Fa’amuamua aiga, fa’amulimuli galuega

Tusia Aruna Lolani ma Fetalai Tuilulu’u ,

63 Hits

I totonu o Samoa, o ona tagata e fa’amuamua i o latou aiga ma o latou fanau. E iai fo’i le vaitaimi sa avea ai e le kamupani o Bluesky ma o latou sini autu le fa’aupuga fa’apea “Fa’amuamua le aiga”.

O le olaga a e fa’apea, o le aiga e taua tele; pe e te mau’oa pe mativa, e tatau lava ona ave le fa’amuamua i le aiga

O le manatu fa’aalia lea a se tama 32 le matua o lona soifua, Tali’ilagi Ulusele mai Aleisa ma Saleimoa.

Sa ta’ua ai le taua o aiga i lana fa’atalatalanoaga ma le Fofoga o Samoa i le aso ananafi.

“O le mata’upu lea tau aiga, e le’o se mea e fou i le fa’alogo aua o lo’u a ia talitonuga, o tagata Samoa, o le mea e taua tele ia tei latou, o latou aiga,” o lana tala lea.

“E fa’amanatu mai fo’i e tatou faifeau fa’apea fo’i o tatou aiga pea va’ai mai ua ese le auala ua uia.

“Ae ou te ta’utino atu, ou te fia faigaluega aua e leai ma sesi lalo le la nei e fia nofonofo ai a i lona olaga atoa, ae peita’i o lo’u mana’oga lea e fia fa’ao’o i se aso a sau, aua o le taimi lenei,o lo’o fa’amuamua lo’u aiga ma lo’u tiute tausi aiga.

“Na’o lo’u to’alua ma te fa’atasi i le va’aiga o ona matua i le taimi nei aua mate nonofo i le latou fale.

“O lo’o fa’atali fo’i i se taimi e maua ai se ma fanau.

“O mea uma e amata mai i le olaga tau atia’e.

“O le olaga a le i le taimi nei, o le fai o le fa’ato’aga, fa’amama fanua ia ma fai fo’i ni feau e mana’omia e le matou faifeau ma lona faletua.

“O matou, ia e taua lava le matou ola tautua i le matou faife’au ma mea e fai le lotu aua fai mai le tala, e le fa’apea na’o ou galuega e maua ai ou manuia, o isi taimi e sau i tagata o lo’o faia le galuega a le tama o i le lagi.

“Ou te mana’omia a la se galuega ma ou te sauna loa, ia amata fo’i lea o le su’e galuega.

“Ae o le taimi nei, e ave lava le fa’amuamua i aiga; pe na’o lou to’alua e leai se lua fanau, o le amataga lava lena ole olaga fai aiga

“E le tatau fo’i ia tatou ona tatou lauga atu i tupulaga i lenei vaitaimi e fa’amuamua ma fa’ataua aiga ae solomua mai ia tatou ona tatou le savali i lena fa’aupuga.

“Ia avea tatou le matutua ma tagata tuai o le lalolagi e fai ma fa’ata’ita’iga i a tatou fanau fa’apea tupulaga eseese i le ola tautua sa’o a mo o tatou aiga.”

© Samoa Observer 2016

Developed by Samoa Observer in Apia