Lou Atua e, ua faafetai tele i lou alofa ma lou Agalelei, ua tatau ma onomea le viiga ma le faamanū i lou Suafa mamalu. Auā sa ou puapuagatia, ua tauau ina mavae atu le malosi ma lou nei ola. Ua o’o mai le vaivai, ua punitia lou nei manava ona o mafatiaga.

Ua tauau ina mavae atu lou agaga, le manava ola sa ia te au. Ona ou alaga atu lea i lo’u puapuagatia, ma ua aapa mai ou a’ao alofa, ma ou a’ao laveai, ua e faamalolo ia te a’u mai ou puapuaga. Ua e faafofogaina la’u tatalo.

“Fa’afetai lou Atua e, ua ou ola, ona o lou alofa” A’o le’i oso ae le lā, ma totogo a’e mālamā o le taeao fou, ma matala a’e fugala’au matala felanulanuai lō latou matagofie, le matala a’e o le pua taunofo, le Oriana, le foketi, le fuarosa, le moso’oi, le laga’ali, le pua su’i ula, le aute Samoa ua sili lona matagofie ma le lasilasi o fugala’au matala. Ua puaina lo latou manogi, lo latou nanamu e le sau o le vaveao, le sau o le ola.

O faailoga vaaia, o le matagofie lo tatou si’osi’omaga. Na faia ele Atua le mata’isau o le foafoaaga. Ua fa’amatalatalaina mai ai o nei mea uma na ia faia. E moni lava o lo’o iai se Atua, o lo’o soifua le Atua e pei ona tatou talitonu ma faatuatua iai.

Ua ia fa’amanatu mai ai i a’i tatou i aso uma o lo tatou ola. Lona alofa matalasi ma lona Agalelei e tumau e fa’avavau. Ma le pelepeleina pea i le Atua o le tagata ua ia faia i lona fa’atusa paia, ia foliga i ā te ia.

Ua alalaga mai mauga, ua pati lima lā’au o le vao. O fetu foi o le taeao ua vi’i ma fa’asāō. O lā’au o le vaomatua, o manu vaefa, o manu fetolofi, o manu felelei ua latou tausagi fiafia i fuga o lā’au i lea aso ma lea aso. 

O i’a o le sami ua tata’a i ala o le sami, o figota o le sami felanulanua’i e uiga ese lo latou matagofie. Ua latou pepese fiafia ma olioli i lea aso ma lea aso, ona o le matagofie nauā lo latou siosiomaga. Le natura o mea faiola na faia e le Atua. E taitasi ma lona uiga, auā manuia ma le lelei mo le tagata.

Ae taualuga i le vi’iga ma le fa’afetai a le tagata i lona Atua. O ia o le paleali’i o ana galuega mamana uma Amene, ma Amene.

Avea ia lenei avanoa faaauro, e fia fa’aleo atu ai ni lagona o le tagata ma’i, ma fia fa’amauina le agaga fa’afetai tele i ai latou uma o e na alolofa ma Agalelei mai so’o se mea. Fa’afetai mo talosaga molia ma lo outou agalofa ma lō outou alofa tūla’i le fa’atuāoi, faafetai.

E fia tu’uina atu la’u fa’afetai tele faapitoa i le Ekalesia o le Au‐Paia o Aso e Gata Ai, i le

Uarota i Fataloa ma Salelologa. Ua ou iloa ma talitonu i le matagofie o le Talalelei a Iesu Keriso na toe fuataiina e ala i lana Perofeta o Iosefa Samita. Ua fa’aalia i lō outou agalofa ma lo outou Agalelei ma lo outou a’ao mafola i so’o se mea, ao feagai ai ma tiga ma mafatiaga a’o fa’ataotolia ai i le Moata Gasegase i Tuasivi Malietoa Tanumafili le lua.

Faafetai tele ia Bishop Matuauto ma le Faletua i lo oulua Agalelei. Fa’afetai atu i le ta’ita’i Perisitua faapea le Susuga ia Tuisamoa pei ona lua asiasi atu a’o feagai ai ma mafatiaga, fa’afetai le agalofa mo mea uma.

Fa’afetai faapitoa mo le Faletua ia Sita Mariner ma nai ona alo ma si o latou aiga, malo le tatalo, fa’afetai le Agalelei i le tele o aso sa outou asiasi atu ai mā so’o se mea. Se a ea se mea ou te taui atu ai lō outou Agalelei?. O lo’o silasila fofoga o le Tama Faalelagi e tusa ma lo outou agalofa. Na te fa’amanuia ma taui atu e tusa ma lo outou Agalelei, faafetai.

Fa’afetai ia aunty Saea Kelematina ma Sao Losia ma si ā la fanau, faafetai mo mea uma.

Fa’afetai ia Paeu Iapani ma le tausi ia Lei ma nai laua alo mo gasesega i aso uma mai le lua vaiso na fa’ataotolia ai. Ia iai le Agalelei ole Atua ma fa’amanuia atu ia te oulua ma si ā oulua fanau.

E faapena foi ia Laufiso Paina, le tausi ia Aiaraisa ma nai o laua alo, o tuagane o si o’u toalua, fa’afetai tele le Agalelei.

Fa’afetai atu ia Suafo’a Solia ma le tausi ia Vaea, fa’afetai le Agalelei, fa’afetai le agalofa.

Fa’afetai tele atu ia Temukisa Siuesi Lemaota e tusa ma asiga o lo’u mai i so’o se mea.

Fa’amanuia le Atua e tusa ma lo outou agalofa, fa’afetai.

Fa’afetai i le Faletua o Na’ama Taito Upulasi, fa’afetai le Agalelei, aua le popole o lo’o soifua

le Atua e malosi le mea moni ae le moni se mea malosi.

Fa’afetai atu i le Susuga i le Aliifoma’i Shane Chen ma le faletua i Pago i tupe o lo’o tuuina mai o le tausiga o le lo’omatua, fa’apea ai ma le tausiga o le ma’i. Fa’amanuia le Atua le feagaai ai ma galuega.

Momoli atu fa’afetai tele i le Susuga i le Tamaitai faiaoga po’o le tausi ia Poligi Leatigaga Selesele Fereti. I le seleni na tauaaoina mai ao fa’ataotolia ai i le Maota Gasegase i Malietoa Tanumafili II i Tuasivi, fa’afetai tele le Agalelei. E ui ona o lo’o feagai ai foi oe i mafatiaga, gasegase, mai o le tino. Ia alofagia e le Atua ia iai lana faamalologa i ou mafatiaga, fa’afetai.

E fia tuuina atu foi le fa’afetai tele le Afioga Tagaloa ma le Faletua i Tapueleele. Mo le tupe na tauaaoina mai, fa’afetai le Agalelei.

E fia tuuina atu le fa’afetai i le uso ia Ailua Tautasi Luamanuvae i Salelologa, fa’afetai tele atu mo le asigai tupe, ua tuuina mai, fa’afetai le Agalelei. Talosia ia vave ona maua se faaipoipoga se faletua aua le tausiga o le aiga.

Fa’afetai tele atu i le Susuga i le fa’afeagaiga ia Ape AOG i saunoaga fa’amalosiau ua fai ma vailaau aoga ma le vai malu i puega, ao feagai ai ma mafatiaga ua avea lava oe e fai ma sui o le aufaigaluega paia a le Atua o si ō tatou nu’u, le au fai tatalo le ao atoa ma le po, i ē o loo faataotolia i mafatiaga ae ā se manuia mo le afioaga, fa’afetai tatalo, fa’afetai le asiasi mai.

Fa’afetai faapitoa le Afioga Leota Laki e tusa ma lona alofa ma lona Agalelei i taimi uma e tāpa ai se fesoasoani. O le seleni ua tuuina mai mo i maua ma Fitiuafau Tausaga, ona faapea lea ona tuuina atu i le Nu’u mo le fa’amoemoe le umusaga o le faleaoga, o lau lea fesoasoani mo le fa’amoemoe o le nu’u , fa’afetai.

Fa’afetai atu foi mo le susuga i le Aliifoma’i Jason Tautasi Chen mo le seleni na tuuina mai mo le pili o le ma’i. Mo le tausiga o grandma ma le tausiga o lema’i. Fa’amanuia le Atua feagai ai ma galuega, fa’afetai.

Fa’afetai tele atu ia Ta’ase ma Tepora ma si a laua fanau (Australia) le tupe na lafoina mai a’o fa’ataotolia ai i le falemai. Faamanuia le Atua feagai ma galuega i le aumau ai i Atunu’u mamao, fa’afetai

Fa’afetai faapitoa mo le faletua Penina Ifopō Afamasaga Sio, ma si o outu aiga, ua tuua lava le galuega ina ua maua tala o lo’o fa’ataotolia i le falemai Tuasivi Malietoa Tanumafili II.

Fa’afetai mo mea uma afafine, fa’amanuia le Atua ia te oulua ma nai ō oulua alo, fa’afetai.

E fa’amatua le tu’u i le matagaluega Soifua Maloloina falemai i Tuasivi Malietoa Tanumafili II. E fia tuuina atu ai le faafetai faapitoa e tusa ma la outu Tautua ma la outou auaunaga i le mamalu o si ō tatou atunuu. E se ā se ā ona lava ona afea se manatu se fa’afetai ae o se fa’amalo i lea Matagaluega taua ma le aoga Soifua Maloloina.

E moli lava o loo iai nil ape o la tatou auaunaga i fa’aseā ma le sa’i a le atunuu e tusa ma la tatou Tautua. Aepeitai faimai le upu a le atunu’u “ E leai se faiva e asa ma se maumau”, e leo iai se atoa i le tagata e tusa ma lana Tautua. E lē mafai foi ona tatou fa’amalieina le lalolagi. Ua na’o le Atua lava o lo’o iai le atoa e malie ai o tatou manao.

E le fa’apea e avea ia lagona vaivai e noatia ai le agaga faafetai tele e fia tuuina atu, ona o galuega lelei a nai Alii ma Tamaitai fomai, e tusa ma la latou Tautua, e ala i togafitiga ma vailaau aoga, ua toe faafousia ai le malosi i gasegase o le tino sa faataotolia ai le mamalu o le atunuu ma toe maua ai le soifua maloloina lelei.

Malo le Tautua, malo le galulue, malo tauata’i, malo le onosai i la outu auaunaga luasefulufa itula, le ao atoa ma le po i aso uma o lenei olaga. Faamanuia tele le Atua i o outou fiava ma tiute, manuia le feagai ai ma galuega, fa’afetai.

Ae paga lava lea. U na’o ita o se tagata ma’i vaivai ma le mativa. E leai foi se auro poo se ario oi ia te au ou te taui atu ai lo outou Agalelei. Ua na’o lenei, o loo Soifua le Atua, ua ia silafia mea uma. Na te taui atu ma fa’amanuia ia te outou e tusa ma lo outou alofa.

Faafetai, Faafetai, Faafetai tele lava Samoa ia malu le vai se upu ua le tau tamalii i sau silasila le tau. Faamolemole faamagalo mai

Soifua,

Patelesio Tauiliili

Fitiu’afau T.Patelesio Tauiliili.