O se aso fa’agalo gatā

Tusia Vatapuia Maiava ma Ilia L. Likou ,

205 Hits

Lina Sina o Lalomanu.

Lina Sina o Lalomanu. (Photo: Vatapuia Maiava )

E le’i faigofie le toe atina’eina o le aiga o le tinā i a Lina Sina ma le aiga ina ua ma’ea le galulolo lea na ‘a’afia ai lo latou aiga i le 2009.

I le fa’atalatalanoaga ai ma le Fofoga o Samoa, na ia fa’ailoa ai na i ai nai fa’afitauli i totonu o le aiga ina ua o ese mai le nofoaga sa i ai muamua i ga’uta o le afio’aga.

 “Ia o matou le isi aiga na ‘a’afia i faiga a le galulolo.

 “E to’afa la ma’ua fanau sa i ai i le taimi lea , ma o si a’u tama pepe e lua masina na oti ai.

 “O lo’u mafaufau, sa ou le sa’i i le Atua ae na malosi lo’u loto e finafinau ai pea i le tatalo mo se fa’amafanafanaga mo a’u ma le aiga.

 “O le taimi lenei o lo’o taumafai pea e fa’agalo atu nei va’aiga mata’utia… o lea ua omai i uta nei i toe tupu mai se isi fa’alavelave, po’o a pefea e toe tula’i mai aemaise ae ua faigofie le tamomo’e mai i nofoaga maualuga.

 “E pei lava o lea na tupu ananafi le fa’alavelave, ia ua toe foa’i mai e le Atua le to’atele o tamaiti ma e agalelei pea le Atua.

 “Ia o lea taeao na sauni lo’u to’alua e alu  i le ma’umaga ae sau loa le mafui’e, ia na ou fai i ai e aua le alu, ae le’i umi lava ae o ma fa’alogoina o lo’o fe’ei tagata ma ta’u le galu ua va’aia i gataifale.

 “Ia ua tuai lava, o le galu muamua na taia uma ai matou, o lo’u mafaufau sa i ai i lea taimi o a’u ua ou leai…e leai lava se isi mea na tau i ai lo’u mafaufau.

“Sa tatalo i le taimi atoa i le Atua e fesoasoani mai.

 “Ia o le galu na aumaia tamaiti i luga o le mauga ma tu’u ai, ma sa lagona le vaivai, ma e fa’afetaia le alofa o le Atua ona o lea aso e to’atele i latou na fa’asaoina e ui o e na maliliu, ae leai se isi e tu  atu i le Finagalo ma le Pule Fai To’atasi a le Silisili Ese.

 “O lo’o faigata le tele o le toe tapenaga o mea uma o le aiga, aepeita’i ia ua manaia lava luga nei ua le toe popole se galulolo.

 “O le taimi ae le’i i ai le galulolo ia na solo lelei vaega uma, sa tele lava nai tupu i le pisinisi sa i ai, ia ae o le taimi lenei ia o lea ua toe taumafai mea uma e pei ona ua i ai le ma’umaga o lo’o ua toe taumafai ai le atina’eina o le aiga.

 “Ia ae o lo’o i ai lava le talitonuga atonu o lo’o solosolo manuia lava i le taimi lenei e pau lava le galuega lea e fai o le tatalo ma fa’amoemoe i le Atua.

© Samoa Observer 2016

Developed by Samoa Observer in Apia