‘Ia manuia uma fanau’ – Tofi Pulenu’u o Toamua

192 Hits

TOFI PULENUU O TOAMUA : Leaoaniu Patolo ‘Ale

TOFI PULENUU O TOAMUA : Leaoaniu Patolo ‘Ale

Ripotia e liā L Likou

Fa’aliliu e Maiava

 

O lo’o tatalo le pulenu’u o le afio’aga o Toamua, le Tofa a Leaoaniu Patolo ‘Ale i le mamalu o le atunu’u, ina ia galulue fa’atasi mo le tu’u-itiitia o se tasi o fa’afitauli ua f’a’eteteleina i lenei vaitau, o le tutuli lea o fanau e fa’atau oloa i magaala o le taulaga fa’apea isi nofoaga  tumutumu.  

I se fa’atalanoaga ma le Samoa Observer i le Aso To’ona’i talu ai, na fa’amanatu ai e Leaoaniu i le mamalu o le atunu’u, le taua o le galulue fa’atasi aua o le matafaioi lea e fitoi tonu i tagata uma.

“E seāseā iai nisi o lenei nu’u… ni tamaiti e tutuli e fa’atau-solo oloa i magaala.

“Atonu o iai nisi… ae ‘ou te le o māua i lenei taimi…aua e iai lava tapu a le nu’u nei e taofia ai so’o se tasi, ae maise lava o matua mai le tutuli o fanau e fa’atau-solo oloa ia ma so’o se mea fa’apena i taimi o le aso, a’o fai a’oga.

“O le tapu lea ua leva lava ona soalaupule e ‘Ale ma ‘Ulu ma Aiga ma le nu’u nei, e li’oli’o ai fanau mai le faia o lena mea ae le-o i a’oga, ae maise i le taimi o laiti.”

E talitonu le tofi o le afio’aga, o le a’oa’oina lelei o alo ma fanau e manuia ai le atunu’u i le aga’i i luma.

“Ua silafia lelei e le malo, o matua, ae maise pulega a ali’i ma faipule o afio’aga ma alalafaga ta’itasi, a ‘ave fanau i a’oga ma a’oa’oina lelei, e mautinoa le lumana’i manuia o le atunu’u ma manuia ai fo’i aiga ma ekalesia.

“E tele lava le sao aoga o tupulaga nei mo le atina’e o le tamaoaiga o Samoa.

“Ae a fa’atuputupuina pea le mea lea o le tutuli o fanau e fa’atau-oloa ae le o i a’oga, e le o se tulaga talafeagai tele.

“Pei lava o ‘upu masani: “A vale tu’ulima le asō, e afaina le lumana’i.

“Tatou te iloa uma le mea e o’o iai le atunu’u lenei pe a fa’ateleina le fa’afitauli lea i le isi 10 i le 20 tausaga i le lumana’i.

 “E le o se tulaga lelei lea – e le matagofie i le va’ai.” “O a’oga lava le fa’avae mausali e manuia ai fanau ma le atunu’u.

“O lo tatou tiute lea ma le tofi, ia tutu-fa’atasi e lagolagoina le una’i o fanau i a’oga. E tatau ona fai o se tulafono e fa’amalosia ai le ‘ave o fanau i a’oga, i lenei fo’i tausaga fou ua amatalia. “O lo matou nei nu’u, matou te tausisi lava i le tulafono – e ‘ave a matou fanau i a’oga – tu’u le avanoa i so’o se tamaititi e sa’ili ai lona lumana’i manuia.

 “O le tulaga masani lava… a fa’aaoga lelei meaalofa foa’i-fua mai Luga – e fesoasoani le isi Samoa i le isi Samoa pei o ‘upu o le pese – tatou galulue fa’atasi manu o ao, e manuia ai mea uma.”

Na ta’ua fo’i e Leaoaniu, o lo’o silasila le pule a ali’i ma faipule o le afio’aga, o lo’o tatala pea le tofa ma le moe e sa’ili’ili-matagi aua le fa’aleleia o tulaga tau-a’oa’oga aua fanau lalovaoa.

“A tatou le-fesoasoani nei i fanau – o ai o le a maua ai se fesoasoani a-taeao? E le fa’atali fo’i le taimi ia tatou… ne’i tuai a tatou fuafuaga. 

“O Matagaluega a le malo e tatau ona fa’amalosia tulafono ua mae’a-fa’ata’oto – e tatau fo’i i le malo ona sa’ili fofo e taofia ai le fa’afitauli lea ua fa’asolo ina fa’ateteleina, o le tele o fanau ua le-a’o’oga ae feoa’i solo e fa’atau oloa i so’o se magaala. Ae ao lava ona tatou tausisi i tulafono mo se manuia o fanau mo a taeao” 

© Samoa Observer 2016

Developed by Samoa Observer in Apia