O LA’U TALA FO’I

165 Hits

1. Matauina i Tala Fou se tasi foi o fuafuaga aoga tau femalagaiga i totonu o le atunuu. O lea la fuafuaga e faasino i se kamupani vaalele fou e igoa o le Talofa Airways Limited poo le (TAL) ma o lea fuafuaga e tusa ai ma Tala Fou-o se fuafuaga ua leva ona faata’oto ma o lea o le a tino mai. 

O le faaaliga la a Taua Fatu Tielu lea sa avea muamua ma Ofisa Pule o le Kamupani Vaalele a le Polenesia-fai mai Taua- o Jeffery o loo i Amerika e aumai se vaalele o le Twin Commander. O lea la kamupani vaalele fou o le a felelea’i i totonu o le Pasefika e aofia ai ma Amerika Samoa-ma o le a faigofie ai femalagaiga i totonu  o le Pasefika! Ia atonu o se tala fiafia lea mo i tatou uma-aimaise ai lava i Samoa nei.O le mea la ua mautinoa-o le a faigofie ai femalagaiga-ae o le itu e sili ona taua-pe afai o le a mafai ai ona faaitiitia le tau o pasese. Ia atonu o le itu lea e lelei ai le faiga faa-tauavaga-aua a lava ma toetoe ala o femalagaiga-o le a mafai foi ona fai le filifiliga a le tagata malaga lava ia! O le a sou taofi? 

2. Matauina foi i Tala Fou se ulutala fai mai o pagota faafitauli foi ia ua toe tutu i luma o le Faamasinoga. O loo toe faaupu mai foi e faapea o i la’ua ia e sili ona faafitauli…fai mai na sosola ese mai le Falepuipui i le 2015. 

O suafa la o Tama o le Ata o Faigame Vaito’elau ma Lauitiiti Tualima-ma e 16 moliaga tau le talepe fale ma le gaoi-aemaise ai o le faa-auupegaina i ‘auupega mata’utia. Na ioe Vaito’elau i moliaga uma e 16 ae lima moliaga na ioe i ai Lauitiiti Tualima. 

O le fesili la-aisea ua faapenei ai ia tamaiti talavou? O ai e pogai ai? O ni faafitauli e pogai mai matua poo le aiga? Afai la e afua mai matua poo le aiga-o le a se gaoioiga o latou faia e mafai ai ona toe lavea’ina nei fanau mai le olaga leaga ma le mataga ua faataasina ai aiga? A tuu ai pea nei tamaitai e faapologa e Satani ae le se’i fai se suiga fou i o latou olaga? O ai a tuu i ai? Afai  na afua mai le faatamala o matua poo le aiga-o lo outou taimi lenei e fai ai se suiga i olaga o nei tamaiti! Faapefea ona fai? Avatu i luma o le aiga atoa e fai i ai se fautuaga! O le a sou taofi?

3. Matauina ma le faafetai le tali mai o le Pulega o Fela’uaiga i le Laueleele I atugaluga o le atunuu lautele-ona o le soona saosaoa o taavale i luga o ala tetele! O le pinefaamau foi lea o le naunau o le Pulega o Fela’uaiga i le Laueleele- ia matua taofi le maumau o soifua o le atunuu mai faalavelave tutupu faafuase’i i luga o ala tetele. 

E talitonu la le taofi-e ui lava Ina to’agaogao le aufaigaluega a le Puleaga-ae o lea ua tino mai-e manumanu tele i le maumau o soifua o le atunuu ona o faalavelave tutupu faafuase’i! Ia atonu ua tatau ai ma onomea ona faafetaia Leasi ma lana aufaigaluega ona o lea taumafaiga! 

Ae lelei foi ona fesoasoani atu le atunuu i la outou pitolaau. O le taimi e sili ona mata’utia  feoaiga i ala tetele o Samoa-o le afiafi lea o le a pogisa. 

Aisea? O le taimi lea e o mai uma ai le anoano o taavale e le’i laiseneina i luga o le ala tele-ma o i latou ia e fiafia tele e fia tutu’u ma isi taavale! O le fesili la- o le a le mea e fai i taavale e maua e le’i laiseneina? Faapefea le tagata e avetaavale ae leai se laisene? E mafua ona fesili-ona  a mafai ona fo’ia le faafitauli lea-ona faatoa saogalemu lea o ala tetele o le atunuu ! O le a sou taofi? 

Matauina foi se ulutala fai mai o loo suesueina  e le Matagaluega o le Soifua Maloloina le oti o se tamaitiiti-ma o lea tulaga na faamaonia e le Faatonu Sili Aoao o le Soifua Maloloina. O lea la faalavelave e faasino i se tamaititi na fai sona tui ae fai mai lona tina- e la te le’i o’o i le faitoto’a o le falema’i ae pa’ū loa si ana tama –ua oti! Afai la o su’esu’e e le Falema’i lea faalavelave-o le a le aoga e toe su’esu’e ai? E mafai ona toe ola mai sia tamaitiiti? Poo a lava faaupuga suamalie e fai mai nei e le Soifua Maloloina o le a ma le a-e tasi lava le faafitiga o ‘aleaga-“e matua oti lava le auaunaga tau le soifua maloloina mo le atunuu! Poo a foi upu e tele-o le upu moni- e matua leaga lava ma e le o taitai ona o’o lea matagaluega i se tulaga latou te mafai ai ona gafa ma le soifua maloloina lautele o le atunuu! O le a le pogai? E le o tuuina atu i ai e le  Malo se faamuamua ina ia manuia ai tagata. 

A tatou toe tilotilo la i tua –e leai ni mea faapenei na tutupu! Aisea? Leaga sa faafoe le Falemai i Motootua e fomai popoto ma foma’i sa lelei o latou totogi i lena taimi-ae sa faamuamua le manuia o le atunuu! A toe tilotilo la Iina aso-o nai fomai sa galulue i le falemai I Motootua o SMP-ae le o ni Doctors e pei o le anoano ua i ai nei! E le o fomai la e leaga-ae o le leaga e afua mai luga. 

E le o lava fomai –ae le o amana’ia e le Malo-e le o lelei foi totogi o fomai-ae le o kea foi i ai le Malo! O le fesili la- e mafai e le ‘aufai-polokiki ona o ane e fai le falema’i? O nei upu uma e fai mai nei- e na o upu suamalie lava faa-polokiki! E le ona pau ia o e ua maliliu-ua tuua’ia ai le faatamala o le falema’i! O le a sou taofi? 

© Samoa Observer 2016

Developed by Samoa Observer in Apia