LAUGA - “Ia fai oe ma fanau a le Atua”

By Rev. Petaia Setu 02 July 2017, 12:00AM

(Ioane.01:12-13)


A o ai a le fia fai ma atalii ma afafine o le Atua? E le o le faanaunauga ea lea o ō tatou loto? O moomooga ia o le agaga! Ia fai ma suli o Lē na ia faia mea uma lava.

Peitai, ua tautaulia le momoo; ua iai foi lape o le faanaunau. Ua pei o upu i le faaitū lea o Asau, na o Neiafu na mele ai le toelau! Auā ua fai mai le atalii o Sepetaio, Sa i le lalolagi Iesu; na ia faia foi le lalolagi; ae le i iloa o ia e le lalolagi. Ua maliu mai o ia i lona lava nuu, ae le i talia o ia e ona lava tagata.

Na teena e le lalolagi; e le i talia foi e ona itu taulagi. Ae fai mai lava upu a le atunuu, o iai lava nai toe o Sagone. Fai mai Ioane, “A o i latou uma e na talia o ia ma faatuatua i lona suafa, na ia avatu iai o lea manuia, ia avea i latou ma fanau a le Atua….”

E le o tagata uma sa fetōtōa’i ma taumatemate faaleiloga le oo mai o le Malamalama moni i le lalolagi. Ua talia e se vaega toaitiiti. Ua talitonu foi nisi. I le, o i latou ia, ua matuā ta’utino mai e lenei soo, ua avatu iai e Iesu o manuia, ia fai ma suli, ia avea ma fanau a le Atua. Oka! o se faamanuiaga tele lea! O le fai ma fanau a le Atua. ’O ’e mafaufau iai?

O le afio mai o Iesu i le lalolagi o le pule lea a le Atua. O lana  ia lea fuafuaga mo le faaolaina o le tagata. A o le talia ma le lē talia, o lau ’oe lea faaiuga ua ta’oto iai lou faasinomaga.

O loo manino lelei le vaega lea i uluai fuaiupu e sefulu ma le valu o le mataupu nei (1:1-18), o loo ua tā aofa’i ai e le soo mea uma ua i totonu o lana Tusi Evagelia. O le feau autū – “Talitonu o Iesu Keriso o le Alo o le Atua Soifua” O le faamatalaina e Ioane o le itū Atua o Iesu Keriso. Ua faaalia lava i le lalolagi, ae le i iloa lava e le lalolagi. Na soifua  mai i ona tino ma aano faaletagata, ae teena lava e ona tagata. 

O uiga ailililo ia o le tiapolo o loo fai ma taotao i o tatou tagata lotu, ua tatou le iloa ai le moni o Keriso, ma ua tatou le taliaina ai le Malamalama o le Ola Fou. Tatou te manana’o e sau sa’o mai luga i le au matutua. Ia aloa’ia mai i tulaga tofi le moni! O ai Iosefa ma Maria? E le taulia! E le ui mai i se fale povi so latou Mesia! O le toilalo lea o loo saisaitia ai o tatou Kerisiano. Ua faatauvaa ia te oe ala ua saunia e le Atua mo lou lelei. Ua e inoino ma faifai i tapenaga a le Atua mo lou saolotoga. Ua ’e mele le faamaoni o le Atua mo lou faaolaina.

Samoa e, e le o se alofa ananafi. Na foa mai lou toilalo i le faaolataga i Etena (f.4). Na taulagi anamua e le au perofeta. (Mat.12:39,40). Na tau’alaga ai le taule’ale’a sa ofu i fulufulu kamela (f.6-8).

O la lea ua liutino tagata le Alofa Tunoa o le Atua mo lo tatou faaolaina , ae o lea lava tatou te fematea’i ma tusitusi lima! (f.11). Ae faafetai ua iai nisi o loo amana’iaina ma talileleia le fīta i tuga o Lē na saunia lo ta saolotoga. O i latou ua fai mai Ioane, ua avatu iai e le Atua lea manuia! Ua fai ma suli o le Aiga o le Atua e faavavau. E le o se suli tupolo; a o le suli tupolata. E suli i la le agaga (Ioa.3:6). Ua fai ma atalii ma afafine o le Atua.

Le ekalesia e, o fanau a le Atua, o fanau saoloto (Faali.21:4). O fanau ua faamanuiaina. O fanau ua uma ona mamanu e le Atua i ona foliga ma ona uiga paia. O i latou e le o le toto na fanau ai, e le o le mana’o foi o le tino, e le o le loto foi o le tagata, a o le Atua lava. O lona uiga, o i latou ia e le ta’aa’ina i ou manatu faaletagata. E le toilalo i lau faavaivai.

E le tosoa’ina i lou mā ma lou matamuli. E le sesē i upu o le vavau o ia te oe. E le limataitaiina e lou faavalevalea. E le avagagofie i lou lalolagi. Ae na te iloa ua liutino tagata le Atua ona o ia. Ua ia talia le malamalama moni i lou olaga (f.9). Ua talitonu o Iesu Keriso o le Alo o le Atua Soifua ma molimau iai. Ua faatuatua i le suafa manumalo o le Alii o Iesu Keriso. Ua fanau mai lava i la le Agaga; ma ua foliga lava i le Atua. Ioe, o le ituaiga lenā e sasaa iai manuia o le Alii. E fia fai atalii ma fia fai afafine iai le Atua.

A o oe, o gafea o lenei feau o loo e tu ai? O le a le ituaiga Kerisiano o iai lou tagata lotu? Poo ’e iloa le Ola (f.4) ma le Malamalama (f.9) o loo lauga mai ai Ioane ia te oe i aso uma? O le a faapefea ona avea oe ma fanau a le Atua pe afai e te le o mautonu i le alofa faaola o le Atua ia te oe ma lou aiga? E mafai ona ta’uatalii ma ta’uafafine oe o le Atua pe afai e te le talia auala na tapena ai e le Atua lou saolotoga? Leai.

Uso e, o le talitonu, o le ki lea o le faitotoa pito i luma o le Tusi nei a Ioane. O le faatuatua ma talia lona suafa, o le avanoa lea ua tuusaolotoina ai oe e le Atalii ina ia fai ma atalii. O lona uiga, ua manino le mata o le vai; a leai se talitonu, e leai foi sou avanoa i totonu. A misi oe ma le faatuatua, e le o se fanau oe a le Atua. A tumau pea oe i le olaga masalosalo, e leai sou lavea’i i le i’uga o ou aso (Luk.16:26).

Silasila lelei i upu a le soo ua fai ma taiala o la tatou fetufaa’iga i lenei vaiaso. O upu tuusa’o. Ua le ’alo i le itu taumatau poo le itu agavale, ’a ua ta’utino le solo a le tamaloa, “A o i latou ua talia Iesu….”

O i latou ua le nanamu i le lalolagi o latou olaga… a o le Atua lava. Tou te iloa Iutaia, e mapo lotu, a ua lilo ia i latou le mea moni ma le tonu. Ua latou le iloa, o loo latou teena Lē ua pogai ai le lotu! Ua tautū i tulafono ma le ola vivii i le Atua, ma le lē malamalama, o le Atua tonu lava lea o loo ua ū iai o latou tua! Ua le eseese ma le faavasivasi o Toma. Seiloga ua vaai tino iai mata ma pa’i atu iai! (Ioa.20:25).  O le tagata lea, fai mai le isi toeaina, ‘e pupula mai lava mata a ua oti.’ Faamata e lē o le ituaiga kerisiano lea o loo taulagi ai lou tagata lotu? Fai mai Iesu, Toma, vaai mai foi i o’u lima; tago iai…. O le a le tala, fai mai Ioane, ua pa’ū i tulivae; ua tagi; ua gē! Le au uso e, ’aua le fefe i aūma, ae vaai i luga.

’A ua faalogo loa i le Upu Moni, tulivae loa ma le faamaoni. ’A ua taia loa oe i mālama o le Ola fou, talia loa le Lokou. Fai mai lava faifeau o le lotu Iutaia o ni faailoga; ae tali filemu lava Iesu i le perofeta o Iona (Mat.12:38-40). E a Iona? O le faailoga o le Ola. E le mafai e le malosi o le lalolagi ma natura o mea malolosi uma o le foafoaga ona faaumatia le Mea Moni. E faavavau lava, Amene, e le mafai. Faafetai ua popoto Iona ma Toma. Ua o ese mai o la olaga pologa sa manunu ai le tautoga. La lea ua ola! Ua toe foi ia Ieova (Iona.3:4,7,9). Ua talia Iesu o le Faaola (Ioa.20:28).

Ae a liliu le vai o Sina, e faapefea oe ma lou aiga? E fai lou aiga ma fanau a le Atua i le Malo Tumau, pe tausi pea tou vavau? E te talia Iesu Keriso na liutino tagata mo lou faaolaina, pe e te talitonu lava oe i tapu a lou aiga?

Soma e, le au uso e, o le meleniuma fou lenei. Fai se mea fou e viia ai le Alii. Fau se Oe fou e fiafia mai iai le Atua. Se ’oe mamā; se ’oe malamalama; se ’oe alofa faamaoni, ma le sa’o. Se ’oe ua i totonu o le li’o lea ua ta’ua e Ioane “A o i latou;” “O i latou”. Ioe, tuu la ia ma oe i totonu o le li’o lena, ona seki lava lea o mea uma. E a, e sa’o? E āumā mea uma a o le fai o oe ma atalii ma afafine o le Atua, Oka! Ke’i a lea ua fai mai, O a’u a lea!

 

 Amene

7737063/7783782

By Rev. Petaia Setu 02 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>