“Tulai ia, ia sopo’ia atu Ioritana lenā”

Tusia Petaia Setu ,

508 Hits

Petaia Setu

Petaia Setu

(Iosua 01:02)

O moomooga o taimi faapea, ‘Ia pa’ū se toa ae tula’i se toa’. ‘E soo le ‘afa male ‘afa; o le fau foi ma le fau’. Ina ia faauauina pea mamalu o se nofo; o le mamana o pulega; a o le tauleleia ma tamaliiga sa tu ai sea aiga, nuu poo le itumālō.

Ina ia faufau mamau fausaga o le maota poo le laoa; ia lelei mata’afa foi mamanu o ona ata. Ua leai se perofeta na tu mai ia Isaraelu e pei o Mose (Teuterenome 34:10-12). Peitai, ua oti Mose, ae le i oo le nuu i le totonugalemu o lo latou faasinomaga.

Ua gase toa; a o le faamoemoe e le toloa. 

Ua manaomia se toa. O se tagata e telē le fatu. E mătua le tōfā. Ua masani le faalogo ma le vaai. Na te lavātia le māmā ma le mamafa; le faigofie ma le faigata. E mata’u i le Atua, ma alofa i le nuu.

E ui ina tama-tama Iosua, a o agavaa ia ua silasila iai le Atua. Ua fetalai atu Ieova ia Iosua, “Ua oti Mose la’u auauna. O lenei, inā tula’i ia, ia sopoia atu Ioritana lena”. 

O le Ioritana, o le vai tele lea o loo tafe mai luga i le sami o Kalilaia ae gase i lalo i le sami Oona (Dead Sea). O Isaraelu lea o loo ua tolauapi i Setima. O le itu i sasa’e o le Ioritana e feagai tonu ma le vai.

O le sopoia atu o Ioritana e le faigofie. A o le faatonuga, “Kolosi le Ioritana”. Faapefea tamā ma tinā matutua? O le ā le fuafuaga i fafine ma tamaiti? E tafefea faatasi ma uta ma lafu manu? E faapefea ona tapena le silia ma le tolu miliona tagata mo le kolosina o le vai, i aso e tolu o loo totoe?

Manatua, e mai le Atua le faatonuga. E mai le Atua foi lona faataunuuga. Auā e leai se mea e tasi e faigata i le Atua. E mafaia e le Atua mea uma lava. (Mataio 19:26) 

O le amataga mai o le Esoto, na vaeluaina ai e le Atua le Sami Ulaula i le taitaiina a Mose. O le faaiuga lenei o le Esoto, a o le amataga o Iosua – Ia sopoia le Ioritana.

O le talitonuga, o mea faigata ua finagalo ai le Atua ia te oe, e te vaai tino ai i le mamalu o le Atua. O fītā ua tofotofoina ai oe e le Alii, e te molimauina ai le silisili ese o le Alii I lona mana, o lana pule, ma lona alofa.

A o le faaaogaina e le Atua o le tagata faatuatua ma mata’u i le Atua, o ala lava o le Atua. E leai ni vaa leai ni ala laupapa. Ae iai le ala a le Atua. Na te faasino tagata uma i le faasinomaga e mulimuli iai.

Ua faapea le upu a Matini Luteru, “Ou te le iloa le ala ua Ia (Iesu Keriso) taitaiina ai a’u; ae ou te iloa lelei lava lo’u Taitai”. O lona faasinomaga, o Iesu Keriso. Manatua le tagata sa pe lona lima ma faatonu e Iesu e fai le mea na te le mafaia ona fai (Mareko 3:5).

Ioe, ia faasa’o i luma lona lima! Na taumafai lea tagata e fai e ui e faigata, ae na faafaigofie e Keriso. O le ala e faasa’o ai i luma le lima ua pe, o le faaloaloa faasa’o i luma. O le ala e kolosi ai le Ioritana, o le savali iai e kolosi.

O le ala e mafai ai mea faigata, o le tofu iai i faigata (Iona 1:12). O le faatonuga poo le malelega a le Atua, o loo atagia ai se amataga fou; o se pulega fou; ma se laasaga fou.

E masani ona tatou faalogo i toeaiina, “E iloa le tautai i aso leaga” Talofa ia Iosua, ua amata lava lona tula’i mai i le faamalumalu mai o le vai o Ioritana. Ua fesāgai ma faigata. Peitai, o ala ua faataoto e le Atua.

O manogi ia o se amataga fou. Tulai mai! Tu galue! Tu ola! O le tu e ola iai aiga. E tua iai le nuu, le ekalesia, le mālō. O le tu tāpena! E saunia i aso leaga. E talitigā i taimi faigata. O le tu mautinoa (faatuatua), ua oti Mose, ae le o le Atua.

O le feto’ai ma Ioritana, o le suamalie lea o le amataga fou. O la le Atua, “ou te le tuua lava oe (f.5)”. Tulai ia! O le taiala ma le pulega masani o le Esoto, o le ao faaniutu ma le afi faanuitū. O nei, o le atolaau o le feagaiga.

O le malosi lea na vaeluaina le vai o Ioritana. Ua saoloto ai le la’ala’a, le setusetu, le tolotolo, le mo’emo’e, e faamatala le pule ma le silisili ese o le Atua o loo afio i le atolaau o le feagaiga a Ieova le Atua o Isaraelu. Kolosi!

Ia sopoia! Ona ā lea? Se ā se lelei i le sopoia o Ioritana? O le sopoia o Ioritana, o le tini o le folafolaga (Kenese 12:7) O le taunuuga lea i le tofi sa folafola ia Aperaamo. O le laasaga fou lea. ‘A lē uia Ioritana, e le o se suli oe o le folafolaga.

A ‘e le sosōlia le ilititai mātūtū o Ioritana, e te le lagonaina le lololo o le susu ma le suamalie o le meli i Kanana.  

Samoa e, o tofiga uma e tautua. O galuega uma foi e iai faafitauli. A o faiva uma foi e tapua’ia. O le faaaogaina o oe ma a’u e le Atua, na o le Atua lava na te silafia. Le loto sa faapolopolo e Iosua e fai ma toomaga o le au matutua.

E fai ma mapusaga o le pologa. E fale iai le mativa. E ola ai le ma’i. E manuia ai tupulaga fai a’e. E pepese ai manu felelei. E ‘oa ai lou gataifale. E fua taulaulau ai lou lauelele. E tutumu ai ou fale saito.

E popoto ai au fanau. O lou valaauina lena. E tofi e le Atua. E faasino e le Atua. O loo tapuaia e le Atua. 

E le mafai ona e lagona le suamalie o ou faivā taitai, pe a e le alu ifo i lalo i le alititai o loo tau tootoo atu ai le au vaivai. O totonu o le Ioritana, o loo iai le tele o puapuagā ma faigata. Tumu I faafitauli.

O la le Atua ia Iosua – Ia ui ai. Kolosi! Tofo iai! Fai mai Paulo, “sa tamaoaiga Keriso, a ua faamativaina ona o outou, ina ia outou ola i lona mativa”. (2 Korinito 8:9)

“Ua ou iloa le mativa, ua ou iloa foi le mauoa, o i mea uma lava ou te iai……ua a’oa’oina a’u ia ou mā’ona, ma ou fia ai, ia faula’i mai mea, ma ia oge mea”. (Filipi 4:12). O le uia o puapuagā, o faailoga na o le toa. 

Lou atunuu e, ua oti Mose, ae le i oti le Atua. E soifua pea Ia e faavavau. E le vaoia e se tasi le tōfā paia a le Atua. O lana faasinomaga, tatou o ai. O lana upu, tatou te faalogo iai. O ona ala, tatou te savavali ma mulimuli ai.

O mea uma ua faigata, tatou punonou ai ma le loto faatuatua. Auā o Ia e faigofie ai mea uma lava. Ia outou faamalosi ma loto tetele, auā o iai Kanana Fou, ina ua tuanai o Ioritana. 

Tulai ia, ia sopoia atu Ioritana lenā.  

 Amene

Petaia Setu

E-mail: petaiasetu@gmail.com

7737063

© Samoa Observer 2016

Developed by Samoa Observer in Apia