Manatu o le Fa’atonu - Utagia tu’u-alalo mo fa’amoemoega lelei

Tusia Marj Moore ma Fa’aliliu e Maiava ,

126 Hits

E ninomo-‘ese atu Amosa, lalafo uma fo’i savili ma matagi-vale ae totogo a’e loa malama o le mau mea-mananaia i totonu o si o tatou atunu’u.

O ia sauniga ma tapenaga, e taga-tutusa uma lava ma tasi le fa’amoemoega.

Tapenaga ma sauniga na maua ai avanoa e una’ia ai le vaega fai-pisinisi o le atunu’u, e fa’atosina mai ai tagata-asiasi ma latou uma sa ‘auai mai, e fa’afiafiaina i mea e tutupu ma atina’e atili ai le alamanuia o tagata-tafafao mai i Samoa.   

O ananafi na taunu’u ai i fanua, sui-‘auai mo le Fono Fa’ale-tausaga Lona 39 a le Asosi e Fa’atupea Atina’e i Asia ma le Pasefika (ADFIAP) ma e fa’afeiloa’i aloa’ia atu ai ia ‘outou uma. Mo lo tou mamalu fa’atoa tu-lau’ele’ele i laufanua o Samoa mo le ulua’i taimi, talosia ia outou matua silasila lelei ane ma le toto’a, i nisi o mafuaga e le-mafai ai lava ona matou tu’ua o Parataiso nei. E talitonu fo’i, o nisi ua malaga so’o mai, o lo’o silafia lelei mafuaga ia. 

O le Aso Faraile talu ai, toeititi aso atoa o tau-tolotolo ta’avale i nisi o vaega o le taulaga, a’o fa’agasolo le tatalaina aloa’ia o le Faletalimalo o Aggie Grey i le taulaga – o se fa’amoemoe ua leva o tulimata’ia e Samoa, le Pasefika ma le lalolagi. Ui i sia tama’i-taimi na niniva-fa’asoloatoa ai ‘ave-ta’avale, ae le-taitai ona fa’atusalia le taua ma le sao ogaoga o lea fa’amoemoe, na lolofi mai ai le anoano o vala’aulia mai atunu’u mamao ae maise le sao tu-matila o le Aiga o Grey, lea o lo’o sagisagi ai nei ma alalaga fiafia lo tatou nei atunu’u.  

O le vaiaso fo’i ua te’a atu, na lolofi mai ai i fanua, le anoano o le ‘Au-fai-faiva mai fafo, e fia fa’aalia o latou tamai ma agava’a fa’aFai-faiva, i le Ta’amilosaga Lona 20 o Faiga Faiva Fa’ava-o-malo a Samoa. O le ta’amilosaga lea e faia i tausaga ta’itasi ma o lo’o fa’ato’ateleina pea tagata e ‘auai i tausaga ta’itasi, ae maise o fiafiaga ma mafutaga fa’asamasamanoa e maua pe a mae’a faiga-faiva i aso ta’itasi. E ui lava o le fa’amoemoe ‘autu, o le mauaina lea o le i’a aupito lapo’a i le tauvaga, ae le-mafai ai fo’i ona fa’agaloa le ‘auai, pe folaulau fo’i i le Vasa Pasefika mo nai itula, pe a ua leai se i’a e maua.  

E le fa’agaloina fo’i ‘au-ta’a’alo ma le ‘au-tapua’i o isi ta’aloga ‘ese’ese. O le po o le Aso To’ona’i talu ai, na toe fafagu ai Fa’ailoga Fa’apitoa a le Fa’alapotopotoga o Ta’aloga ma le Komiti o le Olimepeka a Samoa (SASNOC), e aloa’ia ai le sao taua ma taleni a le ‘au-ta’a’alo, o latou e pulea ma fa’atonutonu ta’aloga atoa ai ma faia’oga o ta’aloga. E mautinoa lava, o se tulaga taua tele ma talafeagai ua toe fafagu ai lenei fa’amoemoe, e fa’afetaia ai ta’ita’i ma latou tonu sa fa’atinoina nei fuafuaga uma, ona o le silasila mamao i ta’iala ma fa’atinoga lelei mo le manuia o Samoa. 

E to’atele fo’i le mamalu o le atunu’u sa ‘auai, ma maua ni a’oa’oga-aoga, i le koneseti a Annie Grace, lea na faia i luma-maota o le malo i le po o le Aso To’ona’i. Le koneseti lea sa ‘auai ai fo’i se tasi o tama-fanau ta’uta’ua a Samoa, o To’aletai David Tua, lea sa fa’aopopoina mai fo’i nisi o fe’au taua mo latou o lo’o ta’afifili pea ma nisi o fa’afitauli o le ola nei, e ala i le fa’amatalaina o mea sa tutupu fo’i i lona soifua. 

Ae mo le Palemia o le Atunu’u – lē sa avea talu ai nei ma Minisita o Tagata Maimoa mai Fafo – sa fa’amanuiaina fo’i i se fe’au o le fa’amoemoe lelei, mai le Peresetene o Farani Polenisia, o Edouard Fritch, lea na fa’asuafaina e ‘Ale ma ‘Ulu o le afio’aga o Toamua i le suafa o ‘Tagaloauatasi’.

Sa foufou lelei lava lana saunoga e tali ai i le mana’o o le Ali’i Palemia, ina ia amataina ni faiga-malaga tu’u-sa’o i le va o atunu’u e lua – Samoa ma Tahiti. Sa fa’ailoa lona naunau e fa’atino lea fa’amoemoe lelei, ma feso’ota’i ai fo’i ma isi atunu’u o le Pasefika.

Na aupito mata’ina lana saunoaga i le pulea ma le va’aia lelei o mea nei o kamupani va’alele.

Sa fesiligia i le tulaga lea, ae saunoa Tagaloa, o lona lava talitonuga, e fua i galuega sa faia ma lona iloa, ua fa’amaonia ai, e matua faigata lava i se malo, ona fa’agaioia o se kamupani va’alele.  

Tatou te matua lagolagoina lava lea saunoaga a Lana Afioga ma e mafai fo’i ona fa’ailoa atu iai, nai a tatou tala e fa’amaonia ai lona finagalo.

Na ta’ua fa’apea, “e una’ia malosi lava kamupani tuto’atasi mo lea fa’amoemoe ae fa’amaepaepa pea ma tumau le malo, e tu’uina atu le lagolago.”

Ma tatou uma o lo’o pologa pea e tau-totogi mea-sese a le malo na molali ai le kamupani-va’alele i tausaga e le’i mamao tele atu, fa’apea fo’i tatou o lo’o silafia le tele o faiga-pi’opi’o ma faiga le-alolofa a le pulega o lea kamupani sa faia, o le tu’u-alalo ma le tatou fautuaga mo le Ali’i Palemia: Fa’amolemole e utagia lelei saunoaga a Tagaloa.  

© Samoa Observer 2016

Developed by Samoa Observer in Apia