Manatu o le Fa’atonu - Ua tatau i le taaloga si’isi’i u’amea mamafa ona ti’eti’e i le ma’a salafa

Tusia Mata'afa Keni Lesa ,

118 Hits

O le mea moni e faapea o le taaloga si’isi’i u’amea mamafa na toetoe lava ona ave uma faaailoga i le faagasologa o le tufatufaina o Faailoga Tau Taaloga a le S.A.S.N.O.C. i le po o le Aso To’ana’i ma o se tulaga lea e matua uiga ese. 

Vagana ai se vaega itiiti o ituaiga o taaloga ia e le o fiafia ai tagata taalo mai isi taaloga  ona ua le aafia ai i latou ona o le mea moni e faapea ua na o le aloa’ia latou te manaomia, ae leai se masalo e faapea o le faalapotopotoga siisii u’amea mamafa i Samoa ua tatau ona latou maua faamanuiaga uma na aga’i mai lo latou ala i lea afiafi.  O le mea moni, e anoano mea e tatau ona sami mo le taaloga.

Ua outou silasila la, a tatou talanoa loa e uiga i le si’isi’i u’amea mamafa i Samoa, ua leva ona avea le aiga o Wallwork  ma poutu o le taaloga. O lo latou sao e matua uiga ese lava i le tele o tausaga.

Ma atonu la e sili atu ona talafeagai ona faaaloalogia se alii na ta’ua e faapea o le tua’a o le Alii Si’isi’i Uamea Mamafa, o Seiuli Paul Wallwork, e ala i le faafeiloa’ia o ia e avea o se tasi o le to’alua na faaulufale i totonu o le Hall of Fame a le S.A.S.N.O.C.

Sa i ai foi le isi augatupulaga a le aiga o Wallwork sa aloa’ia i le tele o tausaga mo matati’a na ‘ausia, toto, afu ma loimata. O le alo o Seiuli, le siamupini muamua ma ua umi se taimi o avea o ia ma faia’oga, o Tuaopepe Jerry, lea sa foi sa faaigoaina o le Faia’oga o le Tausaga.

Ma sa ai foi tagata si’isi’i u’amea mamafa na latou aoina le vaega tele o faailoga e aofia ai le Tagata Taalo Maoa’e o Samoa ma o se Tama’ita’i Taalo o le Tausaga, o Mary Opeloge. O lea faailoga o se teuteu suamalie lea i luga o le keke mo se taaloga lea e tatau ona ia matua faato’ilaloina tulaga faigata ina ia avanoa ai pea a latou tagata taaalo e taumafa faasaga i tagata taalo e sili ona lelei i le lalolagi. 

O le mea e uiga i le si’isi’i u’amea mamafa-o le pogai lea ua matou fai atu ai e tatau ona latou maua faamanuiaga-ona atonu ua loa ona avea i latou ma taaloga e sili tumau pea i totonu o Samoa, e tusa ai ma matāti’a ‘ausia ma tulaga faamanuiaina, e masani ona aumai e Tuaopepe ma lana ‘au-taalo i Samoa nei pine mai le itulagi, faava-o-malo ma isi lava tauvaga a le lalolagi.

O le mea moni lava-e tatau ona latou faia se mea sa’o, se mea e mafai ona faata’ita’i i ai isi taaloga. 

E pei ona matou fai atu a’o lumna’i ai le po o le Aso To’ana’i, ua matua umi lava se taimi i le va o Faailoga Tau Taaloga. E tatau ona tuuina atu le faafetai i le S.A.S.N.O.C. mo le faaiuga ina ia toe faaolaola Faailoga i lenei tausaga.  Matou te faamoemoe o le a tatou le toe faatali mo le isi valu tausaga mo le isi Tufatufaina o Faailoga. 

Ma-o le a le pogai e taua ai nei faailoga? Ia, e tusa ai ma le faaupuga a le Palemia o Tuilapea, latou te tuuina atu ai se faatosina e le gata mo tagata taaalo-ae faapea foi i latou e puleama faalapotopotoga tau taaloga ina ia tauva mo le mea sili.

O le fiafia uiga ese na vaaia i foliga o i latou na maua faailoga ma loimata pe latou toe mafaufau i i tauiviga, taua ma pa-pupuni e tatau ona latou sopo’ia ina ia ‘ausia le tulaga ua latou ‘ausia i le asō e matua uiga ese le taugata.

I le ta’ua la o taua ma pa-pupuni, e ao ona faailoa atu e faapea o le tala  o le Samoa Mixed Touch Team, lea na manumalo i le Faailoga o le ‘Au o le Tausaga, o se tala uiga ese lea.

E leai se malae lautogia mo lenei taaloga,  ma e tatau ona faafetaia ma le loto atoa  i latou na pulea-ona o le fo’ia o faafitauli-ina ia ‘ausia le tulaga ua latou i ai i le asō.   Sa i luga o le fola e tali lea faailoga, Filoi Eneliko lea na ia faia se talosaga uiga ese i le malo ina ia tuuina atu se malae mo i latou. E leai se me matou te faataute’e ai i lea tamaitai..

E  le tau faailoa atu foi e faapea afai tatou te manaomia ni taunuuga e sili ona lelei; e tatau ona tatou tuuina atu se ‘ea  lea e lelei ma aoga mo tagata taaalo ma faalapotopotoga tau taaloga ina ia mafai ai ona latou faaatinoina lea tulaga.

O se vaega autu o lena tulaga o le tuuina atu lea ia i latou o avanoa faavae ina ia latou mafai ai ona ati a’e ma putiputi a tatou siamupini i le lumanai

E matua leai lava se masalo  e faapea e anoano le tulaga lelei tau taaloga o loo i totonu o Samoa i aso nei. Ae o le itu e faanoanoa ai ma le lalolagi o loo tatou soifua ai, o le na o le lelei e le lava lea. O le eseesega i le va o e tauva ma e faafoliga e taunuu uma lava i le tuufaatasiga aoao.

O le itu lea e faasio i tagata taaalo o loo atoatoa ona tausia i luga ma fao o le malae. Talu ai ona ua uma ona faailoa atu na tulaga, o le mea moni e faapea o le faalapotopotoga o taaloga a le atunuu sa salalau solo ma sa feagai ma ni fafitauli i le tele o tausaga. Ae tusa ai ma le aloa’ia o le tulaga e sili ona lelei i luga ma fafo o le malae, o le po o le Aso To’ana’i o se amataga uiga ese lea

E momoli atu le Faamalo ia i latou uma lava na manumalo faapea foi ma i latou na filifilia. 

Ia outou maua Samoa se Aso Lua e sili ona aoga, ma ia faamanuia atu le Atua!

© Samoa Observer 2016

Developed by Samoa Observer in Apia