoa, i faiga-meaaaloga mo malo aloa’ia a le atunu’u i taimi o le fa’ailogaina o le tuto’atasi o le atunu’u, o maliu, fa’aipoipoga ma so’o se fa’amoemoe fa’aleAganu’u.

E le gata i lea, a ua avea le i’e-Samoa ma siapo o se alaga-tupe mo tina ma tama’ita’i e fa’atauina atu nei oloa, e gata o ni mea-alofa ae fesuia’i i tupe, e le gata mo isi tagata-nu’u Samoa a’o tagata mai fafo. O se ‘auala e lagolagoina ai tele le atina’e o le tamaoaiga o tina i afio’aga ma alalafaga o le atunu’u.

O le fa’amoemoe o le fa’alelega-pepe i le Aso Tofi, e tatala mo maimoaga a so’o se tasi o le atunu’u.

By Fa’aliliu e Maiava 04 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>