O ‘OE MA LAU FILIFILIGA TATAU

878 Hits

O loo ua sina nei le galu ma ua api le uli 

Ua ‘I’ite fanua-a-lalo ma ua lalata le vaiva’a

O lele ua faatumuaava lo ta sa Samoa

E ala I lau faigafilifiliga mo ni Ta’ita’I o si o tatou atunuu

Ua toe o se aga ona faataunu’uina lea o le faamoemoe

Aua lau Faiga Palota tele I lenei masina 

 

E le feagai le matapia ma le manaia 

E le aoa’ia foi e Laupua Tamafaiga

Ae ua na o se tu’ualalo ma se taufagufagu

Ina ia aua ne’i faoa lou tofi I le ‘ai e tasi 

Vaai i ta’ua nei valetuulima la ta faigafilifiliga.

Aua o la ta filifiliga ta te manuia ai 

O la ta filifiliga foi ta te malaia ai. 

O le filifiliga e manuia ma malaia ai o ta aiga, nu’u, itumalo ma le atunuu 

 

O le saunoaga a le Afioga I le Ali’I Palemia 

Sei o tatou toe tepa tasi lava I tua 

O a ni galuega lelei sa faia e le sui tauva 

I totonu o lo tatou nuu ma le itumalo I tausaga ua alu? 

Ae aua nei faaseseina lau faigafilifiliga I ni tupe, pia, faiga tusifolau ma taugaapu

Na faatoa faatinoina nei e le sui tauva ina ua alu I le palota 

O le foai na faatoa faia ina ua manao 

E le o se alofa moni le mea lena ao o le taufaavalea

Manatu I galuega lelei sa faia e le sui tauva 

Mo le nuu ma le itumalo I tausaga ua tuanai e oo mai lava I le aso 

O upu a le atunuu “E manatua Pule ae le manatua Faalaeo” 

O le moni ma le faamaoni o le alofa e ao ona manatua 

Ae le o le faato’a amanaiaina o lou mativa ina ua alu I le palota 

Aua e manumalo loa lava e le toe fia feiloai ia te oe

Faatoa toe ataata atu foi pea sauna i le isi Faiga Palota 

Fai lau filifiliga ma lou mata’u I le Atua 

O le filifiliga poto lena e i’u I le manuia 

Manatu I lau palota ina ia aoga 

Aua e maumau lau palota pe afai e fua I luga o se tamaoaiga

Na faatoa tuuina faatopetope atu nei I ou lima 

Palota I le sui tauva ua leva ona tautua I le nuu ma le itumalo 

Ae le o le sui tauva faatoa tautua nei I le taimi o le faiga palota 

Aua o Iesu, “O le ala I le pule o le tautua.” 

 

Ia manuia tele lau faigafilifiliga Samoa. 

 

Soifua, 

 

Sola Vaifale Ati 

Leauva’a

© Samoa Observer 2016

Developed by Samoa Observer in Apia