Tala faasolopito o samoa mai le amataga

342 Hits

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer.

 

Mr. WILLIAM GREVEL:- O se tagata faifaatoaga o Manase i Savaii, na fanau i Essen i Siamani, ma sa a’oa’oina i Iunivesite o Perelini ma Heidelberg.

O le Iunivesite ua ta’ua mulimuli na maua ai lona faailoga  tikeri o le Dr.Phil. O lana galuega muamua na avea ai o ia ma fesosoani o le Botanical Institute o Heidelberg. Ona malaga ese lea mo le tele o tausaga ma asiasi i Aikupito, Aferika i Saute, Seilona, Iapani ma Java.

E faalua ona alu i Spitzbergen ma kolone o Ausetalia. Na sau i Samoa i le 1901 ma nofo ai mo le tolu masina, ona toe fo’i lea i lona aiga i taimi amata o le 1902, ae na toe foi mai i Samoa i lea lava tausaga.

A’o iinei i le 1901, na ia lisi atu lana esetete e 650 eka i Manase. Ina ua toe fo’i mai, o lana mea muamua lava na fai o le toe faaleleia lea o le faiga o le lisi o lana esetete ma o se galuega e umi le taimi na fai ai, ma o le 1904 na faatoa mae’a ai ona toe faatulaga lelei le lisiina atu o lana esetete.

Sa amata loa ona faato’a le 500 eka i le koko ma o vaega uma o lea esetete sa to-niu, vagana ai le 5 eka na faato’a i le pulu tosi e fai ma ana faata’ita’iga. I le taimi muamua e tele faafitauli sa feagai ma Dr. Grevel ona o tagata o le nuu, ona o le latou masani o le mana’o tele i lo le mea na malilie faatasi i ai e tusa ai ma le feagaiga ua uma ona saini.

O lea Esetete sa faafaigaluega ai tagata Saina ma Samoa. E matua popoto tele tagata Samoa e fuafua le tau tonu o le eleele ma ona aoga ma sa tau le maua ai e le tagata e lisi i ai se tupe e ola ai.

Sa mulimuli ane ona filifilia Dr. Grevel e avea ma matai alii o tagata o Matautu ma o lea tulaga na aveeseina ai loa faafitauli uma sa feagai ma ia. Sa matua faitioina malosi e Dr. Grevel le malo ona o le leai o se fesootaiga tau va’a i le va o Apia ma Savaii atoa ai ma le le faatagaina o lea aofaiga o tupe e fai ma fesoasoani i tagata ona o le leaga o le auaunaga tau vaa i lea taimi.

Sa tau le maua le meli i Savaii i taimi masani. O isi taimi e lua pe tolu masina ae leai lava se meli.

O le isi taimi na ia le maua ai se tupe e totogi ai ana tagata faigaluega, ma o lea na taofia ai loa galuega ae sau i Upolu i se va’a e avatu le meli. Talu ai o a latou galuega fai e faalagolago tele i le maua atu o le meli, o lea na la faatauina ai loa ma Herr Von der Heide se va’a faila e fai lona foeuli e avatu ai le latou meli. I lea taimi e 24 povi sa i lana faatoaga, ma o le tau o le povi e tasi i le maketi i Apia e 2 Pauni. Sa tele foi lafu pua’a ma moa i lana faatoaga. 

Dr. VAUPEL, D.S. Arao, o le itumalo o Matautu, Savaii, na fanau i Siamani, ma sa a’oga i le Iunivesite o Munich. Na sau o ia a’o laititi lava i kolone o Ausetalia, ma nofo ai mo se taimi puupuu. Na taunuu mai o ia i Samoa i le 1903, ma nofo i Apia mo ni nai masina, ona alu ai lea i Matautu Savaii i le 1904.

O Dr. Vaupel sa aoaoina i mea tau laau toto ma o lona talitonuga o Samoa o se tasi lea o eleele e aupito i sili ona lelei e tatau ona maua ai se fanua o se tasi. Ua uma ona ia faia se togalaau mo suesuega ua i ai ni ituaiga eseese o laau e 600, ia ua tatau ona auina atu i le Iunivesite o Perelini mo le faafaileleina ma toe maua mai ai le isi selau ma selau o la’au toto fou.

O ia suesuega e fai lava ae totogi uma lava e lea alii su’esu’e. E leai sona aiga i lea taimi ona o lona faamoemoe e toe fo’i i lona aiga pe a mavae le 2 tausaga. A’o i ai o ia i Samoa nei, na ia tusia se tusi e uiga i fugalaau o Samoa ma o lona naunau e fia maua uma mai ituaiga eseese o fugalaau o Samoa, o lea sa tele ina moe ai i le vaomatua, ma o ana taamilosaga i le vaomatua e faitau aso ma vaiaso o fai lava. 

© Samoa Observer 2016

Developed by Samoa Observer in Apia