Lipoti a le Komiti o Tupe Maua ma Tupe Totogi

46 Hits

O le Ta Aofaiga a le Palemene talu ai na fautuaina ai e le Komiti o Tupe Maua ma Tupe Totogi le Fono Aoao ina ia faautagia lana Lipoti.

Ma o le aotelega lea na ripotia mai le Ofisa o le Palemene.

P.P. 2017/2018 Nu. 161, Lipoti a le Komiti o Tupe Maua ma Tupe Totogi i le Tulafono Tau Faaofi o Teuteuga o le Tulafono o le Faafoega o Kasino ma Taaloga Eseese Tau Tupe (Nu. 2) 2017.

IUGAFONO: I le maea ai o iloiloga a le Komiti e fautuaina ai le Fono

Aoao ina ia faagasolo le:* “TULAFONO TAU FAAOFI O TEUTEUGA O LE TULAFONO O LE FAAFOEGA O KASINO MA TAALOGA ESEESE TAU TUPE (Nu. 2) 2017 FAATASI MA LE TEUTEUGA” MA LE FAASAOGA TULAFONO TUMAU 172:

E tusa ai ma aiaiga o le Tulafono Tumau 172, o le a avea ma tiute o le Komiti o Tupe Maua ma Tupe Totogi le:- • Iloiloina o so o se Tulafono Tau Faaofi, Talosaga po o nisi mataupu e tuuina atu iai e le Fono Aoao e tusa ai o Tulafono Tumau ma so o se Tala Faatatau o Tupe po o le toe iloiloga o le faatinoga o galuega faa-minisita ma

Matagaluega; • faasoa atu i so o se Komiti Faa-Palemene na te faatinoina suesuega o so o se Tala Faatatau o Tupe ma so o se iloiloga o le faatinoga o galuega a Matagaluega;

• suesueina o faiga faavae, faafoega ma tupe alu a Matagaluega ma Faalapotopotoga a le Malo e faasino i tupe a le Malo, inisiua, supaaneueta, faaputugatupe mo le lumanai manuia, lafoga, sueina faasuetusi o faamatalaga o tupe a le Malo ma faamatalaga tau tupe a Matagaluega;

• Iloiloga aoao o faafoega tau pulega o tupe i Matagaluega uma ma Faalapotopotoga a le Malo;

• Suesueina ma lipoti atu i faamatalaga o tupe a le Malo.

OTOOTOGA O SAILIILIGA: O sini autu o lenei Tulafono Tau Faaofi:- • O le teuteuina lea o le Tulafono Autu o le Faafoega o Kasino ina ia ogatasi ma le Tulafono o le Faafoega o

Taaloga Eseese Tau Tupe 2017 (Bingo, Ponesi, Lulu, Petipetiga mo Taui, Credit Promotions), e pei ona pasia e le Palemene i le aso 19 o Tesema 2017. O le faamoemoe o lenei Tulafono toe teuteu, ia tutusa le faatinoga o galuega a le Pulega i lalo o le Tulafono o le Faafoega o Taaloga Eseese Tau Tupe 2017, ma le Tulafono o le Faafoega o Kasino, ina ia le feteenai ma le Tulafono Autu i le faagaoioiga ma le faafoega o taaloga eseese tau tupe i se tulaga sologa lelei.

• Ua aiaia ai le tuusaunoaina o tupe maua a le Pulega mai lafoga o tupe maua, e tusa ma aiaiga o le Tulafono o Lafoga o Tupe Maua 2012. E pei ona faamaonia mai e le Pulega, o le finagalo o le Malo, ia ogatasi ia aiaiga ma isi foi

Faalapotopotoga Tumaoti o lo o agavaa i le tuusaunoaina o lafoga i luga o ana tupe mama. Na faamaonia mai foi e le Matagaluega mo Tupe Maua (MoR), o lo o ogatasi lea aiaiga ma le Tulafono o lo o faafoeina ai Faalapotopotoga

Tumaoti a le Malo, lea o lo o tuusaunoa ai lafoga mai tupe maua mama.

• O nisi o matafaioi aiaia a le Ofisa Sili o Pulega, e aofia ai le tausia ma le malupuipuia o le faamaufaailoga (common seal) a le Pulega, lea ua aiaia ai, na o ia e mafai ona tuuina atu sea faamaufaailoga i so o se pepa ua faamaonia ma aloaia.

• O le Ofisa Sili o Pulega e tofiaina tagata ofisa e tauaveina galuega ma tiute o tagata asiasi (inspectors). E talitonu le Komiti e tatau ona faamaonia e le Komiti Faafoe tofiga o le aufaigaluega e le Ofisa Sili o Pulega.

• Na faamautu e le Komiti lona lagolagoina o le teuteuga ua tuuina mai i le tulafono toe teuteu o Kasino, le siitia ai o tausaga mai i le 18 i le 21 tausaga, e le faatagaina i taaloga sue tupe i soo se nofoaga, e aofia ai ma taaloga o lo o faaaogaina ai televise, initaneti ma telefoni feaveai po o se isi lava fesootaiga faatekonolosi faaneionapo. Na tuliloa e le Komiti se faamaoniga a le Pulega o Taaloga

Saili Tupe i le taimi e faamuta ai le faaaogaina o TV ma initaneti e pei ona aiaia i le Teuteuga o le Tulafono o le Faafoega o Taaloga Eseese Tau Tupe (Gaming Control Act 2017). Na faailoa mai e le Pule Sili, o le aso 1 Me 2018 o le a faamamaluina ai le tulafono e pei ona taua i luga, ma o le a lē mafai ona toe faaaogaina ai upega tafailagi ma televise i ni taaloga saili tupe e aafia ai fanau e i lalo ifo o le 21 tausaga.

• Ua aiaia le mafai e le Pulega e ala i se faasilasilaga tusitusia ona faasa ma aveesea mai le Kasino se tagata ua talitonu le Pulega, o sea tagata o lo o auai, po o sa auai, po o sa fesootai ma tagata o lo o auai i; le taalo faimamago, taalo faagaoi po o se faiga faasolitulafono e le tusa ai ma taaloga eseese tau tupe. O le Pulega e tauala atu ai le fautuaga i se Kasino e faasa ai lea tagata. Ua iai aiaiga o le aafiaga o se Kasino pe a lē usitaia le Tulafono.

Afai ua tuuina atu le faasilasilaga i le Kasino ae mulimuli ane iloa e le Pulega o lo o iai pea lea tagata, o le a faatino loa aulape o le Tulafono e ala i faasalaga tau tupe e pei ona aiaia ai le aofaiga e 100 iunite tau faasalaga. O o’ooga o lea tulaga, e ono oo atu ai lava i le aveesea o le laisene.

O le agaga, ia mafai ona tausisia ma amanaia e i latou ua tuuina atu iai laisene, ia aiaiga o le Tulafono. E ui o lea galuega e faatino e ofisa asiasi, ae e tapa lava le fesoasoani a Malu o le Malo (Leoleo) pe a moomia. Sa faailoa mai foi e le Matagaluega o Leoleo, lo latou tali atu i so o se talosaga mo se fesoasoani ma faatino le latou malosiaga faaletulafono e pei foi ona aiaia i le Tulafono o Malosiaga  Tau Leoleo 2007 ma le Tulafono o Galuega Tau Leoleo

2009. • O i latou uma ua umia laisene e pei ona aiaia i le Tulafono Autu o le Faafoega o Kasino 2010 le totogiina atu o le 15% o komisi i luga o tupe mama a le Kasino i le Pulega.

O le matafaioi a Ofisa Asiasi (Inspectors) o le mataituina lea o le faafoeina o taaloga eseese tau tupe i aiaiga o le tulafono.

• O le a faaauau pea ona faatino e le Komiti Faatino o Sooupu o Masini e Faamaumau ai Peti Taitasi (Totalisator Agency Board) ia malosiaga, tiute ma galuega tauave a le Komiti Faatino o le Pulega, seia vagana ua faamutaina e

Le Ao o le Malo i luga o le fautuaga a le Kapeneta. O le a i le Kapeneta le faitalia e tofia ai se Komiti Faatino e sui tulaga i le Komiti Faatino o lo o i lalo o le TAB pe a pasia.

© Samoa Observer 2016

Developed by Samoa Observer in Apia