Leai se suavai maua

By Ilia L Likou 02 January 2018, 12:00AM

O se tulaga faigata tele o lo’o feagai ma le aiga o le tinā i a Tafiau Sio o Letogo.

O le taimi lenei e le’o i ai se suavai maua mo ia ma le aiga.

“Ia e pei ona silafia ai ua fai si leva o matou fa’atali ma lenei tulaga ma o se itu faigata tele lea i a te a’u lava ia.

“Ua o tatou silafia uma le faigata o le soifuga pe a leai se suavai , ma o se itu e ao ona toe silasila i ai le taimi lenei aemaise ai le aga’i le lumana’i.

“O le matua’i tele lava o le galuega fai  mo i matou ma le fanau, e taumafai lava i le mafai e o’o atu ai mo se fesoasoani aua le agai atu ai i tai e tausaili mai se suavai.

‘Ia e fai lava sina maomao i tai, ia e alofa fo’i le fanau ona o le o atu ma le toe fo’i mai aemaise lava pe a tetele mugala.

Na ia fa’ailoa o le tamā o le aiga o lo’o faigaluega i le taimi lenei.

“Ia e pei o ai o lo’o ua fesoasoani malosi mai lava i itu tau tupe ae na’o le $120 lana tupe e mafai ona maua mai ai.

“E pei o lea lava e taumafai i so’o se itu ina ia fa’aaogaina lelei aua le aga’i ai le lumana’i.

“E faigata lava mea uma pe a o tatou tu’u i ai ma le leai o se suavai i aso uma.

“Ia e mo le silafia ai o a’u e to’aiva la’u fanau,” o lana saunoaga mai lea.

Na ia fa’ailoa ua taugata lava le soifuaga.

“O le olaga o lo’o ua tatou i ai ua fai lava sina faigata ma ua fa’apea ona  tau le mafaia e o tatou tagata lea tulaga.

“O se itu e ao lava ona ave i ai le fa’amalosi o tatou tagata i le taimi lenei, ma ia  tatou faia mea uma i le alofa i fanau.

“O le uiga o la’u tala o a fita ma lu’itau e feagai ai ia avea lava fanau ma fa’amuamua i totonu o aiga, aua e fiu e u’u tupe pe a i’u manuia a latou a’oa’oga.

Na ia ta’ua o se itu lelei tele lea mo le to’atele o nai o tatou tagata.

“E pei o lo’u lea manatu i ai, a tatou fa’atino mea uma i le malosi ma tu’u atoa i ai le loto e tali mai a tatou galuega i le manuia o fanau.

 “E ao lava fo’i ona o tatou fa’afetai i taimi aua o lea lava le tulaga o lo’o ua naunau i ai , aemaise o le taumafai e fa’atinoina vaega uma mo le lelei o nai fanau.

“Ia aua ne’i o tatou fa’atu’utu’u i le faigata o le soifuaga o lo’o ua i ai nei, ae ia ave pea le fa’amuamua mo i latou.

“O le nofoa’i ai i fa’afitauli o se itu e ao lava ona alo  mamao ese ai, ae ia taumafai pea, aua fai mai le upu o so’o se fa’afitauli lava e i ai lava le auala e fai ai.

“Ia o tatou iloa o mea uma lava ua lelei, o vaega ia e ao ona fa’aaogaina lelei aua le aga’i atu ai le lumana’i.

“Ae pei o le taimi lava ia lenei o lo’o ua mana’omia lava se tanevai mo le aiga nei.

By Ilia L Likou 02 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>