O LE MAU A PULE-THE MAU MOVEMENT

205 Hits

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer.

 

Na faaalia e Cross-le turisi mai Suva-mulimuli ane ai –lona laasia o le tafe o le toto i le Ala i luga o le Sami-i fafo ane o le Fale Faamasino. Na ‘ou faafetaia le Atua ona o le lelei o uaua o lo’u tino-talu ai ailoga e i ai se isi tamaitai- e le matapogia pe a vaai i lea tulaga.

Ona pau lava le lagona ua o’o mai -o le ita, popole ma le matua faanoanoa. Ina ua o’o mai i le Fale Faamasino lea na tafana ai le Tamaaiga o Tamasese ma tagata o lana Mau-o le oneone ua matua nuti-lili’i e pei o le efuefu.

Sa taumafai Leoleo ma faaga’au vai e fufulu ese vaega na pisipisia i le toto, ae le mafai e se faaga’au o le suavai-ona fufulu ese le toto o alii e le’i faa’auupegaina-mai mafaufau o tagata uma sa i lea nofoaga i lea aso- ma vaai-tino ma faalogo i le mea na tupu. Fai mai Hall Skelton-ua matua fefefe Aleni ma ana fitafita ina ua uma ona tafana sui o le Mau, ae peitai- e ui ina maua tagata Samoa i le loto tiga-latou te le’i toe taui atu. I la’u fonotaga mulimuli ma ni tamalii e to’a-luasefulu-na tatala lea fonotaga i se Tatalo. E ala i se faamatala-upu-na ‘ou iloa tino ai le uiga faatauanau o a latou talosaga.

O le ‘auga o ia talosaga, “Le Tama e-ia e faamagalo atu ia i latou-aua ua latou le iloa le mea ua latou faia,” ma talosagaina ai se fesoasoani mo i latou-ina ia latou maua le malosi e ta’ita’ina ai i latou-ina ia ‘aua ne’i pisipisia o latou lima-i le toto o le toe taui atu- i se tulaga mata’utia. O se alii matua na matua iloa lona naunau- a’o tatalo-ina ia tuuina atu ia i latou le malamalama e talitonu ai-o se mea sese le taui o le mata i le mata i Leoleo.”

O LE TAUNUUGA  Na tula’i mai se Solo Tete’e i Apia i lenei taeao lea na maliu ai le Leoleo o Abraham ma ni alii se to’alua o le Mau. E to’alua ni Leoleo ma le tusa ma le tolusefulu sui o le Mau-ae le o mautinoa le aofai tonu o e na manunu’a.

Sa filo ia i latou na manunu’a Tamasese o loo i le falema’i. O le amataga uiga ese lea o se fe’au faa-uaealesi umi a Aleni ia Ward-lea na ia maua i lona aiga lea e i fafo ane o Ueligitone i le aoauli o le Aso Sa-ae o le (Aso To’anai lea i Samoa nei. Na tuuina atu e Ward se faamatalaga i nusipepa ma faapea ai ona ia tuuina atu tala fou muamua i le atunuu,  ma sa mafai ona totoina ai le upu “solo tete’e” ina ia faasalalauina faalaua’itele. O lea Tala Fou na “tuuina atu ai se faamata’u” ia Nelesoni ma ana uo Samoa.Fai mai Nelesoni, ma i le itu ia Sir Maui Pomare-ua taunuu i se tulaga faaletonu-i se gasegase na pagatia ai- e tusa ai ma le tusitusiga o tala fou e  Nelesoni.

Sa ‘ou manatu o le a tuuina atu ia Samoa se paga masani o le Kirisimasi o lenei ituaiga i lenei tausaga, ae o lenei faamoemoe ua faafanoina i se tulaga e sili ona faanoanoa ai. O le a manatua pea e faapea o le Kirisimasi o le 1927-sa faamanatuina i Samoa e ala i le faa-aunuua o Alii o Simaika, Gurr ma a’u. O le  Kirisimasi o le 1928 na vaaia ai le aga’i atu o Tamasese i le falepuipui I Mt. Eden. O le Kirisimasi o le 1929 o lea ua faa-pogisaina e le tala fou e aupito i sili ona faanoanoa ai-lea faatoa taunuu mai.

O se Aso Lua 31 o Tesema 1929, na usuina ai se fono faanatinati a le Kapeneta a Niu Sila ma maua ai le tonu e faapea o e faamalosia pulega-ia atonu e faasino i maligi, o le a auina atu i Samoa.

“Na toe faaalia foi e le Palemia,” o se pepa o faamatalaga a le kapeneta fai mai, “sa manatua pea e le Malo lona tiute e aofia ai le tuuina atu i o latou luga ina ia mautinoa ai- o loo lava le puipuiga o alii ofisa ma leoleo o loo aafia i le faatioina o le tulafono i totonu o Samoa i Sisifo ma e leai sona faamoemoe e se’e ese mai le faiga faavae ua talia i le itu i le Teritori, Tulafono ma le tausiga- o le a matua faamalosia e tusa ai ma ala ua maua e tatau ai.

O le Meli a Aleni e pei ona lipotia ia Ward fai mai i solo talu ai- o alii na manaomia e tusa ai ma o latou tusi saisai “sa savavali ai ma le sa’oloto i le Ala i Luga o le Sami. E foliga mai ia te a’u- e faigata ona faataga tagata o loo manaomia e Leoleo ina ia savavali i se Solo i se faiga faapenei, ma o lea ua tonu ai ia te a’u –o le saisai o se tagata e to’atasi faapena-pe afai e fai e le Mau se gaoioiga faapea i lenei taimi.  Fai mai Aleni e o’o lava I   le 1,500 ma le 2,000 ia tagata-o loo faa-aupegaina uma i laau, uatogi poo naifi, sa auai i lea solo.

Ina ua amata le Solo Tete’e e tusa ai ma lo’u iloa-e leai se mea a Tamasese ma Tuimalealiifano- na fai e taofi ai le osofaiga o leoleo ma e le taumate e i ai le vaega tele a Tamasese na fai i lea fuafuaga. Ina ua uma le osofaiga o le nofoaga o Leoleo ma sa tatau ia Tamasese ona fai sana fuafuaga i lea itu ma taumafai e taofi le vaega toatele o le Mau mai le ulufia o le alatele e aga’i atu i le nofoaga o leoleo, ma i le faagasologa o lea laasaga, na manu’a lona aao i se pulufana na tafana atu i luga o le solo, o lona manu’a e itiiti.

O le tulaga sa’o na fana ai Tamasese sa masalomia-o ona manu’a ua leai se faamoemoe mai le amataga-ma o le taeao ananafi na tuumalo ai. Ua faigata ona ‘alofia le faaiuga e faapea o Aleni  ma lana pepelo e tusa ai ma lenei mataupu-e leai se ofofaiga i le nofoaga o Leoleo mo se faata’ita’iga-e pei foi o le matua eseese mamao o lana lipoti ma le tulaga ua uma ona iloa. O lenei pepelo ua faateteleina i se faamatalaga uiga ese mulimuli ane ai i totonu o lea lipoti.

O le to’aititi o e manunu’a pe a faatusatusa ma le vaega toatele o tagata ma auupega na faaaoga ia i latou-ua faaalia ai le tulaga taofiofi o le faaaogaina o auupega na faaaoga e Leoleo, ia sa amio faapalepale i sea tulaga faigata.

O Sargeant Waterson lea na faatonutonuina Leoleo i le faagasologa atoa o lenei faalavelave e tatau ona matua tuuina atu i ai se faaeaea ma le faafetai tele mo lona loto onosa’i ma le faamasinoga tonu na ia faaalia i le faafoeina o le vaega-’au, ma le faata’apeina o le motu o tagata-lea na toaitiiti ai i latou na maliliu.

Atonu o se mea faigofie ma talafeagai, ona to’atele tagata manunu’a pe ana le toe faaitiitia le faaaogaina o fana.O le tulaga mamalu uiga ese o le tuumalo o Tupua Tamasese –o se luma lea i le toatele o tagata o Niu Sila, ae foliga mai e le o kea i ai Ward, o ia lea e tusa ai ma le una’iga a Aleni, na ia faaalia i faamatalaga faalaua’itele e faapea o lea Tamaalii-sa auai i faalavelave e ala i le teena o le pu’eina ma le saisaia o tagata e manaomia e le Tulafono i luma ane o ofisa tau le pulega.! 

© Samoa Observer 2016

Developed by Samoa Observer in Apia