E le galo le Mafutaga

659 Hits

Tusia: Faletua’i Tautalaga Faiumu 

Nuu: Taga Savai’i 

Galue: Matagaluega o Faamasinoga


E! le masina e, ua gase I atumauga, 

Le fili o le olagaua ia gaoi o matuo lagona 

Ua le pofala ai nei le tapuaiga o moomooga, 

Talu lenei ipu ua matua faigata ona tofo I le oona. 

 

Matou te teufatuina upu uma sa fofola I le mafutaga, 

E te le solomuli, e te le faafiti tusa lava pe sou le vasa. 

Ao lea ua alii taeao manatu, aua se ava usu mo oem ai o matou fatu, 

Paga lea, o le’a tuua le mafutaga ma e alu ese atu. 

 

Ua oge upu, ua sosola foi manatu, 

Le agaga Faafetai, e le mafai e upu ona faa-lanu. 

Ua matou feinu ma malilie, aai ma maoona, 

Lau taitaiga I le Matagaluega lea ua uluola. 

 

O matou le atoatoa ma faaletonu I lo tatou vā,

E maualuga le talitonuga, matou te matua atu iinā.

Talofa e, o lea misia lou feāfioa’i i vaega taitasi uma o le ofisa, 

O lou naunau I le atunuu I lau auaunaga ia faamalieina. 

 

Masinalupe sa e tu e “ta’imua i tai sou” 

41 o tausaga, ua lasi tapenga, “E tō o matou pulou” 

Lau anavatau o le galulue faatasi, 

Sa mafai ai ona ausia matati’a taitasi. 

 

Aua e te faanoanoa matou te loto tetele foi, 

Tatou faatuatua I le Atua, o ia na te totofi. 

O le valaau nei, o le valaau foi taeao, 

Faamoemoe pea I le Atua o ia o le fa’aao. 

 

Sau ia ina alu, faamoemoega ia manuteleina, 

Faapaia le Atua I ou faiva alofilima. 

Tatou feiloai pea, aua e faiaso le Alii, 

O lea tuua I tama ona sa e saunia lelei ma tapu’e I matou ma Papali’i. 

 

Manuia tele oe ma le aiga, 

Sau se aso toe faamautu seisi filifiliga. 

Se ta valaaulia nei galo, 

Pau lea o la matou tatalo.

© Samoa Observer 2016

Developed by Samoa Observer in Apia