Fa’atino le tautoga a le Peresetene fou
O le taeao ananafi na fa’atautoina ai le Peresetene fou o le Fa’amasinoga o Fanua ma Suafa, le Afioga a Fepulea’i Letufuga Atilla Ropati, e le Ao Mamalo o le Malo, le Afioga a Tui Atua Tupua Tamasese ‘Efi.
O le mae’a ai o le fa’atautoga – lea na faia i le Potu Fono i le Maota o Tui Atua Tupua Tamasese ‘Efi i Sogi, ua maualafia ai Fepulea’i i ona tofiga fou ua tofia iai.
E silia i le selau sui o le malo, o aiga o Fepulea’i mai Savai’i, o uo ma e masani fa’apea le atunu’u sa molimauina lea sauniga mamalu.
O le Faife’au o Samoa Unoi o le Ekalesia a le Peace Chapel sa ta’ita’ia le sauniga-lotu, ma pese sa lagiina e le ‘aufaipese a le Ofisa o le Fono Faitulafono fa’apea le ‘aufaigaluega a le Matagaluega o Fa’amasinoga ma le Fa’afoeina o Tulaga Tau Fa’amasinoga.
Sa ‘auai fo’i le Fa’amasino Sili, Patu Tiava’asu’e Falefatu Sapolu ma fa’amasino o le Fa’amasinoga a Samoa.
Na fa’afetaia e Fepulea’i le fa’atuatuaga ua tu’uina atu e le Malo.
“’Ou te fa’afetai i Le Atua ona o Ana Tofiga,” o lana fa’aaliga lea.
“’Ou te manatu lava, o lea ua fa’ailoa lelei mai e le pese, aua e pule lava Le Atua po’o a tofi e vala’auina ai tatou e fa’atino.”
O le Peresetene fou ua fa’atautoina nei, sa galue muamua i le Fa’alapotopotoga o Va’a a Samoa.
Sa galue fo’i i le Kamupani Loia a Petaia Law Chambers mo tausaga e tolu soso’o ai ma le Fa’amasinoga o Fanua ma Suafa mo tausaga e 12.
O le tu’ua ai o le Ofisa o le Fono Faitulafono, e talitonu Fepulea’i, o lona iloa ma le malamalama mai lea Ofisa, o le a aoga tele mo le fa’atinoina o ona tiute fou.
“O le malamalama lelei i tulafono, o se fesoasoani tele lava lea aua, e ‘ese lava le na o le faitau o tulafono, ‘ese le nofonofo ma fa’alogo i Sui o le Palemene o talanoaina le tulafono.”
O Lana Afioga, o le Failautusi o le Ofisa o le Fono talu ai nei.
Ua valu tausaga o tautua i le tofiga o le Failautusi ae mulia’i nei fautuaina ma tofia e avea o le Peresetene fou, e fa’aauau mai ia Tagaloa Tuala Kerslake na fa’amavae.
Na fesiligia mo sona finagalo i le Komisi Su’esu’e ua tofia nei mo le su’esu’eina o le mata’upu e uiga i Fa’amasino o le Fa’amasinoga o Fanua ma Suafa, ae saunoa, e leai sona finagalo e fa’aalia i le taimi nei.
O Fepulea’i e mai afio’aga o Sale’aula ma ‘Iva i Savai’i. Ua 48 tausaga o lona soifua ma ua fa’aipoipo ia Neta Ropati.