Lagolagoina Tama’ita’i i Fa’amatalaga, Feso’ota’iga ma Galuega Tau-Tekonolosi

Tusia Fa’aliliu e Maiava ,

126 Hits

Rosemary Thew a’o alo i le a’oa’oina o le polokalame - Coder Dojo.

Rosemary Thew a’o alo i le a’oa’oina o le polokalame - Coder Dojo.

O le fa’atauaina o le Aso Fa’ava-o-malo mo Tama’ita’i o lo’o galulue i Vaega o Fa’amatalaga, Feso’ota’iga ma Galuega Tau Tekonolisi, na aloa’ia ai e le Digicel tama’ita’i faigaluega uma ua talenia i le fa’atinoga o galuega ia i so’o se vaega o le kamupani, e fa’afetaia ai lo latou sao aoga, ua fesoasoani ai i le fa’alauiloaina ma le fa’ateleina o le vaega tau Fa’amatalaga, Feso’ota’iga ma Tulaga Tau Tekonolosi ua iai nei. 

O le Iuni o Feso’ota’iga Fa’ava-o-malo (ITO), sa lala-mua i lea fa’amoemoe, aua lava le ‘ausia o se si’osi’omaga e fa’amalosia ai tama’ita’i talavou o le lalolagi, ina ia filifilia ma avea vaega ia ma a latou galuega tumau i le lumana’i. 

I le  lagolagoina o lea fa’amoemoe, sa finau ai fo’i le kamupani e fa’alauiloa ana atina’e ‘autu i totonu lava o a latou galuega, e tilofia ai le naunau e una’i le atina’eina o tama’ita’i i vaega tau-tekonolosi, e pei ona va’aia i le fa’ailogaina o le Aso mo Tama’ita’i i le vaiaso talu ai. 

E fiafia lava le Digicel, e amata-mea i lenei fa’amoemoe lelei mo Samoa. 

Na ta’ua e le Ofisa Sili o Pulega, o Rory Condon: “E matua talenia lava tagata-Samoa o lo’o i le kamupani nei, ma o le ‘afa o le pulega atoa, o tama’ita’i talenia tele.”

O Rosemary Thew – o se tasi o tama’ita’i talavou o lo’o galue nei i le Digicel - o se fa’ata’ita’iga lelei tele mo tama’ita’i o lo’o finau malosi i le vaega lenei tau-tekonolosi e pei ona ai va’aia i totonu o le kamupani. 

O Rosemary, o lo’o galue nei o se Tama’ita’i-Inisinia ae sa tele fo’i ona taimi na ‘auai ai i polokalame fa’aleA’oa’oga ma galuega fa’alauiloa sa faia mo le atunu’u atoa. O ia sa ta’ita’ia le polokalame e a’oa’oina ai le Coder-Dojo a le Digicel mo nofoaga i tua; o se tasi e finau mo Ta’ita’i Tama’ita’i a le Digicel ma o se faia’oga mo tamaiti-a’oga  o lo’o i Polokalame Fa’asikolasipi i mata’upu Tau Tekonolosi.   

O le polokalame lea o le Coder-Dojo o lo’o va’aia e Rosemary, o se polokalame fa’ava-o-malo o lo’o ta’ita’ia e latou e galulue-fua mo tupulaga talavou, ua fitu nei masina talu ona amata ma ua silia i le 20 tamaiti-a’oga ua ‘auai ai. O se tasi o latou nei e aofia ai Wainalei Ieremia, o se tama’ita’i-a’oga mai le Kolisi o Samoa, ua foufou e galuega i galuega nei Tau Fa’amatalaga, Feso’ota’iga ma Vaega o Tekonolosi i le lumana’i. 

I lana lauga na faia, na fa’amalosi’au ai Rosemary i tama’ita’i talavou sa ‘auai, ina ia latou filifilia galuega nei, e fa’afeto’ai ai fo’i le tala-masani, o galuega nei e patino lava mo ali’i. Sa ia fa’ailoa fo’i le mau ma le talitonuga “… e tu’u-mamao le silasila ma suia mafaufauga…”. 

 “Mai le tele o tausaga, o lo’o fa’aauau pea ona lagolagoina e le Digicel le to’atele o tagata-Samoa, ia ‘auai ma agava’a lelei i nei polokamale. E manuia le lumana’i  o tulaga tau-tekonolosi i Samoa nei ma ua tulaga mai i se tulaga lelei tele, le vasega o tama’ita’i mo le fa’aauauina o o latou lumana’i i vaega nei,” o le fa’aaliga lea a Condon. 

“O se vaega aoga tele feso’ota’iga ma fa’amatalaga tau-tekonolosi ma ua matua tele lava se suiga ua va’aia i nei vaitau o le soifua. Ma ua avea o se mana’oga o tagata uma ma ua fa’ananau ai pea e sa’ilia ma tu’u atu avanoa nei, mo tama’ita’i talavou o le atunu’u.” 

Mo le fa’amanatuina o le Aso Fa’ava-o-malo 2016 mo Tama’ita’i i Galuega Tau Fa’amatalaga, Feso’ota’iga ma Vaega Tau Tekonolosi, ua amata-mea ai le Digicel mo nisi o fuafuaga, e aofia ai le saunia o avanoa fa’aSikolasipi mo tama’ita’i o lo’o a’oa’oina i mata’upu ma galuega nei. E le’i leva nei fo’i ona amata se polokalame fa’agasolo e tolu vaega mo Ta’ita’i Tama’ita’i e aofia ai se mafutaga fa’aleA’oa’oga e fa (4) aso, o se mafutaga o fetufaa’iga ma fautuaga mai le pulega, fa’apea se polokalame e fa’amalosia atili ai tama’ita’i i totonu lava o galuega nei tau-tekonolosi.

© Samoa Observer 2016

Developed by Samoa Observer in Apia