O LA’U TALA FO’I

132 Hits

Faaalia e se tasi tamā i le Samoa Observer e faapea o le uaea eletise lea na pa’ū i luga o lana pa-uaea i lona fanua i Alafua i le taeao o le Aso Sa-ina ua te’a atu le afā o Amosa-ma sipaka atoa ai le pa-uaea o lona fanua-ma ua le mafai ai ona e o e fai se faatau mo le Aso Sa –ma o i le lotu i lena lava Aso Sa-o lea fo’i ua toe pa’ū fo’i i luga o lana pa.

Ae peita’i- e pei ona vaaia i le taeao ananafi-ua le na o le tasi le uaea eletise malosi ua toe pa’ū-a ua tolu uaea eletise malolosi ua toe to’ulu i lalo –ma o loo taatitia pea i luga o lana pa-uaea ma luga o le auala e feoa’i ai taavale a aiga- aemaise ai o nai aiga ma tamaiti a’oga-o loo uia lea auala i le ao ma le po.

O le fesili la-o lona uiga ‘ea e matua leai lava se faiga e mafai ai e le EPC ona iloa vaega eseese o le atunuu o loo tutupu ai faalavelavae faapenei tau le  motusia o uaea o molī poo uaea eletise?

A toe faaupu-o lona uiga e leai ni masini faa-ona-po nei- e mafai ai e le EPC ona iloa vaega uma o le atunuu o loo faaletonu ai le latou auaunaga ona o uaea eletise motusi pe ua to’ulu?

Afai la o le tali o le leai-o lona uiga- o lona uiga la-se’iloga lava foi e oti se tagata ona faatoa gaoioi foi lea! Ae o le itu e sili ona leaga-afai e na o le EPC lea e gaosia le eletise-o se mea tatau la ona faatamala ma faatalale?

E faapefea ona faatalale i tagata ia e totogiina le suau’u lea e vili ai le eletise-ma toe totogi aitalafu a le EPC ma toe totogi pili o latou moli?  O se mea amiotonu lea faiga?

Afai la e le o gafatia e le EPC ona matua faaleleia lana auaunaga mo le atunuu lautele-ia atonu o le taimi tonu lava lenei- ua tatau ai ona i ai se isi Fale Eletise- e tauva ma le EPC-ona faatoa mafai lea ona faaleleia atili a latou auaunaga! O le a sou taofi? 

2. Matauina i Tala Fou e faapea o loo i ai lava ni mataupu ua afaina ai soifua o tagata o loo faaauau pea ona fai i ai suesuega a le Ofisa o Leoleo.

O se tasi o ia mataupu-o se tina lea e 40 tausaga le matua- lea na maua e le o lavalavā ma ua maliu i se pa povi i Faleula-uta-ma o le tagata e faapea na fasiotia lea tina-ua le iloa pe o fea o le a maua ai.

Fai mai la le Fofoga o le Matagaluega o Leoleo o Su’a Muliaga Tiumalu-o le vaega o Leoleo i Faleata-o loo gafa ma lea suesuega. Ae o le itu e faanoanoa ai- e leai lava se faamatalaga lata mai nei e uiga i se tagata o loo masalomia-ae o le maliu o lea tina-sa matua faate’ia ai lana tane ma si a la fanau.

Ae peitai-e le ona pau lea o le mataupu o loo fai  i ai ia su’esu’ega-o loo aafia ai foi ma le mataupu i se tina lea na maua ua maliu i totonu o lona fale i Faleasi’u.

O le fesili la-o ai o faia ia suesuega-ae o i ai ni mea faigaluega e faatino ai ma ni tagata tomai faapitoa mo is suesuega? Aisea ua le talosagaina ai se fesoasoani a Leoleo o Niu Sila e pei ona masani ai? E faapefea pe afai e fai-fai nei suesuega ae le maua lava? O le a la le isi laasaga? 

3. Matauina ma le fiafia-aemaise ai o le faate’ia ai-o le polokalame o le Tina o le Tausaga! O le uiga o le fiafia ma le faate’ia-o isi tina sa i ai le manatu e le maoa’e faapea lo latou tomai e failauga-aemaise ai foi o le talenia o nisi i le matata tau le faasalalauina o taaloga e pei o le fusuaga a David Tua ma Shane Cameron.

O le isi foi tulaga uiga ese-o le gagana sa latou faaaogaina-o le masani ma le iloa lelei o suafa o tama fusu! A tuu ane foi i le lauga faa-Samoa-e matua maoa’e lava i lo nisi o failauga iloga o le atunuu!

Afai la o se tulaga lea ua ausia e tina i lenei vaitau-o le upu moni –o se tulaga lea ua tatau ona leva ona pa’ia e tina-pe a fua i le taimi nei ma le aafia o tina i mea tau polokiki-aemaise ai o le avea ma faipule o se itumalo!

O lona uiga la- e tatau ona matua tapena lelei-leaga o le a faafogafoga lelei mai le atunuu- ma e pei lava o le upu e masani ai-a lelei lava ona tiliva le fe’au pe lelei le faaupuga ma talia gofie-ona taunuu foi lea o le ‘auga o le lauga i totonu o le Palemene! O le a sou taofi?

© Samoa Observer 2016

Developed by Samoa Observer in Apia