O SAMOA O LE ATUNUU TOFI AE LE O SE ATUNUU TALIOLA

481 Hits

O Samoa o le atunuu tofi-ae le o se atunuu taliola. O upu ta’oto ia o Samoa e faavae ai le taofi- e tasi le tofi o Samoa i lona laueleele, lana gagana ma lana aganuu. O le ala lea e fai ai lona tuaoi eleele, ae faaeva i le ava fatafata lona tuaoi tagata, ae tiu i le faaaloalo.

O le tofi o Samoa i lona eleele, lana gagana ma lana aganuu-e fanau mai ai le aia tatau a ona tagata-lea e ala ai ona mitamita le tagata Samoa e taofi mau i lona tofi mai le Atua. Le tofi lea e le mafai ona faatauina i ni tupe, taumafa poo se tasi lava mea.

E le mafai ona faatauina i le ‘ai e tasi aua e tuufaasolo e lana aganuu i e ua soifua mai se’ia o’o lava i le fuaga o lalovaoa.  Le tofi foi lenei e ala ai ona vaai mamao le matai Samoa-ae atamai ai i le tofā ma le uta mamao.  Ae pagā lea-o le tofi lenei o le tagata Samoa i lana aia tatau-ua amata nei ona faasaga le faatosina o faiga-Palota e tu’ipala.

Ua fe’alamua’i solo taavale ma tagatupe ma taumafa e tele faatasi ai ma upu suamalie-e faatau ai le aia tatau a le tagata palota- e palota ai i lana lava filifiliga tonu mai le Atua. O isi afioaga ma alalafaga ua pei o le uaga o faamanuiaga le to’ulu faalausoso’o atu o tupe, pusa mamoe, apa eleni i lenei lava vaitau ae le masani ai.

O taavale foi o loo fela’ua’i  ai nei taumafa ma tupe faatosina i aso uma e fesuisuia’i lava. O nisi taavale-o le pasese o tama’ita’i, poo ni faletua, a’o isi o alii ma tamaitai e foliga mai o se Tala’iga fou i se Mesia o faatali!. O le mea ua tupu-ua faaletonu tagata palota pe o le a le uiga o nei mea-aua foi ua te’i lava  ua tufa mai nei manuia ae le masani ai.

O nisi ua tufa fua pusa lavalava mai fafo. Talofa i le atunuu ua fememea’i aua ua le iloa pe mamala nei mea pe leai. O nisi nuu ua mumusu e talia pe faaaoga ia mea ne’i ‘emo ane le ata o ni mea mai le vete. Peiseai o le pogai lea o le agaga se’i o ta talanoa, atonu e aoga foi sa’u vailaau e fesoasoani atu ai i lau faaletonu ina ia mafai lava ona faaaoga i taimi uma lau lava aia tatau e fai ai lau filifiliga i le sui faatu e te lagolagoina.

O se taofi la e faapea-aua e te fefe e faaaoga tupe ma taumafa na e la’u atu- aua e te le falepuipui ai. O le tasi itu, e te le’i fai atu e aumai ni tupe, mamoe ma ni eleni. O latou lava i le avatu fua o na mea.

O le uiga la o le fautuaga, matua faasaga ane lava e taumafa tupe, mamoe, eleni ma pia na e avatu-ae o le mea e aupito i sili ona taua-“ia sa’o lau ekisi”-aua o tupe, taumafa ma pia na e la’u atu- e gata lava i le taimi e tapuni ai le Fale Palota, e le toe sili atu. E leai ni tupe, taumafa ma ni pia e toe tufa atu pe a uma le Palota. Ia e manatua le itu taua lenei-o lea ua ta’i lima tausaga o le paeaiga a le Palemene.

O lona uiga-e puupuu le taimi lea e te taaalo ai nei tama ma faa-felelei solo tupe ma taumafa, ae lima tausaga e te mole ai. Afai la e te faatalale i le faaaogaina tatau o lau aia tatau, e mole oe pe afai o le matai, ae sili ai ona mole ma falŏlŏ si au fanau-talu ai ona o le a le tagolima. Afai la o matitiva lou aiga, e pogai ‘ea i lou faatitipa poo le le galue. E pogai ona ua le lava lau faasoa ona ua taugata le tau o le soifuaga.

O le a le pine o lea mau?  E to’afia alo ma fanau o loo feoa’i solo i Apia e faatau atu salu, faausi, tauaga, faalifu-ufi, tamato ma isi mea? O le tali-ua e mativa! O fea sa i ai nei tamaiti a’o Palemia Mataafa, Tamasese ma Tupuola Efi? Ia atonu e te faapea mai leaga sa maulalo le Tau o le Soifuaga i na aso-ae ia manatua la-ua ala ona taugata le tau o le soifuaga ona o le VAGST lea e saili ai tupe a le Malo i ola o tagata!

A’o alo atu la le atunuu i lana Faiga-Palota Lautele-atonu e aoga ona e silasila toto’a i le tulaga pagatia o loo i ai nei le atunuu ma fai i ai sau fuafuaga-ina ia mafai ai ona lavea’ina Samoa mai le tulaga pagatia ua i ai nei! Ia manuia tele le alo atu o Samoa i le Faiga-Palota Lautele!

© Samoa Observer 2016

Developed by Samoa Observer in Apia