O LA’U TALA FO’I

03 March 2016, 12:00AM

1. Matauina i le Televise ma Tala Fou le to’atele o sui faatutū mo le faiga-palota o loma nei-ma ua matauina foi le toatele o sui tama’ita’i ua tula’i mai e fia tauva mo le tofi faipule o latou itumalo!

O le mea lea sa moomoo i ai le agaga-aua foi e mai lava i le amataga o le Malo Tuto’atasi o Samoa- sa tapua’i lava tama’itai-ae lafo i le itupa o alii poo latou tuagane- e faafoeina le Malo i nei tausaga e tele. I lenei la vaitau- ua matauina le matua tulai mai o le itupa o tamaitai- e fia tauva mo le tofi faipule! I le aoao tetele la-e leai se mea e tasi o afaina ai! Talu ai- a tu’u loa i le va nonofo ai o le tuagane ma le tuafafine e tusa ai ma le aganuu ma le faa-Samoa-“o le mea lava e finagalo ai le tama Sa poo lau Feagaiga-o le mea lena e tatau ona fai.

O lona uiga la- e le o se mea fou pe faatauanauina foi e tamaitai Samoa le ta’ita’iga o se Malo! A tatou manatu ia Nafafua, Salamasina ma isi- o tamaitai lava sa pulea le atunuu atoa!

E leai la se mea e afaina ai pe a tula’i mai se faiga-malo e faafoe e tamaitai! Ua toatele tamaitai atamamai ma le aoaoina lelei! O le mea lea- afai ua tatou fiu i le faigamalo o loo i ai nei- e leai ma se mea e tasi e taofia ai le faafoeina o le Malo o Samoa e se tamaitai. E talitonu foi le faamoemoe-se’iloga lava e tulai mai se faigamalo e faafoe e se tamaitai-ona faatoa mafai lea ona faasa’o ma fai le amiotonu ma le faamasinoga-i faiga pi’opi’o a le faigamalo lea ua maumau ai le faitau miliona ma miliona o tupe a le atunuu-ae o lea lava e taofiofi e le faigamalo-e le o tuuina atu i le Faamasinoga.

E tatau foi ona tilotilo lea faigamalo fou a Tamaitai i taupulepulega leaga a le aufaigaluega a le Malo-na mafua ai ona faaaoga sese tupe a le atunuu! E pulunaunau atu la nei mea uma-leaga o lea e matitiva masaesae le atunuu!

O le fesili la- faamata e matitiva faapenei le atunuu pe pe ana faaaoga ma le tatau ia miliona ma miliona mo le manuia o le atunuu? A tatou tilotilo la i na miliona ma miliona ua maumau i faiga pi’opi’o a le faigamalo- toe tilotilo i le aitalafu i fafo lea ua $1.7 piliona-o le fesili la mo le atunuu a’o alo atu i le faiga-palota- “O AI E TOTOGIINA’?  O le a sou taofi? 

2. Matauina foi i Tala Fou le osofa’ia e se pagota- o se tusitala o tala fou a le Samoa Observer-o le pagota lenei e igoa o Faigame Vaitoelau. O le fesili la-o le a le pogai ua mafai ai e lenei pagota ona osofa’i se tagata ae o loo falepuipui? E faataga e Leoleo ma le Tulafono ia faiga i se nofoaga faitele aemaise ai o fafo ane o le Faamasinoga? Afai o ni pagota o loo mana’omia i luma o le faamasinoga-o fea o i ai filifli sa tatau ona loka ai ona ta’ita’i atu lea i luma o le Faamasinoga?

E matua mata’utia lenei mea ua tupu mai-aemaise ai o se pagota na avatu e tulai i luma o le Faamasinoga e tali atu i ona moliaga- ae o lea ua faasaga ane osofa’i le tusitala o tala fou –ona o le ita i le faasalalau so’o i nusipea o ana faiga solitulafono! Afai la ua mafai e lea pagota ona osofa’i se tusitala o tala fou- e faapefea la ona le mafai e lea pagota ona osofa’i o soo se tagata o loo ita i ai?

Sa tatau i Leoleo ona manatua lelei- o le pagota lea tagata-ma sa le tatau ona tuufau e peiseai o se tagata sa’oloto! Sa tatau ona saisai i ni filifili faatoa tatala ese pe a uma ona lau lona faasalaga! A faapefea la ona saogalemu le atunuu pe a faatamala nei Leoleo? E peiseai o le a pulea le atunuu e pagota ma tagata solitulafono talu ai le faatalale i tiute fai aua le saogalemu o le atunuu. Faapefea pe ana tupu se faalavelave i le Tusitala o Tala Fou? O le a le mea a Leoleo e mafai ona fai i ai?  O le a sou taofi? 

3. Matauina foi i Tala Fou se tasi o tina e faapea ua tuuina atu i le Falepuipui ona o le gaoi a’o avea ma tagata faigaluega. O se tala lenei ou te le fia talanoa i ai pe a faitau atu i le saunoaga a le Alii Faamasino o Vui Clarence Nelson-aua o le lagona lea o soo se tama e faalagolago i le tina o le aiga-aemaise ai lava o le aiga ma le fanau lea ua tuua-ae leai sa latou sala.

O lona uiga la- o lea ua fafa i le fanau le sala a le tina! Ia – e leai lava se isi e tio-aua ua faigata tele nei aso ma le mativa ua i ai le atunuu-aemaise ai o le taugata o le soifuaga. Ia –poo le a lava le pogai o lenei mea ua tupu i sia tina, o le upu moni lava-ua matua matitiva lava le atunuu!

A fiu loa i le mativa-ona alu loa lea talepe le fale o le isi aiga-pe gaoi foi meatotino ma tupe a le isi tagata! Ae poo le a lava-o le upu lava a le atunuu-‘e poto lava le tautai ae se lana atu i ama’-o lona uiga- e i ai lava le taimi e sasi ai pe faatamala ai!

Ae o le fautuaga e le fai a’i- ia silasila muamua lava i mata o le fanau-ona fuafua lea i ai o le gaoioiga-aua o soo se lape lava ma le faaletonu-o le a tauave e le fanau i taimi uma e ola ai-talu ai le loto leaga ma le mata’u’ā o tagata! O le a sou taofi? 

4. Ia-ua toe o se aga ona ta lea o le logo o le Faiga-Palota-ma o le upu moni- ua leva ona oli nuu ma itumalo mo lea faamoemoe!  O le tulaga foi ua mautinoa- e matua anoano faiga faatosina sa faatino ma o loo faatino pea lava se’ia ta le logo.

O le fesili tele lava mo le atunuu atoa a’o alo atu mo le faiga-palota- afai e lua lava mataupu e fai i ai lau filifiliga- e tatau la ona faapea- e te palota mo lou manuia poo lou malaia! Afai o le manuia-o le fesili- o le manuia o ai? O e fia manuia pe leai? E faapefea lou aiga-lau fanau ma tagata uma o lou aiga? E te loto ia latou maua le manuia pe leai?

O le manuia lea e faigata tele ona saili! Aisea? Leaga e i ai tagata e na o lo latou lava manuia e kea i ai-ae le kea i manuia o isi! Afai la e te palota mo lou Malaia- ia e manatua la-o le malaia lena e amata ia te oe ma lau fanau-ona faasolo atu ai lea i lou aiga-nu’u ma le itumalo! A o’o la ina malaia lou aiga, nuu ma le itumalo-o lona taunuuga- o le malaia o le atunuu atoa! O le mea lea-e na ona faataatia atu ai  i ou tafatafa-‘palota i le mea e te manuia ai i le olaga atoa-ae le o le mea e malaia ai!. O le a sou taofi?

03 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>