Pai Mulitalo Ale

Faaliliu e Seagaitumua Tupuola

Ua falepuipui se tina e 36 tausaga le matua mo le 18 masina ona o le gaoi a’o avea ma tagata faigaluega.

O lea faasalaga mo Samantha Tavita na tuuina atu e le Alii Faamasino o Vui Clarence Nelson ina ua mae’a ona ia ioe i le nofosala i ni moliaga se lua o le gaoi a’o avea ma tagata faigaluega. 

O Tavita sa galuega e avea ma Area Manager mo le vaega Tau Oloa Faatau Atu ma le Maketiina i le Vailima Breweries –o le taimi lea na tuua’ia ai o ia i le gaoia o le $12,960 mai le kamupani. 

I le faagasologa o le fofogaina o lea mataupu-sa finauina e le loia a Tavita o Leota Tima Leavai e faapea e le’i gaoia e lana paaga lea tupe.

Ae fai mai a ia o lea tupe na leiloa a’o ia te ia. Fai mai Leota na ta’utino e lana paaga e faapea o lea tupe na tuuina atu ia te ia-i le va o ia ma le ofisa, ua leiloa.

Na faailoa atu foi e lea tamaitai i le faamasinoga ua uma ona totogi e Tavita le $12,000 i le itu tagi ma o loo i ai ana fuafuaga e totogi le tupe o loo totoe e $960 i le vaiaso o i luma.

Na talosagaina e le loia le Faamasinoga e faapea o lea solitulafono e tatau ona faatatauina i se tulaga maulalo tau soligatulafono ona o le mea moni e faapea e le’i faaaogaina e lana paaga lea tupe mo ia lava. 

Ae peitai na faalava le Alii Faamasino o Vui ma ta’u atu ia Leota e le talia e le Faamasinoga lana finauga. “Sa tatau ia te ia ona faapea mai e le nofosala o ia ma faagasolo loa lau tete’e,” o le faaaliga lea a le Alii Faamasino o Vui.

I le tuuina mai la o lana faaiuga, fai mai le Alii Faamasino o Vui ua faalata e Tavita le faatuatuaga sa tuuina atu ia te ia e le pule o lana galuega. “Ua e soli lea faatuatuaga. Ua e gaoi le $12,960 ma o se aofaiga tele lea o tupe.” 

Ae mo le talosaga i le Faamasinoga ina ia faatatauina lea mataupu i le tulaga maulalo tau solitulafono, sa le talia e le Alii Faamasino o Vui.

Fai mai a ia o le gaoi mai se supamaketi o se solitulafono tulaga maulalo lea ae o le gaoi mai le tagata e ou le galuega e le talia. 

“E ese le mataupu lenei. O se solitulafono masani lea i totonu o Samoa ma e mafi ai tele tina talavou. Ou te vaaia ia i latou i totonu o la’u faamasinoga i Aso Gafua uma.” Sa faamamafa foi e le Alii Faamasino o Vui e faapea ua na malamalala lelei i le unaiga malosi o loo feagai ma le toatele o tagata faigaluea i le itu i noataga tau le aiga.

Ae peitai-e le avea lena ma mea e faapea ai e tatau ona latou gaoi. Ua uma ona ‘ou auina atu tina talavou i Tafa’igata mo lenei solitulfono. O se mea faigata tele le auina o i latou i le falepuipui talu ai-e leai se sala a le aiga ma tamaiti. Ua avea i latou ma e ua aafia ia outou faiga.” “Afai o e mafaufau e fai lenei solifulafono, o lou taunuuga o Tafa’igata.”